Ձեր վստահելի աղբյուրը

ԲՀԿ առաջնորդ Գագիկ Ծառուկյանը եկավ Երևանի ընդհանուր իրավասության դատարանի Շենգավիթ նստավայր։ Այնտեղ քիչ անց հրապարակվելու է դատարանի որոշումը՝ Գ. Ծառուկյանին կալանավորելու միջնորդության վերաբերյալ։

Նա լրագրողների հետ զրույցում կրկնեց, որ  նախկինում ինչ ասել է, ճիշտ է ասել, ներկայացրել է երկրի  վիճակը։

«Մինչև հիմա ոչ մի հիմնավորում չկա իմ վրա։ Քաղաքական պատվեր է, հիմնական խնդիրը քաղաքական է»,- ասաց նա։

Գ.Ծառուկյանը նաև նշեց, որ  այլ քաղաքական ուժերի հետ քննարկումներ են ընթանում, դեռ որևէ փաստաթուղթ ստորագրված չէ։

Նշենք, որ դատարանի  շրջակայքում ոստիկանական ուժեր են հավաքված։ Դատարանի  բակում են նաև ԲՀԿ-ական պատգամավորներ։ 

Հունիսի 16-ին ԱԺ «Իմ քայլը» խմբակցության 87 պատգամավորներ փակ գաղտնի քվեարկությամբ նախ զրկել էին Գ.Ծառուկյանին անձեռնմխելիությունից, ապա համաձայնություն տվել նրան ազատությունից զրկելու հարցին։  Ազգային ժողովում ՀՀ գլխավոր դատախազ Արթուր Դավթյանը հայտնել էր, որ քրեական գործով ձեռք բերված ապացույցների համակցությունը բավարար հիմք է տալիս ԱԺ պատգամավոր Գագիկ Ծառուկյանին մեղադրանք առաջադրելու ԱԺ 2017 թվականի ապրիլի 2-ի ընտրություններին մասնակցած «Ծառուկյան կուսակցությունների դաշինքի» և դրա կողմից առաջադրված թեկնածուի օգտին քվեարկելու համար կաշառք տալը կազմակերպելու համար։
Երևանի ընդհանուր իրավասության դատարանի Շենգավիթի նստավայրում հունիսի 17-ից քննվում էր ԲՀԿ  առաջնորդին  կալանավորելու միջնորդությունը, հունիսի 19-ին դատարանը հեռացել էր խորհրդակցական սենյակ որոշում կայացնելու։