Ձեր վստահելի աղբյուրը

«Մենք հանրաքվեի գործընթացը նախաձեռնելուց հետո անմիջապես կապի մեջ ենք եղել Եվորոպայի խորհրդի մեր գործընկերների և Վենետիկի հանձնաժողվի հետ, որպեսզի քննարկենք գործողությունների հետագա ծրագիրը»,- խորհրդարանում ասաց ՀՀ արդարադատության նախարար Ռուստամ Բադասյանը՝ անդրադանալով  «ՀՀ Սահմանադրության փոփոխությունների» նախագծին։

Նրա խոսքով, հանրաքվեի անցկացման հետ կապված խնդիրներ են առաջացել, սակայն ՀՀ-ն գործընկեր կազմակերպությունների հետ շարունակել է խորհրդակցություն անցկացնել՝ հասկանալու, թե համաճարակի շրջանում ինչ հնարավորություններ կան՝ ՍԴ շուրջ ստեղծված ճգնաժամը լուծելու համար։

«Վենետիկի հանձնաժողովը կարծիք հայտնեց՝ նշելով՝ դատավորների անփոփոխելիության սկզբունքը ԵԽ տարածքում չափազանց կարևոր երաշխիք է, և Վենետիկի հանանձնաժոովը խորհուրդ է տալիս չափազանց զգուշավորությամբ վերաբերել փոփոխություններին։ Հանձնաժողովը նաև նշել է, որ տվյալ համատեքստում փոփոխությունների ընդունման և դրանց վերջնական իրականացման միջև ընկած ժամանակահատվածը, որը կարող է տևել մինչև 20 տարի, սովորականից երկար է, և հանգեցնում է 2015 թվականի սահմանադրական փոփոխությունների իրացման խափանմանը: Նաև նշվում է, որ հանձնաժողովը առաջարկում է՝ դատավորների ցմահ պաշտոնավարման դրույթը պետք է փոխել, և նրանք պետք է պաշտոնավարեն մինչև կենսաթոշակային տարիք»,- ներկայացրեց Ռուստամ Բադասյանը։

Նրա խոսքով, իշխանություններն այժմ առաջարկում են ՍԴ դատավորների պաշտոնավարման ժամկետ՝ 12 տարի, ինչը Վենետիկի հանձնաժողովի կողմից ընդունելի է համարվել.

«Եվ այս տարբերակով ՍԴ դատավորների թարմացումը կարող ենք համարել անցումային ժամանակահատված»։

ԱԺ «Իմ քայլը» խմբակցության պատգամավոր Հերիքնազ Տիգրանյանը նշեց, որ Վենետիկի հանձնաժողովին իշխանություններն առաջադրել են երեք հարց, և բոլորի հետ կապված էլ արձագանքը եղել է դրական։

Արդարադարտության նախարարն էլ հաստատեց՝ այո, երեք հարց էր ուղղվել։ Առաջին հարցն էր՝ արդյո՞ք ԱԺ-ն իրավունք ունի չեղարկելու հանրաքվեն, որի պատասխանն էր՝ այո, միանշանակ ունի։

«Երկրորդ հարցն այն էր՝ արդյո՞ք ՍԴ կողմից Սահմանադրության փոփոխությունների նախնական սահմանադրական վերահսկողությունը, այսինքն՝ այն իրավիճակը, երբ խորհրդարանը սահմանադրական փոփոխությունների նախագիծն ուղարկում է ՍԴ, պետք է սահմանափակվի, պատասխանը միանշանակ է եղել, որ ՍԴ-ի սահմանադրական վերահսկողության շրջանակը պետք է նեղացվի և միայն անփոփոխելի հոդվածների հետ հակասության տիրույթում դիտվի։ Եվ երրորդ ու հիմնական հարցը՝ արդյոք 12 տարի պաշտոնավարած ՍԴ դատավորների լիազորությունները ենթական են դադարեցման, իսկ մնացած՝ մինչև Սահմանադրության 7-րդ գլխի ուժի մեջ մտնելը դեռևս պաշտոնավարել շարունակող դատավորների լիազորությունների ժամկետի սահմանափակումը 12 տարով ընդունելի՞ է, հանձնաժողովը նշել է՝ ընդունելի է, միաժամանակի առաջարկվել է անցումային որոշակի շրջան երեք դատավորների համար, որոնց լիազորությունների 12 տարի ժամկետն արդեն լրացել է»,- ներկայացրեց Ռուստամ Բադասյանը։