Ձեր վստահելի աղբյուրը

Հանրային ծառայությունները կարգավորող հանձնաժողովի այսօրվա որոշմամբ մի շարք տնտեսվարողների համար  գազի սակագինը կբարձրանա միջինը 4.5%-ով: Սակայն չի բարձրանա քաղաքացիների համար սահմանված 139 դրամ սակագինը: Նույնը կմնա նաև սոցիալապես անապահով բնակիչների համար սահմանված սակագինը՝  100 դրամը։

Ըստ ՀԾԿՀ  ներկայացրած «Գազպրոմ Արմենիայի» գազի սակագների վերանայման հայտի, պետք է բնակիչների համար սահմանվեր գազի միասնական սակագին 135,9 դրամ, սոցիալապես անապահովների համար գործող մատչելի սակագինն էլ պետք է հանվեր։

«Գազպրոմ Արմենիա» ընկերությունը առաջարկել էր գազի գնի ընդհանուր բարձրացում՝ 1000 խմ գազի միջին սակագինը հասցնելով 283 դոլարի: ՀԾԿՀ-ն  էլ, առաջնորդվելով իր հաշվարկներով, առաջարկեց 266․7 դոլար՝ ներկայիս գործող 255 դոլարի փոխարեն։ «Գազպրոմ Արմենիա» ընկերության գլխավոր տնօրեն Հրանտ Թադևոսյանն իր ելույթում պնդեց, որ 1000 խորանարդ մետրի համար, պետք է սահմանվի ոչ պակաս, քան 275 դոլար:

Քննարկման արդյունքում հաստատվեց ՀԾԿՀ առաջարկած տարբերակը, որի հետևանքով սակագնի բարձրացում կլինի միայն տնտեսվարողների համար։ Հանձնաժողովը որոշեց նաև անփոփոխ թողնել բնակչությանը վաճառվող գազի սակագինը։

«Գազպրոմ Արմենիա»-ի գլխավոր տնօրեն Հրանտ Թադևոսյանը  պատասխանելով լրագրողների հարցին, նշեց որ գնի բարձրացումը նախատեսված էր ոլորտի զարգացման համար, որը չընդունվեց. «Ինչ-որ բաներ զարգացման տեմպերի հետ կապված և ասենք որոշ խնդիրներ կդանդաղեն, բայց անվտանգությունը, խոստանում եմ, որ ձեր վրա չի ազդելու»:

Վերջինիս խոսքով, իրենց նախագծով սահմանված էր, որ 2020 թվականի հուլիսի 19-ից կգործելու էին նոր սակագները բոլորի համար, բացի ջերմատներից, որոնց համար պետք է գործեր օգոստոսի մեկից։ Հետևաբար, քանի որ «Գազպրոմ Արմենիայի» հայտը ամբողջությամբ չի բավարարվել, արդեն հուլիսի 19-ին 1000 աշխատակցիկրճատման կարիք կլինի, որպեսզի այդ ֆինանսական բացը փակվի։
Ըստ Հրանտ Թադևոսյանի,  հիմնական կրճատումները կլինեն հսկիչների կազմից, որոնց թիվը կլինի 700-800 հոգի։