Ձեր վստահելի աղբյուրը

«Դուք ժամանակին ասում էիք, որ ՀՀ-ում հեռարձակվող «Մուլտիպլեքս»-ում տեղ գտած հեռուստաալիքները, որոնց թվում են նաև ռուսական ալիքները, մեր ազգային անվտանգության համար վտանգ են հանդիսանում»,- խորհրդանում ասաց ԱԺ անկախ պատգամավոր Տիգրան Ուրիխանյանը՝ դիմելով ՀՌԱՀ նախագահ Տիգրան Հակոբյանին։

Պատգամավորի խոսքով, այդ հայտարարությունը աղմուկ բարձրացրեց, հարցին խառնվեց նաև ՌԴ դեսպանատունը, և ՀՌԱՀ նախագահն այդ ժամանակ ասաց, որ լրացուցիչ հայտարարությամբ հանդես կգա․ «Հիմա անհրաժեշտություն կա այդ հարցը պարզաբանելու։ Եվ ինձ հետաքրքրում է՝ դա մեր պետակա՞ն դիրքորոշում էր, թե կապ չուներ պետության պաշտոնական կարծիքի հետ»։

Պատասխանելով հարցին՝ Տ. Հակոբյանը նախ նշեց, որ պատգամավորն իրեն կոռեկտ չի ցիտում, և այդ աղմուկն էլ բարձրացել էր իրեն ոչ կոռեկտ ցիտելու պատճառով։

«Ես որևէ անգամ չեմ օգտագործել ազգային անվտանգություն եզրույթը, ես խոսել եմ տեղեկատվական և լեզվական անվտանգության մասին։ Ինչքանով են օտար հեռարձակողներն իրեն օրակարգով ազդում ՀՀ տեղեկատվական և լեզվական անվտանգության վրա, ինքներդ կարող եք կարծիք կազմել։ Եթե մարզային կաբելային ցանցերում 400 ծրագրերից մոտ 320-ը հեռարձակվում են օտար լեզուներով, արդյո՞ք դա ազդում է մեր լեզվական անվտանգության վրա։ Ես խոսել եմ այն  եզրույթների մասին, որոնց համար պատասխանատվություն եմ կրում։ Ես խոսել եմ նաև մեր ռուս գործընկերների հետ, բնական է, որոշ տարաձայնություններ կան, բայց կամաց-կամաց ընդհանուր գոյատևման մոդել են ձևավորում»,- ներկայացրեց ՀՌԱՀ նախագահը։

Նա նաև նշեց, որ ինքը՝ որպես անկախ սահմանադրական մարմնի ղեկավար, ներկայացնում է միայն հանձնաժողովի տեսակետները, որոնք որևէ կապ չունեն օրենսդիր և գործադիր իշխանություննրի կարծիքների հետ։

Արձագանքելով՝ Տ. Ուրիխանյանը նշեց, որ ինքը չի ցիտել ՀՌԱՀ նախագահին, այլ ասել է՝ եղել է այսպիսի արտահայտություն, և լավ է, որ իրեն շտկեցին. «Բայց հիմա ցիտում եմ այն, ինչ նոր ասացիք, այսինքն՝ ռուսական ալիքները ՀՀ-ում տեղեկատվական սպառնալի՞ք են»։

«Ոչ, ես այդպիսի բան չեմ ասել»,- կտրուկ արձագանքեց Տիգրան Հակոբյանը։

Տ. Ուրիխանյանն էլ շարունակեց խոսքը. «Լավ է, բավարարված եմ Ձեր պատասխաններից, հարց չկա։ Մի ճշտում՝ իսկ տեղյա՞կ եք, իշխանությանը դո՞ւր է եկել Ձեր կարծիքը՝ ռուսական հեռուստաալիքների հետ կապված»։

ՀՌԱՀ նախագահն էլ ևս մեկ անգամ կրկնեց, որ ինքը չի ասել ռուսական ալիքներ, ինքն այդ բառակապակցությունը չի օգտագործել։

«Դա օգտագործվում է մանիպույացիաների համար, որ հանձնաժողովը հակառուսական դիրքորոշում ունի։ Հանձնաժողովը հակառուսական դիրքորոշում չունի և իր գործունեությամբ ապացուցում է։ Նորից եմ կրկնում՝ լեզվական և տեղեկատվական անվտանգությունը ցանկացած երկիր համարվում է վտանգված, երբ օտար հեռարձակողների քանակը շատ ավելի են լինում, քան տեղականը»,- եզրափակեց խոսքը Տ. Հակոբյանը։