Ձեր վստահելի աղբյուրը

ՀՀ Բարձրագույն դատական խորհրդում արդարադատության նախարար Ռուստամ Բադասյանը հանդես եկավ ՀՀ վերաքննիչ քրեական դատարանի դատավոր Ալեքսանդր Ազարյանի կարգապահական պատասխանատվության ենթարկելու մասին միջնորդությամբ։

Հիշեցնենք, որ կարգապահական վարույթը հարուցվել է ՀՔԾ պետ Սասուն Խաչատրյանի հաղորդման հիման վրա:

Նախարարի կարծիքով, դատավոր Ազարյանի կողմից թույլ է տրվել Դատական օրենսգրքով սահմանված վարքագծի կանոնները՝ ի պաշտոնե գործելիս  դրսևորել է  անհարգալից ու անբերկիրթ  վերաբերմունք  դատավարության մասնակից և վերջինս վերադասի նկատմամբ, նաև իր  խոսքով կողմնակալության կամ խտրականության տպավորություն է ստեղծվել։

«Դատարանը պետք է հարգալից  վերաբերմունք ցուցաբերի դատավարության կողմերի, ցանկացած այլ անձի նկատմամբ ի պաշտոն գործելիս։ Ցանկացած իր գործողությամբ, այլ վարքագծով, որոշմամբ դատավորը պետք է երրորդ անկողմնակալ դիտորդի մոտ չթողնի անկողմնակալության տպավորության։ Մեր կարծիքով, արտահայտությունը, մասնավորապես՝ «հույս ունեմ, որ քննիչը չի իջնի ՀՔԾ պետի մակարդակին», վիրավորական, ոչ հարգալից են քննիչի, ընդհանրապես քննչական  ծառայության և տվյալ քննչական ծառայության վերադասի մասով»,- ասաց Ռ.Բադասյանը։

Նա նշեց, որ իրենց չի հետաքրքրում անձնական հարաբերությունների խնդիրը, իրենք հիմք են ընդունել հաղորդման այն հատվածները,  որտեղ խոսքը գնում է վարքագծի կանոնների խախտում առկա է, թե ոչ,  անձնական  հարաբերությունների խնդիրը կամ որքան էր լարված կամ ոչ,  չի հետաքրքրել, որևէ նման հանձնարարություն չի եղել։

Դատավոր Ալեքսանդր Ազարյանի պաշտպան Տիգրան Աթանեսյանն ասաց, որ միջնորդության մեջ երկու խախտում է մեղսագրվել, նշեց՝ մատնացուց անել  ՀՀ Դատական օրենսգրի այն դրույթները, որը ձեզ թույլ է տալիս դուրս գալ հաղորդման շրջանակից և  դատավորին կարգապահական վարույթի  ընթացքում մեղսագրել ևս մեկ խախտում։

Նախարարն ասաց, որ եթե խորհրդի կողմից կներկայացվի իրավական դիրքորոշում, ըստ որի դուրս են եկել հաղորդման շրջանակից, կներկայացնեն համապատասխան կարգավորումները։

Այնուհետև փաստաբանն ասաց. «Պարոն նախարար, մարտի 6-ի տեղի ունեցած իրադարձությունը, որը գնահատել եք կարգապահական   խախտում և միջնորդության մեջ  խնդրում եք ԲԴԽ-ին պատժել դատավորին, երբ  կամ ինչպես իմացաք, որ ամսի 6-ին տեղի է ունեցել կարգապահական  խախտում, երբ պարոն Խաչատրյանը դրա մասին առհասարակ չի խոսում»։
Դահլիճից հնչեց, որ այդ հարցն արդեն չորրորդ անգամ է տրվում, փաստաբանն ասաց, որ պատասխանն ինքը չի ստանում։

Այնուհետև դատավոր Ազարյանն ասաց. «Խորհրդի անդամներին կփորձեմ ապացուցել, որ ինչպես իմ նկատմամբ կարգապահական  վարույթ  ներկայացրած պարոն Խաչատրյանը հաղորդում ներկայացնելու պահի դրությամբ, այնպես էլ պարոն նախարարը իմ նկատմամբ կարգապահական վարույթ  հարուցելու պահի դրությամբ դատական նիստի արձանագրությանը ծանոթ չեն եղել»։

Նախարարի կողմից միջնորդությունը ներկայացնելուց ու հարցերին պատասխանելուց հետո Տիգրան Աթանեսյանը խնդրեց մեկ-երկու ժամով  հետաձգել նիստը ելույթն ավելի հիմնավոր ներկայացնելու համար։ 

«Ելույթը պատրաստել էին, նախարարի ելույթից հետո որոշակի խմբագրական փոփոխություններ պետք է անեմ ավելի ավելի հիմնավոր ներկայացնելու համար»։  

Վերաքննիչ քրեական դատարանի դատավոր Ալեքսանդր Ազարյանի կարգապահական վարույթի քննությունը հետաձգվեց մինչև այսօր՝ ժամը 17:00-ն: