Ձեր վստահելի աղբյուրը

ՀՀ երկրորդ նախագահ Ռոբերտ Քոչարյանի փաստաբանական խմբի անդամ Հայկ Ալումյանին տուժողի իրավահաջորդ Տիգրան Եգորյանի հայտարարությունները մի պատմություն հիշեցրեցին։

«Մի կին է դուրս գալիս, կանգնած տղամարդն ընկերոջը հարցնում է՝ ո՞վ է էս կինը։ Պատասխանում է՝ չգիտեմ ով է, բայց մի պատմության մեջ կար, տո լի ինքն էր մեկի մուշտակը գողացել, տո լի իր մուշտակն էին գողացել»,- Վերաքննիչ քրեական դատարանում իրենց բողոքի՝ դատավոր Արսեն Նիկողոսյանի նախագահությամբ քննության ընթացքում պատմեց Ալումյանը։

Նա նշեց, այս նիստը մի առավելություն ունի, դետալային են այստեղ ամեն ինչ քննարկում, բայց թերություն էլ ունի, որ մարդկանց ցեխոտում են առանց իրավական հետևանքների։

«Այս ձևով ցեխ շպրտելն անթույլատրելի է բոլոր տեսանկյունից՝ թե բարոյական, թե իրավական առումով։ Առանց նյութերը ներկայացվելու նման բաներ են ասվում։ Պարոն Եգորյանի նման իրավաբանը եթե չլիներ, լիներ մեկ ուրիշը, ես կմտածեի, որ անգործությունից ելնելով են նման բան անում։ Ո՞նց կարելի է մի բան ասել, հիմքը չներկայացնել ու ակնկալել, որ դատարանը դա հիմք կընդունի։ Սա անփորձ ու գիտելիքների պակաս ունեցող մեկի դեպքում կարելի է հասկանալ, բայց այս դեպքում այդ վիճակը չէ։ Գիտելիքն էլ, փորձն էլ բավարար են, հետևաբար ինչո՞ւ է նման բաներ ասում պարոն Եգորյանը։ Միայն մի բանի համար, այստեղ գտնվող խցիկների համար»,- հարցեր հնչեցրեց փաստաբանը։

Անդրադառնալով Եգորյանի այն հայտարարությանը, թե Անուշավան Դանիելյանին Ռոբերտ Քոչարյանը տվել է վարչապետի պաշտոն, Ալումյանը հորդորեց հայտարարություններն անելուց առաջ ստուգել։

«Ուրեմն, Անուշավան Դանիելյանը Արցախի վարչապետի պաշտոնը ստացել է 1999 թվականին, երբ պարոն Քոչարյանը բնականաբար նման իրավասություն չուներ։ Անուշավան Դանիելյանի մասին էլի հերյուրանքներ ցփնեցին համայն հայության շրջանում, դրանց ներքո ոչ մի նյութ չդնելով։ Ցփնել բառը ես պատահական չօգտագործեցի, այն, ինչ արվում է, դրան տրվում է մարդուն վարկաբեկելու նշանակություն»,- ասաց  Ռոբերտ Քոչարյանի պաշտպանը։

Նա մանրամասնեց, եթե իրավաբանական նպատակ ունենային այդ հայտարարությունները դատարանին կներկայացվեր Անուշավան Դանեիլյանի նկատմամբ հետախուզման որոշումը, մի ավելի լուրջ փաստ, թե ինչու է նա գտնվել հետախուզման մեջ, գտնե՞լ է, թե՞ չի գտնվել։

Ալումյանը փաստեց, մեղադրող դատախազները հայտարարել են, որ չեն վիճարկում, կասկածի տակ չեն դնում երաշխավորողների հեղինակությունը։

