Ձեր վստահելի աղբյուրը

Վերաքննիչ քրեական դատարանում դատավոր Արսեն Նիկողոսյանի նախագահությամբ ընթացող նիստում տուժողների իրավահաջորդների ներկայացուցիչ Սեդա Սաֆարյանը հակադարձելով Ռոբերտ Քոչարյանի փաստաբաններին, ասաց՝ ինքն էլ ներկայացնելու է, թե Քոչարյանի օրոք կառուցած դատարաններում ինչ որոշումներ են կայացվել, որոնց պատճառով Հայաստանը պարտվել է ՄԻԵԴ-ում։

«Նախ, երբ 1998 թվականին Քոչարյանը եկավ իշխանության գլուխ սպանվեց Հայաստանի Հանրապետության դատախազ Խաչատրյանը»,- ասաց Սաֆարյանը, ինչին հետևեց փաստաբան Ալումյանի՝ «առարկում եմ»-ը։

Մինչ դատավորը փորձում էր ձայնի իրավունք տալ փաստաբանին, Սաֆարյանը շարունակում էր խոսել։

«Տիկին Սաֆարյան, դե սպասեք առարկությունը լսենք գոնե»,- ասաց դատավորը։

«Դե գիտեմ, ինչ է ասելու։ Ես չեմ ուզում լսել»,- հակադարձեց Սաֆարյանը։

«Դե ձեր ուզելով չի, սպասեք, սպասեք վայ, հասկանում եմ՝ չեք ուզում, բայց ես եմ որոշում»,- նրան ընդհատեց դատավորը։

Փաստաբան Հայկ Ալումյանը նշեց՝ այստեղ վերլուծության չեն ենթարկում Ռոբերտ Քոչարյանի կառավարման ժամանակահատվածը, հակառակ դեպքում օրեր շարունակ կարող են ներկայացնել, թե ինչ է արվել։

«Սրանք փաստեր են, որոնց համար տեղեկանք պետք չէ, տեղի է ունեցել 27, 2008... Ես ուզում եմ հասկանանք իրար»,- շարունակեց խոսել Սեդա Սաֆարյանը։

«Եթե չթողնեք, ես խոսեմ, իրար ո՞նց կհասկանանք։ Հիմա փաստաբանն առարկություն է արել, դուք դրա վերաբերյալ ձեր դիրքորոշումը ներկայացրեք, ես էլ որոշեմ»,- արձագանքեց դատավորը Նիկողոսյանը։

Սեդա Սաֆարյանը թվարկեց ՄԻԵԴ-ում՝ Վիրաբյանն ընդդեմ Հայաստանի, Սաղաթելյանն ընդդեմ Հայաստանի ու այլ գործեր, նկատեց, որ դրանք խոսում են բռնությունների մասին, արդյունավետ միջոցների չկիրառման մասին, որոնք բնորոշում են Հայաստանի իրավական համակարգը. «Հիմա եկել հեղինակությունից եք խոսում, հիմա նայած ով ոնց է հասկանում»։

«Վերջին մտքի հետ համաձայն եմ, ով ոնց է հասկանում, ես ոնց հասկացա, այդպես կլինի իմ որոշումը, այլ հարց է, որ դա ձեզ հետ կամ պաշտպանների հետ կարող է չհամաձայնեցվի»,- ասաց դատավոր Նիկողոսյանը։

«Դե ես արդեն զգում եմ, թե ինչ է կատարվում, այնպես չի, որ ձեր հարցադրումներից չեմ հասկանում, ընենց չի, որ կանխատեսելիությունս զրո մակարդակի է, ես չեմ հասկանում»,- ասաց Սաֆարյանը։

Դատավորը կրկին հիշեցրեց՝ ինքը դատարանի դահլիճում ուղեղը չի անջատում, խոսում է, հարցնում է, որպեսզի խորհրդակցական սենյակում որոշում կայացնելիս վստահ լինի իր որոշման իրավացի լինելու մեջ։

«Իմ հարցերը միտված են դետալները պարզելուն ու իմ որոշում կայացնելիս վստահ լինելուն, այն չի կարող համաձայնեցվել մեղադրողների, տուժողների, պաշտպանների  հետ, այն կարող է համապատասխանել որևէ կողմի տեսանկյունին, մյուս կողմը իրավունք ունի այն բողոքարկելու ու դրա հետ չհամաձայնելու։ Տիկին Սաֆարյան, ես մի քիչ երկար եմ խոսում, որ դուք հանգստանաք ու սկսեք դատարանի հետ նորմալ խոսել։ Տիկին Սաֆարյան, եթե կարծում եք, անկողմնակալ չեմ, կարող եք ինքնաբացարկ հայտնել»,- ամփոփեց խոսքը դատավորը։

Հիշեցնենք, որ հունիսի 15-ին Վերաքննիչ քրեական դատարանը՝ դատավոր Արսեն Նիկողոսյանի նախագահությամբ, սկսել է քննել ՀՀ երկրորդ նախագահ Ռոբերտ Քոչարյանի պաշտպանների՝ ՀՀ երկրորդ նախագահի խափանման միջոց կալանքը փոխելու միջնորդությունները մերժելու մասին Երևանի ընդհանուր իրավասության դատարանի որոշման դեմ բողոքի քննությունը։

Նիստի ընթացքում փաստաբանները ներկայացրել էին Ռոբերտ Քոչարյանի խափանման միջոց կալանքը փոխելու երեք միջնորդությունները․ Հայաստանի և Արցախի նախկին 4 վարչապետերի անձնական երաշխավորությամբ ազատ արձակելու, կորոնավիրուսային համավարակով պայմանավորված խափանման միջոցը վերացնելու, ինչպես նաև Ռոբերտ Քոչարյանի նկատմամբ գրավը թույլատրելի ճանաչելու վերաբերյալ։