Ձեր վստահելի աղբյուրը

Panorama.am-ի խմբագրութուն զանգահարած թոշակառուն, ում խնդրանքով նրա անունը չենք հրապարակում, մեզ պատմեց կորոնավիրուսով վարակվելու և բուժում ստանալու իր պատմությունը:

Վերջինիս ներկայացրածը իրական արտացոլումն է այն իրավիճակի, որն այսօր տիրում է հանրապետությունում: Այն բնական գույներով ցույց է տալիս մեր առողջապահական գերատեսչության աշխատանքի ողջ պերճանքն ու թշվառությունը:

Թոշակառուի խոսքերով, ինքը միայնակ ապրում է Երևանի հարակից բնակավայրերից մեկում: Մի առավոտ արթնացել է դողից և նույն օրը նրա մոտ սկսել է բարձրանալ մարմնի ջերմաստիճանը: Երեք օր ջերմելուց հետո որոշել է դիմել իր բնակավայրի պոլիկլինիկա և պարզել, որ այնտեղ գրանցված չէ, քանի որ երկար տարիներ Եվրոպայում բնակվելուց հետո նոր է վերադարձել հայրենիք:

Պոլիկլինիկայից հայտնում են, որ գրանցվելու համար պետք է տուն վերադառնա և սոցիալական քարտ բերի:

Տուն վերադառնալու ճանապարհին մեր զրուցակիցը որոշել է մտնել հարակից հիվանդանոց և ռենտգեն հետազոտության ենթարկվել: Հիվանդանոցի բժիշկը ախտորոշել է թոքաբորբի օջախ և հակաբիոտիկներով բուժման կուրս նշանակել: 5 օր բուժման կուրսը ստանալուց հետո էլ թոշակառուի ջերմությունը չի իջել և որպեսզի կարողանա կորոնավիրուսի թեստ հանձնել, գրանցվել է պոլիկլինիկայում:

Այստեղի բժիշկն էլ իր հերթին ևս 5 օրվա հակաբիոտիկներով բուժման նոր կուրս է սահմանել՝ ասելով, որ եթե 3 օրից ջերմությունը չիջնի, նոր կթեստավորեն:

Թոշակառուն նույն օրը, արդեն հիվանդանոցում իր նախաձեռնությամբ երկրորդ անգամ է ռենտգեն հետազոտություն անցել և պարզել, որ իր մոտ արդեն երկկողմանի թոքաբորբ է ընթանում: Ուսումնասիրության արդյունքները վերջինս անմիջապես փոխանցել է պոլիկլինիկայի բժշկին, որն էլ որոշել է, որ հիվանդը պետք է թեստավորվի:

Երկկողմանի թոքաբորբով հիվանդ մեր զրուցակիցը երկու օր գնացել է պոլիկլինիկա, որպեսզի թեստավորվի և թեստեր չլինելու պատճառով տասնյակ մյուս ենթադրյալ վարակակիրների հետ միասին վերադարձել է տուն: Խմբագրություն զանգած քաղաքացին նշեց, որ երկրորդ օրն արդեն իր միջոցներով է որոշել վճարովի թեստ հանձնել: Թեստի դրական պատասխանը ստացել է այն հանձնելուց երկու օր անց, որի մասին անմիջապես տեղյակ է պահել պոլիկլինիկայի բժշկին և վերջինիս խորհրդով ինքնամեկուսացվել է:

Դրանից միայն 3 օր անց, երբ հիվանդի ջերմությունն աստիճանաբար իջնում էր, բժիշկների խումբը ժամանել է իր բնակարան և ճշտել որպիսությունը:

Մեր լսած այս պատմությունից ակնհայտ երևում է, որ կորոնավիրուսով հիվանդ թոշակառուն առնվազն մեկ շաբաթ եղել է առանց վերահսկողության: Այս դեպքում, լինելով միայնակ, վերջինս գրեթե չի շփվել այլ անձանց հետ, պահպանել է բոլոր կանխարգելիչ միջոցները, բայց ակնհայտ է, որ մեր զրուցակցի դեպքը եզակի չէ և կան բազմաթիվ վիրուսակիրներ, որոնք ջերմելով օրերով ազատ շրջում են՝ չիմանալով իրենց վարակված լինելու մասին: Այս պատկերի ֆոնին ասիմպտոմ դեպքերի մասին խոսելն ավելորդ է:

Թոշակառուի ներկայացրած պատմությունը իրական գույներով արտացոլում է հանրապետությունում կորոնավիրուսի դեմ տարվող պայքարի իրական կողմերը, որի արդյունքն է արդեն երկու տասնյակի հասնող մահերի վիճակագրությունը: