Ճարտարապետ. Բարձրահարկ բնակելի շենքերը պետք է լինեն թանկ
Երևանի ավագանու նիստում քննարկվեց և ընդունվեց «Հողամասերի նպատակային նշանակությունները փոխելու մասին» հարցը։ Դրա համաձայն, Արաբկիր վարչական համայնքի Վրացական փողոցի 16/3,16/4, 16/5 հասցեներում գտնվող հողամասերի նպատակային նշանակությունները «արդյունաբերության, ընդերքօգտագործման և այլ արտադրական նշանակության» հողերի կատեգորիայից փոխադրվում են բնակավայրերի հողերի կատեգորիա։ Կառուցվելու է 12, 14,16 հարկանի շենքեր։
Հարց հնչեց, թե ինչո՞ւ է բարձրահարկ շենքեր կառուցվում, ոչ թե ավելի ցածր, Երևանի քաղաքապետարանի աշխատակազմի քաղաքաշինական հատուկ կարգավորման ծրագրերի բաժնի պետի ժ/պ Անդրանիկ Սեդոյանը պատասխանեց. «Կարծում եմ՝ մեզ համար գերխնդիր է քաղաքի ու բնակիչների շահը, բայց նաև կան քաղաքի շահին առնչվող պետական շահեր՝ տնտեսական զարգացման, ներդրումների խթանման անհրաժեշտություն, եթե տվյալ դեպքում նորմատիվ իրավական ակտերը թույլատրում են այդ հատվածում լինեն նման կառուցապատում։
Իհարկե, բոլորիս համար ցանկալի կլինի տվյալ տարածքներում լինեն կանաչ գոտիներ, 4-5 հարկանի բնակելի շենքեր։ Բայց միշտ հիշատակում եմ փաստը, որ որոշում կայացնում ենք ոչ միայն բնակիչների, քաղաքի, այլ համալիր մոտեցման արդյունքների ամփոփմամբ։ Կառուցապատողի հետ միշտ փորձում ենք գտնել այն ոսկե միջին տարբերակը, որը ձեռնտու կլինի համայնքին, բնակչներին, կառուցապատողին։ Այս կոնտեքստում է որոշում կայացվում»։
Հարակից զեկուցող քաղաքապետարանի քաղաքաշինության և հողօգտագործման մշտական հանձնաժողովի նախագահ, ճարտարապետ Արսեն Կարապետյանն ասաց, որ իրավական ակտի վերաբերյալ տվել են դրական եզրակացության, բայց սույն որոշման վերաբերյալ հանձնաժողովը արտահայտում է հատուկ կարծիք.
«Ուսումնասիրելով կառուցապատման էսքիզային նախագծի նախնական տարբերակը՝ հանձնաժողովը գտնում է, որ նախատեսվող կառուցապատման խտությունն ու հարկայնությունը համաչափ չեն քննարկվող թաղամասի ձևավորված քաղաքաշինական միջավայրին, առաջարկում են վերանայել՝ նվազեցնելով հարկայնությունն ու խտությունը»։
Հանձնաժողովի կարծիքը գրավոր ուղարկվել է Երևանի գլխավոր ճարտարապետ Արթուր Մեսչյանին։
Արսեն Կարապետյանն իր ելույթում ասաց, որ ամեն քաղաքում պետք է կառուցվեն բնակելի բարձրահարկեր, սակայն ճիշտ տեղում։ Ըստ նրա, ամենակարևորը պետք է մի քիչ հեռուն նայել։
«Բարձրահարկ բնակելի շենքերը, իմ կարծիքով, որի շուրջ ուզում եմ անընդհատ բանավեճ սկսվի, որը չի ստացվում, պետք է լինեն թանկ։ Չի կարող էժան կամ միջին գնի բնակարան լինել բարձրահարկում։ Կառուցապատողն այսօր x գումարով կկառուցի, xx-ով կվաճառի, իսկ արդեն շենքի սպասարկումը, վերելակը, ավտոկայանատեղին մնում է քաղաքապատերանի, քաղաքի վզին, ներողություն արտահայտությանս համար։ Զարգացած քաղաքներում բարձրահարկ շենքերը հատուկ թանկ բնակարաններն են, որոնց բնակիչները վճարում են նաև ամորտիզացիոն ծախսեր ու այդ բոլոր հարցերը լուծվում են»,- ասաց ճարտարապետը։
Նրա խոսքով, հիմա Վրացական փողոցում կառուցում են 400 բնակարան, այսինքն՝ 1200-1400 հոգի նոր բնակիչներ, 350 մեքենայի կայանատեղի. «Գտնում եմ՝ սա ուղղակի թույլատրելի չէ, նույնիսկ լսման կարիք չկա հարևանների հետ։ Իրոք, քաղաքի ապագայի համար մեծ խնդիր է, որևէ օգուտ բացի հարկերից, մարդկանց՝ 3 տարի աշխատանքից, չկա։ Կարելի է կառուցել ավելի ցածր, ավելի որակյալ բնակարաններ, թանկ ծախել։ Կոմիտասն այսօր Երևանի կենտրոններից է»։
Նա նշեց, որ դեմ է քվեարկելու, քանի որ, վախենում է, այս կառուցապատումը կանգնեցնելու այլ լծակ չունեն։
Երևանի քաղաքապետ Հայկ Մարությանն առաջարկեց խմբակցություններին դիմել քաղաքաշինության կոմիտեին՝ նշելով, որ կոնկրետ հարցերում խնդիրներ ունեն, որոնց պետք է լուծումներ տրվեն։
«Օրենսդրական դաշտով եկեք անենք, մի ճակատով հանդես եկեք, դիմեք քաղաքաշինության կոմիտեին, կառավարությանը, ասեք չենք ընդունում այս հարցերը, մինչև խնդիրները չլուծվեն, ստոպ է լինելու։ Երկու կողմն էլ ճիշտ է. այս կողմը՝ կանաչ, տարածք, շարժը քիչ լինի, մյուս կողմից՝ ներդրումներ, աշխատատեղեր, տնտեսություն։ Այդ երկուսի ուղիղ մեջտեղում մենք ենք։ Գնացեք ու ազնիվ ասեք, կառավարության հետ տարեք այդ խոսակցությունը»,- ասաց Հայկ Մարությանը։
Նա նշեց, որ ավագանու անդամները դեմ քվեարկեն, երբ հարցնեն՝ ինչու, գնան ու պատասխանեն։
«Այդպես արեք, ուզում եմ դեմ քվեարկեք, որ այդ հարցերը բարձրաձայնեք»,- ընդգծեց Հայկ Մարությանը։
Որոշումն ընդունվեց 20 կողմ, 11 դեմ, 6 ձեռնպահ հարաբերությամբ։
Հայկ Մարությանն ասաց. «11 դեմ կա, աշխատանք կատարեք, գնացեք ավագանիների տուն, սուրճ խմեք հետները, հետ համոզեք, 11-ը սարքեք 20, որ որոշումները չանցնեն ու առաջ գնան»։
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
