Ձեր վստահելի աղբյուրը

«Պետական պարտք-ՀՆԱ հարաբերակցությունն այս տարվա վերջին սպասվում է 50-iց 60 տոկոսի միջակայքում»,- խորհրդարանում հայտնեց ֆինանսների նախարար Ատոմ Ջանջուղազյանը, երբ ներկայացնում էր Հայաստանի 2019 թվականի պետական բյուջեի կատարման տարեկան հաշվետվությունը:

Նրա խոսքով, եթե այնպես ստացվի, որ պարտքի թույլատրելի շեմը փոխվի, ապա պետք է ներկայացվի այն ռազմավարությունը, որի շրջանակում պետք է պարտքը կայունացվի:

Ֆինանսների նախարարն այն համոզման է, որ պետք չէ սկսել բանակցել պարտքի սպասարկումը հետաձգելու վերաբերյալ:

«Մենք չենք կարծում, որ այն լավագույն ճանապարհն է, որովհետև կա վարկանիշի հարց, կա պարտք ներգրավելու հնարավորության հարց»,- հիմնավորեց Ատոմ Ջանջուղազյանը:

Վերջինիս խոսքով, պետությունը 2020 թվականի դժվարություններին առերեսվել է պարտք վերցնելու համար անհրաժեշտ համեմատաբար զգալի պաշարով, որը հետևանք է նրան, որ պետությունը «որևէ րոպե» չի ուշացրել որևէ վճարում՝ ինչպես ներքին շուկայում ներդրողների հանդեպ պարտավորությունների կատարման տեսանկյունից, այնպես էլ արտաքին:

Ատոմ Ջանջուղազյանը հայտնեց, որ Համաշխարհային բանկն առանց Հայաստանի խնդրանքի վարկի մարման արտոնություններ է սահմանել այս ֆինանսական տարվա՝ 2020 թվականի հուլիսի 1-ից 2021թ. հուլիսի 1-ի համար:

Տեղեկացնելով, որ Համաշխարհային բանկին Հայաստանի պարտքը մոտավորապես 980 մլն դոլարի համարժեք գումար է՝ ֆինանսների նախարարը հայտնեց, որ այդ կառույցը որոշել է այս տարի արտոնություն տալ և պարտավորության սպասարկման տոկոսադրուքը նվազեցնել 1.7 տոկոսով, ինչը գումարային առումով 13 մլն դոլար կկազմի: