Ձեր վստահելի աղբյուրը

Երևանի ավագանին ընդունեց Երևանի Նուբարաշեն վարչական շրջանի տարածքի գոտիավորման նախագծի մշակման քաղաքաշինական առաջադրանքը հաստատելու մասին որոշումը։ Զեկուցեց «Երևան նախագիծ» ՓԲԸ տնօրեն Սուրեն Օհանյանը։

Երևան քաղաքի ավագանու 2019 թվականի դեկտեմբերի որոշմամբ հաստատված Երևանի զարգացման 2019-2023 թվականների ծրագրով, Երևան քաղաքի ավագանու 2019 թվականի որոշումներով նախատեսված է Երևանի Նուբարաշեն վարչական շրջանի գոտիավորման նախագծի մշակումը: Նախագծի նպատակն է մշակել Երևանի Նուբարաշեն վարչական շրջանի գոտիավորման նախագիծը (այսուհետև` գոտիավորման նախագիծ), որը քաղաքաշինական ծրագրային փաստաթուղթ է և որով կսահմանվեն նշված տարածքների փաստացի և հեռանկարային օգտագործման ու կառուցապատման նկատմամբ պարտադիր պահանջները` վարչական շրջանի ամբողջ տարածքում կենսագործունեության բարենպաստ միջավայրի ձևավորման նպատակով:

Հարակից զեկուցող քաղաքապետարանի քաղաքաշինության և  հողօգտագործման մշտական հանձնաժողովի նախագահ, ճարտարապետ Արսեն Կարապետյանն ասաց, որ հանձնաժողովը տվել է դրական եզրակացություն մեկ ձայնի տարբերություն, միաժամանակ հավելեց, որ անձամբ դեմ էր, բայց չի կարողացել համոզել իր կարծիքը։

«Գտնում եմ, որ այս առաջադրանքը բացարձակ չի արտացոլում այն  նպատակները, որոնք մենք ուզում ենք դնել։ Բազմաթիվ գոտիավորման նախագծեր ենք արել մինչև հիմա, որևէ մեկն օգտագործելի  չէ նոր պայմաններում։ Այս առաջադրանքը ստանդարտ տեսք ունի, կազմվել է 1998 թվականին ընդունված Քաղաքաշինության մասին օրենքով, բաղակացած է մի քանի ընդհանուր կետերից։

Խորապես կասկածում եմ, որ  այսօր որևէ օպերատոր, գերատեսչություն կարող է  տրամադրել այն նյութերը, որոնք ի վերջո կդառնան միասնական գծագիր, որը կամփոփի ինժեներական ենթակառուցվածքները և այն կազմակերպությունը, որը  տենդերով կհաղթի այս գոտիավորման նախագիծն իրականացնելը, որևէ երաշխիք չկա, որ այս գործը կանի։
Վերջում գրված է՝ նախագիծը ներկայացնել թղթային տարբերակով 3 օրինակից և էլեկտրոնային կրիչով։ Նշանակում է,  որ մեռած փաստաթուղթ է, ինչ որ նկարչություն է արված, որը ֆիքսված է վերջնականորեն և փոփոխական չէ։ Բայց նման նախագծերը պետք է ժամանակի ընթացքում փոփոխվելու, վերամշակվելու հնարավորություն ունենան»,- ասաց ճարտարապետը։

Ա.Կարապետյանն ընդգծեց, որ հերթական անգամ ֆինանսավորելու են մի աշխատանք, որը մեծ հաշվով ոչ քաղաքապետարանին, որ ներդրողներին, ոչ բնակիչներին չի օգնելու, այլ մի թուղթ է լինելու՝ գեղեցիկ պատկերներով։

Նրա խոսքով, նաև սխալ է այն, որ հանրությանը պետք է ներկայացվի արդեն նախագիծը, մինչդեռ այն կազմելու ընթացքում պետք էր  հանրային լսումներ լինեն։

«Կարծում եմ՝  Գորդյան հանգույց է, որի ծայրերը չեն երևում։ Առաջարկում եմ կտրել այդ հանգույցը, թող դա բերի ինչ որ մի տուպիկային վիճակի, որից կարելի է առաջ շարժվել։ Տարիներ շարունակ նույն բանն անել, անիմաստ գումար վատնել, անիմաստ աշխատանք կատարել, չունենալ արդյունք, իմաստ չունի»,- ասաց ճարտարապետը։

Ա. Կարապետյանի խոսքով, օրենսդրական փոփոխություններ են պետք, ինչը կառավարության դաշտում է։

Երևանի քաղաքապետ Հայկ Մարությանն առաջարկեց միգուցե ավագանու կողմից աշխատանքային խումբ կազմվի, սկսեն կառավարության հետ աշխատանք, որպեսզի այս պրոցեսն առաջ գնա, որովհետև չեն կարող օրենքի խախտումով այլ բան անել։

Արսեն Կարապետյանն արձագանքեց, որ իրենք կարող են մերժել մի բան, որ իրենց պետք չէ։

Նրա խոսքով, կարող է գոտիավորման նախագծեր նշել, որոնք ընդհանրապես կապ չունեն իրականության հետ։

«Գոյություն ունեն նաև քաղաքաշինական նորմեր, որոնք պահպանելով կարող ենք ինչ որ լուծումների գալ։ Վերջին հաշվով  կարող ենք ազատ թողել քաղաքը, ով ինչ ուզում է,  կառուցի, եթե չի խանգարում  հարևաններին, Աթենքի նման քաղաք կունենանք։  Եթե դա է մեր ճանապարհը, շատ ուրախ բան կստացվի»,- ասաց Ա. Կարապետյանը։

Նախագիծն ընդունվեց 35 կողմ, 3 դեմ, 6 ձեռնպահ ձայների հարաբերակցությամբ։