Ձեր վստահելի աղբյուրը

Հունիսի 16-ի առավոտյան Դաղստանում գտնվող ժամանակավոր բնակեցման ճամբարում բախումներ էին տեղի ունեցել ոստիկանության և Ադրբեջանի քաղաքացիների միջև, որոնք կորոնավիրուսային համաճարակի պատճառով մնացել են այնտեղ ու ցանկանում են վերադառնալ իրենց երկիր։ Այս մասին գրում է Настоящее время-ն։

Բախումների արդյունքում մոտ 90 մարդ էր տարվել ոստիկանության բաժանմունքներ, սակայն, ինչպես ասել է տարածաշրջանի քննչական կոմիտեի ղեկավարի ավագ օգնական Ռսուլ Թեմիրբեկովը, «նրանք ձերբակալված չեն»:

Ադրբեջանի նախագահի աշխատակազմի արտաքին քաղաքականության հարցերով օգնական Հիքմեթ Հաջիևը հայտարարել է Դաղստանի հետ ցամաքային սահմանի երկայնքով Ադրբեջանի ավելի քան 150 քաղաքացիների տարհանելու պլանների մասին՝ ափսոսանք հայտնելով կատարվածի համար:

Նշենք, որ միջադեպը սկսվել էր հունիսի 15-ի երեկոյան: Դաղստանի Դերբենդի շրջանի ղեկավարի ժամանակավոր պաշտոնակատար Ֆուադ Շիխիևն ասել է, որ ադրբեջանցիները ստացել են ցուցակ՝ 120 մարդու անուններով, որոնց թույլատրվել է հատել սահմանը և վերադառնալ տուն, ինչը վրդովմունք է առաջացրել, քանի որ ոչ բոլորը կկարողանան վերադառնալ։

Ընդհանուր առմամբ, այժմ սահմանին մոտ 600 մարդ կա և բոլորն էլ ցանկանում են վերադառնալ հայրենիք: Առաջնահերթություն է տրվել կանանց ու երեխաներին։