Ձեր վստահելի աղբյուրը

«Տաս տարի երկիրը ղեկավարած նախագահի նկատմամբ  այսօրվա իշխանությունը, որը նախկինում ընդդիմություն էր, հետևողականորեն ատելություն ու թշնամանք է սերմանում»,- լրագրողներին տված հարցազրույցում ասել է ՀՅԴ ԳՄ անդամ Արծվիկ Մինասյանը։

Նա նշել է, որ ներկայացված մեղադրանքների, հանրային մեղադրանքների 90 տոկոսը բացարձակապես  կապ չունի  այն գործի հետ, որն այսօր ներկայացված է ու շուրջ երկու տարի ՀՀ երկրորդ նախագահ Ռոբերտ Քոչարյանի նկատմամբ իրականացվում է. «Ըստ էության, վրեժխնդրության և քաղաքական ու անձնական հարթության մեջ պատժի գործողություն, փորձ է արվում այս ամենը քողարկված ձևով ներկայացնել իբրև արդարադատության իրականացում։ Սա բացարձակ այլևս կապ չունի արդարադատության հետ»։

Ա. Մինասյանի խոսքով, այն նույն տրամաբանությամբ, ինչ տրամաբանությամբ դատախազությունը, Հատուկ քննչական ծառայությունը փորձում է Քրեական օրենսգրքի 300.1  հոդվածը մեկնաբանել, այդ նույն մեկնաբանման շրջանակներում այսօրվա իշխանությունները՝ Նիկոլ Փաշինյանից սկսած ավարտված նույնիսկ որևէ առանձին կառավարման մարմնի ղեկավար, կարող է ներկայացվել որպես սահմանադրական կարգի տապալող։

«Օրինակ, Սահմանադրության պաշտպանվող հոդվածում հստակ ամրագրված է,  որ օրենքները պետք է համապատախանեն Սահմանադրությանը, ենթաօրենսդրական ակտերը՝ օրենքներին։ Ասվում է՝  եթե չի համապատասխանում, ըստ դատախազության ու ՀՔԾ տրամաբանության մեկնաբանության, ուրեմն իրենք սահմանադրական կարգ են տապալում։ Սա, անշուշտ, աբսուրդ  է։ Եթե ենթաօրենսդրական ակտը հակասում է  Սահմանադրությանը, օրենքին, տրամաբանական վերացման խնդիրը կա։ Չես կարող նման լայն  մեկնաբանման միջոցով մեղադրանք ներկայացնել։

Այլ կերպ ասած՝ այս տրամաբանության շրջանակներում այսօրվա իշխանությունը, հատկապես քաղաքական իշխանությունը, պետք է գիտակցի, որ չի կարելի օրվա հրամայականից, անձնական, նեղ խմբային շահից ելնելով՝ հանձնարարել այդպիսի լայն մեկնաբանությամբ առաջնորդվել։  Այդպիսի առաջնորդումը հետագայում բերելու է  անընդհատ այս կամ այն իշխանությանը, ներառյալ այսօրվա իշխանությանը,  երևի թե առաջին հերթին այսօրվա իշխանությանը, սահմանադրական կարգի  տապալման մեջ մեղադրանքներ ներկայացնել։ Երկրի զարգացման տեսակետից սարսափելի իրավիճակ է առաջացանում»,- ասել է Ա. Մինասյանը։

ՀՅԴ-ական գործիչն ընդգծել է, որ սկզբունքային նշանակության ունի այն, որ քաղաքական իշխանությունը հասկանալով, որ Սահմանադրական դատարանը պետք է վերսկսի այս գործն ու երկու խորհրդատավական կարծիքները հիմքում դնելով պետք է որոշում կայացանի, գործադրում են իրենց ճնշման գործիքը, որ  հետևողականորեն փորձում էին վերացնել այն ՍԴ-ն,  որը պետք է կայացանի այդպիսի որոշում։

«Քրեական օրենսգրքով  պատժելի արարք է այն, ինչ-որ այսօր քաղաքական մեծամասնությունը կատարում է»,- ասել է նա։

Քաղաքական գործիչը հիշեցրել է, որ երեկ շրջանառության մեջ է դրվել Սահմանադրության փոփոխության նախագիծ, որով փորձում են ՍԴ այսօրվա կազմը վերացնել։

«Արագ գործողության վարքագծով իրենք ցույց են տալիս իրենց ցանկությունն՝ ամեն գնով հասնել նրան, որպեսզի մեկնաբանության կամ Սահմադրության համապատասխանության կոնտեքստում ՍԴ-ն չկարողանա օբյեկտիվորեն գնահատել և տալ հստակ դիրքորոշում։ ՍԴ-ն, իմ կարծիքով, բոլոր հիմքերն ունի, ավելին՝ պարտավոր է տալ հստակ դիրքորոշում առ այն, որ այո, Քրեական օրենսգրքի 300.1 հոդվածն այն մեկնաբանմամբ և այն մոտեցմամբ, որ ներկայացվում է  մեղադրողի կողմից, չի կարող համապատասխանել Սահմանադրությանը»,- նշել է Ա. Մինասյանը։

Նա հասարակության ակտիվ հատվածին կոչ է արել, խնդրել է  ողջամտորեն մոտենալ այս հարցին, իրավագիտության և պարզագույն տրամաբանության համադրմամբ գալ եզրակացության, որ այն գործողությունը, որն իրականացվում է  ՀՀ երկրորդ նախագահի նկատմամբ, պետք է դադարեցվի, այստեղ չկա ոչ իրավունք, ոչ  իրավաբանություն, կա ընդամենը քաղաքական, անձնական  վրեժխնդրություն, որն օր առաջ, նաև քաղաքական ներկա ղեկավարությունը  գիտակցի ու հետ կանգնի։