Անդրադառնալով Եգորյանի հայտարարությանը, թե ինչ վերաբերմուքն ունի Ռոբերտ Քոչարյանը դատարանների նկատմամբ, փաստաբանը խորհուրդ տվեց հարցի պատասխանը ստանալու համար նայել իրենց կողքերը, հիշեցրեց, որ վերաքննիչ դատարանը վերակառուցվել է հենց Ռոբերտ Քոչարյանի նախագահության օրոք, իսկ մինչ այդ այն տեղակայված էր Վճռաբեկ դատարանի շենքում, իսկ դատական նիստերը տեղի էին ունենում դատավորների աշխատասենյակում, իսկ Կենտրոնի դատարանը զրոյից է կառուցվել, երբ դրա մի մասը բնակելի շենքը էր ու դատարանում միշտ ճաշի հոտ էր բուրում։

«Ես գիտեմ, մի դուռը տանում էր բնակարան, մյուսը՝ նիստերի դահլիճ»,- ավելացրեց դատավոր Նիկողոսյանը։

Ալումյանը հիշեցրեց նաև Շահումյանի դատարանի մասին, որը գործում էր գոմերի ադմինիստրատիվ շենքում։ Առաջարկեց դա թանգարանի վերածել։

«Սա ասում եմ՝ ցույց տալու պարոն Քոչարյանի վերաբերմունքը դատարանների նկատմամբ»,- ասաց նա։

Փաստաբանը հիշեցրեց, որ Ռոբերտ Քոչարյանը, իմանալով իրեն կալանավորելու մասին որոշման մասին, իր ոտքով է գնացել ԱԱԾ շենք, չնայած ունեն բացասական կարծիք դատավոր Արմեն Դանիելյանի գործողություններից, կրկին Ռոբերտ Քոչարյանն իր ոտքով գնաց ու մի քանի ժամ սպասեց Երևան Կենտրոն ՔԿՀ-ի մոտ։

«Այ սա է պարոն Քոչարյանի վերաբերմունքը դատարանների նկատմամբ»,- ընդգծեց Ալումյանը։

Նա նաև ասաց՝ շատ ուրախ կլիներ, եթե հեղափոխությունից հետո այս իշխանությունները դատարանների մասին այդչափ մտածած լինեին։

«Մեր աշխատավարձը բարձրացել է»,- արձագանքեց Արսեն Նիկողոսյանը։

«Շնորհավորում եմ։ Բայց լավ կլիներ, մի շենք էլ հիմա ավելացվեր»,- ասաց նա։

Ինչ վերաբերում է Վազգեն Մանուկյանի՝ Քոչարյանի կողմից ֆինանսավորմանը, Ալումյանը նկատեց, նման բան ասվում է՝ «2 հազար մարդ էլ հավատա, լավ է» սկզբունքով։

Հիշեցնենք, որ Ռոբերտ Քոչարյանի խափանման միջոց կալանքն անձնական երաշխավորությամբ  փոխելու միջնորդություն էին ներկայացրել Հայաստանի նախկին երեք վարչապետեր Վազգեն Մանուկյանը, Խոսրով Հարությունյանը, Կարեն Կարապետյանը և Արցախի նախկին վարչապետ Անուշավան Դանիելյանը։

Հունիսի 15-ին Վերաքննիչ քրեական դատարանը՝ դատավոր Արսեն Նիկողոսյանի նախագահությամբ, սկսել է քննել ՀՀ երկրորդ նախագահ Ռոբերտ Քոչարյանի պաշտպանների՝ ՀՀ երկրորդ նախագահի խափանման միջոց կալանքը փոխելու միջնորդությունները մերժելու մասին Երևանի ընդհանուր իրավասության դատարանի որոշման դեմ բողոքի քննությունը։

Նիստի ընթացքում փաստաբանները ներկայացրել էին  Ռոբերտ Քոչարյանի խափանման միջոց կալանքը փոխելու երեք միջնորդությունները․ Հայաստանի և Արցախի նախկին 4 վարչապետերի անձնական երաշխավորությամբ ազատ արձակելու, կորոնավիրուսային համավարակով պայմանավորված խափանման միջոցը վերացնելու, ինչպես նաև Ռ․ Քոչարյանի նկատմամբ գրավը թույլատրելի ճանաչելու վերաբերյալ։

Այսօր գործով երրորդ նիստն է։