Ձեր վստահելի աղբյուրը

«Մենք ՍԴ-ում բարձրաձայնելու ենք որոշ խախտումների մասին»,- այսօր խորհրդարանում հրավիրված մամուլի ասուլիսի ընթացքում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը։

Նա հիշեցրեց, որ խորհրդարանը մեկ և կես ժամում առաջին ընթերցմամբ  սահմանադրական փոփոխությունների նախագիծն ընդունելուց հետո, Սահմանադրությունը խախտելով այն չի ուղարկել ՍԴ, ապա կրկին նույնքան ժամանակահատվածում երկրորդ ընթերցմամբ ընդունել է օրենքը։

Բացի այդ, ըստ Մարուքյանի, իշխանությունը խախտել է նաև ԱԺ «Կանոնակարգ» օրենքը, և ՀՀ նախագահին զրկել է  Սահմանադրական փոփոխությունների ընդունված նախագիծը  ստորագրելու իրավունքից։

ԱԺ «Լուսավոր Հայաստան» խմբակցության պատգամավոր Տարոն Սիմոնյանը նշեց, որ միջին իրավաբանական գիտելիքներ ունեցող յուրաքանչյուր քաղաքացու համար պարզ է, որ իշխանությունների գործողությունները կատարվել են ՝ խախտելով ՀՀ Սահմանադրությունը։

«Առաջին խախտումը, որի մասին բազմիցս նշվել է, այն է, որ երբ սահմանադրական փոփոխությունները ընդունվում են ԱԺ-ի կողմից, մինչև երկրորդ ընթերցումն անպայմանորեն պետք է ուղարկվեն ՍԴ՝ եզրակացության։ Սա կարգավորվում է ՀՀ Սահմանադրությամբ և ԱԺ «Կանոնակարգ» օրենքով։ Երկրորդ խախտումն այն է, որ ԱԺ «Կանոնակարրգ» օրենքի փոփոխություններով՝ ՀՀ նախագահին զրկել են սահմանադրական փոփոխությունները ստորագրելու և հրապարակելու իրավունքից։ ԱԺ մեկ խմբակցությունն իր որոշմամբ մեկ այլ սահմանադրական մարմնի լիազորություն է ի չիք դարձրել»,- ասաց Տարոն Սիմոնյանը։

Նրա խոսքով, վերոնշյալ խախտումների հիման վրա ՀՀ Սահմանադրությունը հնարավորություն է տալիս պատգամավորների 1/5-ին դիմել ՍԴ։ Պատգամավորը տեղեկացրեց, որ մի քանի հիմքեր կան ՍԴ դիմելու համար։

«Հիմքերից մեկը խորհրդարանի ընդունած օրենքի սահմանադրականության վիճարկումն է։ Այս հիմքով վիճարկվելու են ԱԺ «Կանոնակարգ» օրենքի համապատասխան փոփոխությունները, որոնցով ՀՀ նախագահին զրկել են իր լիազորություններից։ Մեկ այլ հիմքը, որ էլի սահմանված է ՀՀ Սահմանադրությամբ և ՍԴ մասին օրենքով, սահմանադրական մարմինների լիազորությունների շուրջ առաջացած վեճն է։ Այսինքն՝ հարց է առաջանում՝ արդյո՞ք ԱԺ իրավունք ուներ չդիմելու ՍԴ, թե՞՝ ոչ։ Այս հարցերի պատասխանը տվող միակ մարմինը ՍԴ-ն է։ Հետևաբար այս պահանջների հիման վրա մենք պետք է առաջ գնանք»,- ներկայացրեց պատգամավորը։

Նա նշեց, որ հանրությունը նաև հարց էր բարձրացնում, որ պետք է սահմանադրական փոփոխությունների սահմանադրականությունը վիճարկվի ՍԴ-ում, մինչդեռ, ըստ Տարոն Սիմոնյանի, Սահմանադրության 168-րդ հոդվածում նշված դրույթը չի կարող պատգամավորների 1/5-ի ձայներով վիճարկվել ՍԴ-ում.

«Հիմա այս դրույթները մեր գործընկերները անտեսել են, և ես հիմքեր ունեմ մտածելու, որ իրենք կա՛մ գիտակցված կեղծավորությամբ խեղաթյուրում են սահմանադրական պահանջները, կամ էլ՝ ամբողջ հասարակության մեջ ազնիվ տգիտության քարոզ են իրականացնում»։

Էդմոն Մարուքյանն էլ ասաց, որ իրենք ՍԴ ներկայացվելիք դիմումի վրա կաշխատեն, և հենց ՀՀ երկրորդ նախագահ Ռոբերտ Քոչարյանի գործով ՍԴ նիստը տեղի ունենա, ՍԴ կմուտքագրվի վերոնշյալ խնդիրների հետ կապված դիմումը։

«Այսինքն՝ մոտավորապես օրերի խնդիր է այստեղ։ Այս առումով ԼՀԿ-ն այն մոտեցումն ունի, որ գործողություններն իրականացվելու են միմիայն իրավական տիրույթում։ Եվ դա անում ենք այն պարզ պատճառով, որ որևէ ձևով չմիջամտենք այս գործընթացին։ Հենց այն օրը, երբ խորհրդարանը քննարկում էր սահմանադրական փոփոխությունների նախագիծը, ՍԴ-ն աշխատակարգային նիստ է արել ու որոշել, որ երկրորդ նախագահին առնչվող գործն իրենք կքննեն հուլիսի 7-ին։ Այսինքն՝ կասեցված գործը հանել են և նշանակել օր»,- նշեց Էդմոն Մարուքյանը։