Ձեր վստահելի աղբյուրը

ԲՀԿ առաջնորդ Գագիկ Ծառուկյանի պաշտպանները դատարանում նրա կալանավորման միջնորդությունը քննելիս ներկայացրել են մի քանի խիստ էական հանգամանքներ։ Միջնորդության քննության ավարտից հետո լրագրողների հետ զրույցում ասաց Գ.Ծառուկյանի պաշտպաններից Երեմ Սարգսյանը։ Նրա ներկայացմամբ, այդ կարևոր հանգամանքներից մեկն այն է, որ ԱԺ ներկայացված միջնորդության բովանդակության մեջ ձևակերպված արարքը խիստ էական տարբերվում է այն արարքից, որը ներկայացվել է դատարան։

«Սա խիստ կարևոր է։ Երբ գլխավոր դատախազը միջնորդություն է ներկայացնում Ազգային ժողով, պետք է հիմնավորի, որ, այո, այս արարքի պարագայում անձին անձեռնմխելիությունից զրկելու անհրաժեշտություն է առկա։ Բայց պարզվում է, որ այլ ձևակերպումներով ստանում են համաձայնություն, իսկ դատարան են ներկայացնում այլ ձևակերպմամբ արարք», - ասաց փաստաբանը։

Ե.Սարգսյանի խոսքով, ԱԺ-ին ներկայացրել էին, թե իբրև Գ. Ծառուկյանը խմբի կազմում կաշառք է տվել ընտրողներին, միջնորդության մեջ ձևակերպումն այլ է՝ «ղեկավարել է  խումբ, որի շրջանում տրվել է կաշառք»։

Նա ասաց, որ կալանավորման միջնորդություն ներկայացրած կողմը դատարանում չի կարողացել հիմնավորել ու այնպիսի փաստաթուղթ ներկայացնել,  որն իր բովանդակությամբ կտարբերվեր փետրվարի 5-ին ներկայացված փաստաթղթի բովանդակությունից։

Պաշտպանն ընդգծեց, որ դատարանում չի ներկայացվել գոնե մեկ ապացույց, փաստական տվյալ, որ Գագիկ Ծառուկյանը որևէ անձի անձամբ է կաշառք տվել կամ որևէ մեկին ասել է գումար տվեք ընտրակաշառքի համար, որևէ ապացույց չկա, որ Գագիկ Ծառուկյանն իմացել է, որ որևէ մեկին կաշառք են տալիս, իսկ մնացած ամեն ինչը ենթադրություններ են։

«Աբսուրդ է, երբ ենթադրությունների համար ուզում են մարդ կալանավորել»,- ասաց Ե. Սարգայանը։

Նա նաև նշեց. «Եթե  կաշառքով հարուցված քրեական գործ չկա, ինչպես է ստացվում, որ վարչապետի մամուլի խոսնակը հայտարարում է, որ մի շարք քրեական գործեր են առկա, այն էլ ընտրակաշառքների վերաբերյալ։ Դրանից հետ միանգամից որոշվեց, որ կոնկրետ անձը, որին չորս ամսի առաջ հարցաքննել  էին, նորից հարցաքննել, նորից տվյալ չստացան, քրեական գործը հարուցեցին։

Այսինքն՝ եթե նույիսկ որոշակի տեղեկություն ունի, որ պետք է հարուցվի, արդեն նշանակում է  քաղաքական բնույթի մասին։ Չի կարող լինել  չհարուցված  քրեական գործ, բայց վարչապետի մամուլի խոսնակը գիտի, որ պետք է հարուցվի ու հայտարարեց»,- ասաց Ե. Սարգսյանը։

Լրագրողների հետ զրույցում ասաց ԲՀԿ առաջնորդ Գագիկ Ծառուկյանի պաշտպանական թիմի անդամներից Սամվել Դիլբանյանը նշեց, որ ներկայացված միջնորդություն անհիմն և անօրինական է, իրենց կողմից ներկայացվել են բոլոր առարկությունները. «Կարծում եմ՝ դատարանը իր բարձրության վրա կլինի և ներկայացված միջնոդրությունն անպայման կմերժվի»,- ասաց պաշտպանը։

Նա ընդգծեց, որ քրեական գործի ամբողջ նյութերում որևէ ապացույց չկա Գագիկ Ծառուկյանի կողմից որևէ գործողություն կատարելու մասին։

Գագիկ Ծառուկյանի պաշտպաններից մյուսն ասաց, որ դատարանի առաջ հարց են բարձրացրել, որ ինչպես հակասություններ կան գլխավոր դատախազի՝ ԱԺ ներկայացված  միջնորդագրի մեղադրանքի ձևակերպումների և քննիչի՝ դատարան ներկայացրած միջնորդագրի մեղադրանքի մեջ, նման հակասություն էլ կա նաև ԱԺ-ում ներկայացված կալանքի և միջնորդության մեջ ներկայացված կալանքի հիքմերի միջև։ Ըստ փաստաբանի, դատախազը երկու հիմք է ներկայացրել, քննիչը բացի այդ երկուսից, ևս երկու հիմք։

«Պաշտպանական կողմը հարց է բարձրացել ու դատարանից ակնկալում է պատասխան՝ արդյոք միջնորդություն  ներկայացրած անձը դուրս չի եկել  Ազգային ժողովի ներկայացրած միջնորդագրի սահմաններից ու ներկայացրել է այլ պայմաններ։ Մեր  կարծիքով ու համոզմամբ, այստեղ կա անձեռնմխելիությունը չհաղթահարված իրավիճակ։ Եթե կան այլ հիմքեր, իմ համոզմամբ, այս դեպքում ԱԺ-ն պետք է ունենար նաև այդ հիմքերը։ Այսինքն, եթե պատգամավորը զրկվել է  անձեռնմխելիությունի, չի  նշանակում, որ նրան կարելի է մեղսագրել այլ հանցանքներ։

Նույնիսկ եթե մեղադրանքի մեջ ձևակերպում փոխի, Ազգային ժողովը պետք է տեղյակ լինի։ Օրենքի և սահմանադրության երաշխիքը  հենց դրանում է կայանում, որ անձն ունի անձեռնմխելիոթյան երաշխիք, այդ երաշխիքը տվող մարմինը պետք է տեղյակ լինի պատգամավորի նկատմամբ կատարվող բոլոր  գործողություններից»,- ասաց պաշտպանը։ 

Հիշեցնենք, որ Երևանի ընդհանուր իրավասության դատարանի Շենգավիթի նստավայրում հունիսի 17-ից քննվում է Գ. Ծառուկյանին կալանավորելու միջնորդությունը, որը ներկայացրել է ԱԱԾ-ն։ Միջնորդությունը քննում է Երևանի ընդհանուր իրավասության դատարանի դատավոր Ռոբերտ Պապոյանը։Միջնորդությունը քննում է Երևանի ընդհանուր իրավասության դատարանի դատավոր Ռոբերտ Պապոյանը։

ԱԱԾ-ում քրեական գործեր են հարուցվել Գագիկ Ծառուկյանի դեմ։ ԲՀԿ առաջնորդը դրանք համարում է սարքած գործեր քաղաքական նպատակներով, քանի որ հետապնդումները սկսել են կուսակցության քաղխորհրդի նիստում իշխանություններին ուղղված քննադատություններից հետո։
Հունիսի 16-ին ԱԺ «Իմ քայլը» խմբակցության 87 պատգամավորներ փակ գաղտնի քվեարկությամբ նախ զրկել են նրան անձեռնմխելիությունից, ապա համաձայնություն տվել նրան ազատությունից զրկելու հարցին։