Ձեր վստահելի աղբյուրը

«Չգիտեմ՝ ինչ որոշում կկայացնի դատարանը, մեր քայլերը հստակ ծրագրված  են, բոլոր հնարավոր զարգացումների դեպքում ունենք մեր մարտավարական քայլերը»,- Երևանի ընդհանուր իրավասության դատարանի Շենգավիթի նստավայրի դիմաց լրագրողներին ասաց ԲՀԿ խմբակցության անդամ Նաիրա Զոհրաբյանը։

Նա նշեց, որ դատարանից մեկ ակնկալիք ունի՝ չկատարի քաղաքական պատվեր, վճիռ կայացնող դատավորը հավատարիմ մնա բացառապես ՀՀ Քրեական օրենսգրքին, արդարադատությանը, ոչ թե կատարի քաղաքական պատվեր։

Հիշեցնենք, որ Երևանի ընդհանուր իրավասության դատարանի Շենգավիթի նստավայում շարունակվում է  ԲՀԿ առաջնորդ Գագիկ Ծառուկյանի կալանավորման հարցի քննությունը։

Հարցին՝ ԲՀԿ-ական պատգամավորները հանդիպել էին ՀՀ-ում ՌԴ դեսպանի հետ, ինչից հետո հայտարարություններ հնչեցին՝ թե «տղա եք բերում», այսինքն այլ ուժերի եք բերում, Ն. Զոհրաբյանը պատասախանեց. «Իմ գործընկերներն են հանդիպել։ Համարում եմ պարզ դեմագոգիա։ Երեկ,  օրինակ, Եվրոպայի խորհրդի խորհրդարանական վեհաժողովում իմ քաղաքական թիմը, որտեղ ես և պատգամավոր Միքայել  Մելքումյանն անդամ ենք,  բավական ծանր ու կոշտ հայտարարություն էր տարածել իմ հանդեպ սկսված այս գործընթացների վերաբերյալ։ Ինձ զանգահարել են  եվրոպական բավականին հայտնի իրավապաշտպաներ, քաղաքական գործիչներ, իրենք առաջիկայում հանդես կգան հրապարակումներով, ուշի-ուշով հետևում են թե ԲՀԿ-ի, թե անձնապես իմ հանդեպ քաղաքական գործընթացներին։

Ես ինքս խնդրել եմ եվրոպացի շատ գործընկերների, որոշ երեկրների խորհրդարանների ազդեցիկ անձանց՝ փոխնախագահների մակարդակով, ովքեր ցանկանում էին այս օրերին հրապարակումներով հանդես գալ, ձեռնպահ մնալ այս պահին»։

Ն. Զոհրաբյանի խոսքով, այն մարդիկ, որոնք փորձում են քաղաքական ընդդիմախոսներին  լռեցնել նման տարբերակներով ու ճանապարհներով, պետք է կանգ առնեն, քանի որ սա ճանապարհ չէ, երկիրը վերջնականապես փակուղի տանելու ճանապարհ է։  Նա ասաց, որ կորոնավիրուսի  դեմ պայքարի հարցում աղետալի վիճակ է, ժողովուրդը մոլովել է նույն մարդու իրար հակասող հայտարարություններից. «Իշխանությունը պետք է պատերազմ հայտարարի, ռեպրեսիաներ սկսի ոչ թե նրանց դեմ, ովքեր իրենց մտահոգությունն են հայտնում երկրի առկա վիճակի հետ կապված, այլ պայքարի կորոնավիրուսի, տնտեսական խայտառակ վիճակի դեմ»,- ասաց ԲՀԿ-ական գործիչը։

Հարցին՝ քննարկվո՞ւմ է այլ ուժերի հետ հուշագիր ստորագրելու հարցը, արդյո՞ք հնարավոր է միան դրան ՀՀԿ-ն, Ն. Զոհրաբյանն ասաց. «Նման քննարկումներ ձեր նշած կուսակցության հետ չի եղեկ։ Ինչ վերաբերում է այլ  քաղաքական ուժերի հետ համագործակցությանը,  որոնց հետ ունենք ընդհանուր համագործակցության և համախոհության դաշտ, ամեն ինչ էլ հնարավոր է։ Եթե համագործակցում ենք, բնականաբար, պետք է լինի հուշագիր, որտեղ կնշվեն մեր առաջիկա մարտավարական, ռազմավարական քայլերը»։

Նա նշեց, որ կոնսուլտացիաներ, քննարկումներ են ունենում տարբեր ՀԿ-ների, քաղաքական ուժերի հետ, այդ թվում նաև «Ժառանգություն», «Ազգային օրակարգ»։

Պատասխանելով հարցին՝ բացառո՞ւմ եք «մերժված» ուժերի հետ  համագործակցությունը, Ն. Զոհրաբյանն ասաց. «Ծառուկյան Գագիկը հստակ պատասխանել է այդ հարցին՝ այն քաղաքական ուժերը, որոնք մերժված են  ժողովրդի կողմից, մերժված են նաև մեր կողմից»։

Ինչ վերաբերում է ԱԺ նիսերը բոյկոտելուն, նա նշեց, որ ԱԺ նստաշրջանը փակվում է, առաջիկայում արտահերթ նիստեր կլինեն, կքննարկեն դրանց մասնակցելու, չմասնակցելու հարցը։