Ձեր վստահելի աղբյուրը

«Տպավարությունն այնպիսին է, որ կառավարությունը ոչ թե լսում է մեր բարձրացրած բողոքի, խնդիրների բովանդակությունը, այլ դիտում է  ընդամենը որպես աղմուկ»,- Ֆիրդուսի թաղամասի կառուցապատման շուրջ վերջին զարգացումների թեմայով քննարկմանն ասաց ճարտարապետ, «Երևանի ժառանգության պաշտպանության կոմիտե» նախաձեռնության անդամ Սևադա Պետրոսյանը։

Խոսելով առհասարակ երեկ փոխվարչապետ Տիգրան Ավինյանի հայտարարության մասին, որ փոփոխություններ են կատարվել «Ֆիրդուսի» թաղամասի կառուցապատման  նախագծում, նա նշեց, որ նախապես ներկայացված նախագծում ներառված չեն Հանրապետության և Տիգրան Մեծ փողոցներին կառույցները:

«Հակասություն կա ներկա ու նախկին արած հայտարարությունների հետ կապված։ Եթե այդ կառույցները ներգրաված չեն նախագծում, ուրեմն պետք է ունենան սեփականատերեր: Դրանք հուշարձաններ են։ Հետևաբար նշանակում է, որ դրանց նկատմամբ ցանկացած փոփոխություն պետք է կառավարության որոշմամբ լինի։ Այսինքն, ևս մեկ իրավական ակտ է անհրաժեշտ»,- նշեց ճարտարապետը։

Նրա խոսքով, կասկածելի է նաև այն, թե ինչու է կառավարությունը միջամտում համայնքային խնդիրներին, կառուցմանն ու պլանավորմանը։

«Անընդհատ ասում են պայմանագիր կա քաղաքապետարանի հետ,  եթե  պայմանագիր կա այս խիստ կասկածելի նախագծի համար, ի՞նչ իրավական հիմքեր կան, որ կառավարությունը հիմա որոշում է երկու փողոցների հուշարձանների հետ ցանկացած նախագիծ իրականացնել»,- հարցադրում արեց Սևադա Պետրոսյանը։

Ճարտարապետի խոսքով, այս հարցում չկա տեսանելի, շոշափելի թուղթ, թե ինչ է սպասվում այդտեղ։

«Մեր մտահագությունը որևէ կերպ չփարատվեց, այլ կծիկի քարկապին ևս մեկն ավելացավ, իրավական, քաղաքաշինական հարցերն ինչպես են լուծվելու, ընդհանրապես  որևէ մոտեցում չկա»,- ասաց Ս. Պետրոսյանը։

«Թրանսփարենսի Ինթերնեշնլ հակակոռուպցիոն կենտրոնի» գործադիր տնօրեն Սոնա Այվազյանն ասաց, որ քաղաքաշինության ոլորտում հեղափոխությունից հետո բան չի փոխվել, բացի մի քանի դեմքերից, կառավարությունն է սկսել զբաղվել դրանով՝ անհասկանալի պատճառներով դուրս թողնելով քաղաքապետարանին, ամենակարևորը՝ նույն կառուցապատողներն են։

«Այն կոռումպացված գործընթացները, որոնք հեղափոխությունից առաջ էին, նոր կառավարությունը ճանաչում է դա, փոխանակ քաղաքական գնահատակ տա, ասի՝ այլևս սա չի կրկվելու,  առհասարակ այդ նախագծերը վերանայվեն, ըստ էության, ընդունում է  դա, հովանավորում է, առաջ է մղում։ 

Իհարկե, լավ է, որ եղավ արձագանք, բայց անհանգստացնում է այն, որ փոխանակ փոխվարչապետը, որն, ըստ էության, այս ներդրումային ծրագրի պատասխանատուն է, վերանայի այն՝ հաշվի առնելով մտահոգությունները կապված կոռուպցիայի հետ, արդյոք այն նախագիծն է, որ պետք է իրականացվի, արդյոք չի անհանգստացանում, որ գալով իշխանության հիմնականում կոռուպցիայի դեմ պայքարի օրակարգով, այս պահին, ըստ էության, հովանավորում է, առաջ է մղում կոռումպացված, կոռումպացված անձանց ներգրավածությամբ ինչ-որ ծրագիր»,- նշեց Ս. Այվազյանը։

Նրա խոսքով, իրենց, ըստ էության, առաջարկում են գործարք. «Մեզ առաջարկում են՝ հաշվի առնելով ձեր մշակութային ճաշակները, 2-3-րդ հարկերը կտանք թանգարանների համար՝ բավարարելու ձեր մշակութային ճաշակներն, ու դուք այլևս ձայն չհանեք։ Կարծում եմ՝ վիրավորական է։ Ըստ էության, գործարք է առաջարկում՝ դուք լռեք, ձեզ կտանք 2-3 հարկերը մշակութային նպատակով։ Սա շատ լուջ խնդիր է»։

«Երևանի ժառանգության պաշտպանության կոմիտե» նախաձեռնության անդամ  Իզաբելլա Սարգսյանը  ներկայացրեց իրենց կոնկրետ պահանջները՝ անհապաղ դադարեցնել թաղամասում ցանկացած տեսակի աշխատանքներ՝ ելնելով օրինակության պահանջից, պատասխանատվության ենթարկել  պետական հաշվառման  վերցրած 19-րդ դարի վերջով ու 20-րդ դարի սկզբով թվագրվող  շենքը քանդելու համար, հրապարկել Ֆիրդուսի կառուցապատման հետ կապված բոլոր փաստաթղթերը, հանրությունը հասական, թե ինչի հիման վրա է տեղի ունենում այս գործընթացը, կազմել  նոր նախագիծ՝ մրցույթով։