Ձեր վստահելի աղբյուրը

«Գազի սակագինը ոչ բոլորի համար է բարձրանալու»,- խորհրդարանում ասաց ՀՀ հանրային ծառայությունները կարգավորող հանձնաժողովի (ՀԾԿՀ) անդամի թեկնածու Կամո Սարգսյանը՝ պատասխանելով ԱԺ «Իմ քայլը» խմբակցության պատգամավոր Բաբկեն Թունյանի հարցին։

Պատգամավորը հետաքրքրվել էր, թե գազի գնի սակագնի վերաբերյալ ինչ մոտեցում ունի ՀԿԾՀ անդամի թեկնածուն։

Կ. Սարգսյանը նշեց, որ «Գազպրոմ Արմենիա» ընկերությունը 1000 խորանարդ մետր գազի համար առաջարկել է միջինացված 283 դոլար։ Սակայն, ըստ նրա, ՀԾԿՀ ուսումնասիրությունների արդյունքում նույն ծավալի գազի համար ստացվել և առաջարկվել է 266.7 դոլար։

«Այդպես էր ստացվել, քանի որ «Գազպրոմ Արմենիան» ներկայացրել էր մեկ ընդհանուր սակագին, սակայն մենք բաշխել ենք սակագները և տարբեր խմբերի համար այն տարբեր է լինելու։ Գազի սակագնի բեռը մինչ այժմ եղել է բնակիչ-բաժանորդների վրա, և երբ 1000 խմ գազը մենք ստանում էինք 290 դոլարով, յուրաքանչյուր բաժանորդի համար գազի մեկ խորանարդի սակագինը սահմանվել էր 139 դրամ, հիմա ևս այդ սակագինը պահպանվելու է միջին խավի համար, իսկ 10 հազար խորանարդից ավելի գազ սպառողների համար սակագինը բարձրանալու է»,- տեղեկացրեց Կամո Սարգսյանը։

«Լուսավոր Հայաստան» խմբակցութան պատգամավոր Արկադի Խաչատրյանն էլ հետաքրքրվեց, թե նախորդ տարի, երբ սահմանի վրա գազի գինը թանկացավ 15 ԱՄՆ դոլարով, ձևավորված ֆինանսական ճեղքն ինչպե՞ս է փակվել՝ սակագների բարձրացման հաշվի՞ն, պետության փոխհատուցմա՞ն, թե՞ մնացել է «Գազպրոմ Արմենիայի» վրա:

Ըստ պատգամավորի, եթե բացի խնդիրը մնալու է ընկերության վրա, ապա այն կլինի կամ շահույթի մարժայի միջոցով, որը հաստատված է, կամ ծախսերի կրճատման:

Կամո Սարգսյանն ասաց, որ միանվագ ծախսերի կրճատում է իրականացվել, որպեսզի բնակչության համար բարձրացում չլինի: Վերջինիս խոսքով, այդ ծախսերը նախատեսված էին նորոգման, նյութատեխնիկական բազայի ձեռքբերման և սեզոնային աշխատողների կրճատման հաշվին:
Արկադի Խաչատրյանը, հիշատակելով թեկնածուի այն պնդումը, որ սահմանի վրա գազի գնի նոր բարձրացումը չի ազդի սպառողների համար սահմանված սակագնի վրա, հետաքրքրվեց, թե ինչի՞ հաշվին է այն լինելու:

Հանրային ծառայությունները կարգավորող հանձնաժողովի անդամի թեկնածուն տեղեկացրեց, որ փոփոխություններ կլինեն 10000 խորանարդ մետրից ավել գազ սպառողների մոտ, մասնավորապես՝ գյուղվերամշակող ընկերությունների մոտ՝ 212 ԱՄՆ դոլարից հասնելով 224 դոլարի:

Նշենք, որ Կամո Սարգսյանի թեկնածությունը՝ որպես ՀԾԿՀ անդամ առաջարկել է ՀՀ վարչապետ Նիկոլ Փաշինյանը։ 2019 թվականի մայիսի 31-ին ևս նա մեկ տարի ժամկետով ընտրվել էր որպես ՀԾԿՀ  անդամ։