Ձեր վստահելի աղբյուրը

Երեկվա՝ հունիսի 16-ի դրությամբ Հայաստանի Հանրապետության արդարադատության նախարարության քրեակատարողական ծառայության համակարգի աշխատակիցների (ծառայողների) շրջանում նոր տեսակի կորոնավիրուսային հիվանդության (COVID-19) դեպք հայտնաբերվել և հաստատվել է 33 անձանց մոտ։ Panorama.am-ի հետ զրույցում նման տվյալներ տրամադրեց Քրեակատարողական ծառայության հանրային կապերի բաժնի պետ Նոնա Նավիկյանը։

33 աշխատակիցներից 19-ն արդեն իսկ ապաքինվել և վերադարձել է իր ծառայողական պարտականությունների կատարմանը։

Քրեակատարողական հիմնարկներում պահվող անձանց շրջանում առկա է նման հիվանդությամբ 1 դատապարտյալ («Կոշ» ՔԿՀ), որն այժմ գտնվում է ՀՀ ԱՆ «Դատապարտյալների հիվանդանոց» ՔԿՀ-ում։

Ընդհանուր առմամբ կորոնավիրուսի դեպքեր են գրանցվել «Նուբարաշեն», «Վարդաշեն», «Երևան կենտրոն», «Կոշ», «Սևան», «Աբովյան», «Հրազդան», «Արմավիր» ՔԿՀ-ներում։ Ստացվում է, որ Հայաստանի 12 ՔԿՀ-ներից ութում եղել են վարակակիրներ։