Ձեր վստահելի աղբյուրը

Կորոնավիրուսային հակամարմինները կարող են պահպանվել ընդամենը երկու-երեք ամիս այն բանից հետո, երբ մարդը վարակվում է Covid-19-ով։ ասվում է Nature Medicine-ում նախօրեին հրապարակված նոր ուսումնասիրության մեջ: Այս մասին գրում է CNBC-ն։

Չինաստանի Վանժոու շրջանի հետազոտողներն ուսումնասիրել են 37 ասիմպտոմ մարդկանց հակամարմինների առկայությունը՝ 37 սիմպտոմատիկ մարդկանց հակամարմինների հետ: Այս ուսումնասիրության արդյունքում հետազոտողները պարզել են, որ առանց ախտանիշների մարդկանց մոտ հակամարմինների արձագանքն ավելի թույլ է, քան ախտանիշ ունեցողներինը:

Բացի այդ պարզվել է, որ 8 շաբաթվա ընթացքում հակամարմինները նվազել են ասիմպտոմ մարդկանց մոտ 40%-ով, իսկ սիմպտոմներով հիվանդությունը տարած մարդկանց մոտ՝ 12,9%։

Չնայած ուսումնասիրությունը փոքր մասշտաբով է արվել, սակայն հետազոտողները նշում են, որ այս բացահայտումները կարող են փոխել որոշ համաշխարհային առաջնորդների տեսակետները, որոնք խոսում են այսպես կոչված «իմունային անձնագրերի» մասին: Որոշ երկրներ քննարկում են ռիսկերից զերծ վկայագիր տալ այն մարդկանց, որոնք հակամարմիններ ունեն Covid-19-ի դեմ՝ հնարավորություն տալով նրանց ճանապարհորդել կամ վերադառնալ աշխատանքի, ենթադրելով, որ պաշտպանված են կրկնակի վարակումից, ինչն այդքան էլ այդպես չէ։