Ձեր վստահելի աղբյուրը

Վերաքննքիչ քրեական դատարանում տուժողների իրավահաջորդ Տիգրան Եգորյանը, խոսելով ՀՀ երկրորդ նախագահ Ռոբերտ Քոչարյանի խափանման միջոց կալանքը անձնական երաշխավորությամբ փոխելու մինջնորդություն ներկայացրածներից նախկին վարչապետ Վազգեն Մանուկյանի մասին, ասաց՝ վերջինը Քոչարյանի համախոհն է։

«Երբ Ռոբերտ Քոչարյանը հայտարարում էր, որ պետք է լինի կոնսենսունս մինուս մեկ քաղաքական ձևաչափ»,- ներկայացնում էր Եգորյանը, երբ դատավոր Արսեն Նիկողոսյան ընդհատեց նրան՝ նկատելով, թե չի հասկանում ինչի մասին է խոսքը։

Փաստաբանը բացատրեց՝ Ռոբերտ Քոչարյանն ասում էր, որ պետք է քաղաքական դաշտը կոնսոլիդացվի, դրանից դուրս մնա մի հոգի, և այդ մի հոգին գործող վարչապետն է՝ Նիկոլ Փաշինյանը։

«Հիմա ես ի՞նչ պիտի անեմ այդ փաստի հետ, համաձայնվե՞մ, չհամաձայնվե՞մ, ի՞նչ անեմ», - ծիծաղելով հարցրեց դատավորը։

Հարցը առաջացրեց թե մեղադրող դատախազ Գևորգ Բաղդասարյանի, թե ելույթ ունեցող Տիգրան Եգորյանի, թե Ռոբերտ Քոչարյանի պաշտպան Արման Վարդևանյանի ու դատարանում մյուս ներկաների ծիծաղը։

Եգորյանն այնուհետ լրջացավ, նկատեց՝ սա անլուրջ հարց չէ։

«Իրականում ես իսկապես չեմ հետաքրքրվում քաղաքականությամբ, կարող է վաղը մյուս օրը քաղաքականությունն ինձանով հետաքրքրվի, բայց բոլոր դեպքերում ես չեմ հետաքրքրվում»,-պարզաբանեց դատավորը։

Փաստաբանն էլ նկատեց՝ ինքն ուզում է ցույց տալ, որ Վազգեն Մանուկյանն այսօր Ռոբերտ Քոչարյանի հետ գտնվում է այնպիսի հարաբերությունների մեջ, որտեղ նրա կախվածությունը Ռոբերտ Քոչարյանից կամ նրա փոխկապակցված անձանցից նաև ֆինանսական է։

Եգորյանը նկատեց, որ Վազգեն Մանուկյանը ստեղծել է «Վերնատուն» անունով քաղաքական հարթակ, որը ֆինանսավորվելու է Ռոբերտ Քոչարյանի որդու կողմից։

«Սա շատ կարևոր է հենց իմ ասած ազդեցությունների տեսակետից»,- նշեց Եգորյանը՝ հավելելով, որ Վազգեն Մանուկյանն ունեցել է բացասական պատկերացումներ Ռոբերտ Քոչարյանի վերաբերյալ, չի ցանկացել տեսնել որպես նախագահ։

Հիշեցնենք, որ հունիսի 15-ին Վերաքննիչ քրեական դատարանը՝ դատավոր Արսեն Նիկողոսյանի նախագահությամբ, սկսեց քննել ՀՀ երկրորդ նախագահ Ռոբերտ Քոչարյանի պաշտպանների՝ ՀՀ երկրորդ նախագահի խափանման միջոց կալանքը փոխելու միջնորդությունները մերժելու մասին Երևանի ընդհանուր իրավասության դատարանի որոշման դեմ բողոքի քննությունը։

Նիստի ընթացքում փաստաբանները ներկայացրել են Ռոբերտ Քոչարյանի խափանման միջոց կալանքը փոխելու երեք միջնորդությունները․ Հայաստանի և Արցախի նախկին 4 վարչապետերի անձնական երաշխավորությամբ ազատ արձակելու, կորոնավիրուսային համավարակով պայմանավորված խափանման միջոցը վերացնելու, ինչպես նաև Ռ․ Քոչարյանի նկատմամբ գրավը թույլատրելի ճանաչելու վերաբերյալ։

Հիշեցնենք, որ փաստաբանների բողոքը նախ մակագրվել էր վերաքննիչ քրեական դատարանի դատավոր Արմեն Դանիելյանին, ինչից հետո պաշտպանները հետ վերցրեցին այն՝ հիմնավորելով, որ Դանիելյանը չի կարող այս գործով արդարադատություն իրականացնել։ Նրանք բողոքը ներկայացրեցին երկրորդ անգամ, այս անգամ այն մակագրվել է Արսեն Նիկողոսյանին։։

Մայիսի 8-ին տեղի ունեցած դատական նիստի ընթացքում Ռոբերտ Քոչարյանի փաստաբանական խումբը ներկայացրել էր  երեք միջնորդություն՝ երկրորդ նախագահի խափանման միջոց կալանքը վերացնելու,  գրավով փոխարինելու, խափանման միջոց կալանավորումն անձնական երաշխավորությամբ փոխարինելու վերաբերյալ։ Դրանցից որևէ մեկը Երևանի ընդհանուր իրավասության դատարանի դատավոր Աննա Դանիբեկյանը չբավարարեց։