Ձեր վստահելի աղբյուրը

«Ուզում եմ խոսել իշխող քաղաքական ուժի ազնվության և անկեղծության մասին»,- խոհրդարանում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով ԲՀԿ ղեկավար Գագիկ Ծառուկյանին անձեռնմխելիությունից զրկելու միջնորդությանը։

Նա հիշեցրեց, որ 2018 թվականի օգոստոսի 11-ին վարչապետ Նիկոլ Փաշինյանը Իջևան քաղաքում ընտրողների հետ հանդիպմանը ասել է՝ Հայաստանում պետք է արմատախիլ արվի ընտրակաշառքների միջոցով ընտրություններում հաղթելու պրակտիկան, և այն ուժերը, որոնք ընտրակաշառք են բաժանել չպետք է գան և մասնակցեն ընտրություններին։

«Բնականաբար, երբ այդ հայտարարությունն անում էր, որպես երկար տարիների ընդդիմադիր պատգամավոր, նա գիտեր, որ միշտ էլ ընտրություններից հետո եղել են ընտրակաշառք բաժանելու մասին  խոսակցություններ, փաստեր։ 2018 թվականի հոկտեմբերի 18-ին «Մուլտի Գրուպ» կոնցեռնի հետ համագործակցությամբ Հայաստանում կառուցվում է խոշոր մայնինգ ֆերմայի բացմանը Փաշինյանն ասել է՝ Հայաստանում օլիգարխներ չկան, ոչ մեկի համար գաղտնիք չէ, որ պարոն Ծառուկյանը խոշոր սեփականատեր է։

2018 թվականի հոկտեմբերի 8-ին էլ Նիկոլ Փաշինյանն ու Գագիկ Ծառուկյանը ստորագրել էին հուշագիր, որի չորրորդ կետն է շատ հետաքրքիր. այնտեղ գրված է՝ կողմերը պատրաստվում են համատեղ աշխատել երկրում մարդու իրավունքների պաշտպանության մակարդակը բարձրացնելու... ուղղությամբ»,- ներկայացրեց պատգամավորը։

Էդմոն Մարուքյանը հիշեցրեց նաև 2018 թվականի դեկտեմբերին տեղի ունեցած հեռուստաբանավեճը, որի ընթացքում ինքը  Գագիկ Ծառուկյանին ասել էր, որ նա գործարար է, և չպետք է մասնակցի ընտրություններին։ Դրանից հետո, պատգամավրի խոսքով, ԲՀԿ ներկայացուցիչների հետ իրենց հարաբերությունները լարվեցին, իսկ խորհրդարանական ընտրություններում ԲՀԿ-ն դարձավ երկրորդ ամենամեծ խմբակցությունը.

«Եվ այդ ժամանակ վարչապետ Նիկոլ Փաշինյանը հայտարարեց, որ ԲՀԿ-ն ամենամեծ ընդդիմադիր խմբակցությունն է, և նա այդ խմբակցությունը լեգիտիմ է համարում, հետևաբար  ԱԺ փոխխոսնակներից մեկը պետք է  ընտրվի ԲՀԿ-ից»։

Պատգամավորի խոսքով, ինքն այս ամենը հիշեցնում է, քանի որ իշխանական պատգամավորների վերջին շրջանի հայտարարությունները հակասում են վերոնշյալ իրողություններին, և այդքանով այս գործընթացն ազնիվ ու անկեղծ չէ։

«Ես ուզում եմ ձեզ հիշեցնել ևս մի դեպք, երբ գլխավոր դատախազ Աղվան Հովսեփյանը եկավ խորհրդարան և խնդրեց թույլ տալ՝ քրեական հետապնդում իրականացնելու Վարդան Օսկանյանի նկատմամբ, որը ԲՀԿ երկրորդ համարն էր, և հավակնում էր նախագահական ընտրություններում թեկնածու լինելուն։ Ասվում էր,  որ նա փողեր է լվացել։  Եվ Նիկոլ Փաշինյանն այս ամբիոնից ասում է՝ Վարդան Օսկանյանը մարտի մեկի մահվան դատավճիռներ հրապարակած մարդ է, և այո, պետք է նա հետապնդվի։ Ես այդ ժամանակ անկախ պատգամավոր էի, և դեմ քվեարկեցի։ Իսկ այն ժամանակի իշխանությունը նույնատիպ ելույթներ էր ունենում, ինչ այսօրվա իշխանություններն՝ այս դեպքի առթիվ։ Եվ վերջում Օսկանյանի գործը փակվեց, պրծավ։ Պարզվեց, որ խորհրդարանը քաղաքական նպատակահարմարությամբ համապատասխան ժամանակահատվածում իր պատգամավորին հանձնեց իրավապահներին, որպեսզի նա դադարի հավակնել որևէ բանի։ Այդպես էլ եղավ, քրգործն էլ փակվեց»,- ներկայացրեց Էդմոն Մարուքյանը։

Դիմելով իշխանությանը՝ նա հարցրեց՝ այդ ո՞նց եղավ, որ երբ պետք է ԲՀԿ-ն լավ ուժ է, Գագիկ Ծառուկյանը խոշոր սեփականատեր է, նրա տանը կարելի է գնալ քեֆ անել, հետո գալ, մեզ ասել՝ բա իմացե՞լ եք՝ ինչ է եղել։

«Իսկ ո՞վ է մեզ՝ ԼՀԿ-ին կանգնեցրել այդ բարդ ընտրության առաջ, երբ հուշագիր էիք կնքում, այդ ժամանակ ճանաչել եք այդ մարդկանց լեգիտիմությունը։ Այս գործի նկատմամբ կա քաղաքական հսկողություն, այդ ո՞նց եղավ, որ ձեր նախարարների մոտ են հայտնվում նախաքննության նյութերը, քաղաքական չի՞։ Այդ ե՞րբ է եղել, որ քրգործի նյութերը բաժանվեն մարդկանց, նրանք էլ սկսեն հրապարակել։ Եվ այո, սա բարդ ընտրություն է, մենք գտնում ենք՝ կա քաղաքական խնդիր։ Քաղաքական իշխանությունը ելույթ էլ չի ունենում, որ գոնե հասկանանք՝ ինչ ու ոնց։ Այս առումով, ես ինքս, որպես Գագիկ Ծառուկյանի հետ շատ վատ հարաբերություններ ունեցող պատգամավոր, հիմա ձեզ ասում եմ, դուք ազնիվ չեք, անկեղծ չեք։ ԼՀԿ-ն չի մասնակցելու այս ֆարսին, և եթե ԲՀԿ-ն էլ չմասնակցի, ինձ հետաքրքիր է, դուք 88 հոգով միաձայն այո կասե՞ք»,- եզրափակեց խոսքը էդմոն Մարուքյանը։