Ձեր վստահելի աղբյուրը

«Եթե մեր պարտքի տոկոսը 2019 թվականին իջեցրել էինք 50 %, ապա վարկի վերցնելուց հետո ունենալու ենք կառավարության պարտքի աճ մինչև 59 տոկոս»,- ԱԺ Ֆինանսավարկային և բյուջետային հարցերի մշտական հանձնաժողովում հայտարարեց Ֆինանսների նախարարի տեղակալ Արմեն Հայրապետյանը՝  ներկայացնելով Հայաստանի  և Արժույթի միջազգային հիմնադրամի միջև 2020 թվականի մայիսի 23-ին և հունիսի 1-ին ստորագրված «Պահուստային ծրագրի միջոցների օգտագործման և լրացուցիչ փոխառու միջոցների ներգավման մասին» նամակ-համաձայնագիրը վավերացնելու մասին հարցը:

Ֆինանսների փոխնախարարը հայտնեց, որ Հայաստանը հիմնադրամից 105 մլն ԱՄՆ դոլար վերցնելու հնարավորություն է ունեցել, որը չի օգտագործվել, բացի այդ մեր երկիրը բանակցելու միջոցով հասել է նրան, որ հիմնադրամը ևս 175 մլն ԱՄՆ դոլար կտրամադրի որպեսզի  պետության մակրոֆիսկալ հիմքերը կայունացվեն:

«Արդյունքում մենք ունենք 280 մլն դոլարի հասանելի ռեսուրս Արժույթի միջազգային հիմնադրամից»,- հայտնեց  Արմեն Հայրապետյանը և տեղեկացրեց, որ աշնանը ևս 35 մլն դոլար ստանալու հնարավորություն կա: Փոխնախարարի խոսքով, Արժույթի միջազգային հիմնադրամի  կողմից տրամադրվող  բյուջետային աջակցության վարկը տրամադրվելու է 5 տարի ժամկետով  և 1.3% տոկոսադրուքով, արտոնյալ ժամկետը 3.25 տարի է լինելու:

Փոխնախարարը հայտնեց, որ կառավարությունն այդ քայլին գնում է համաճարակի պատճառով արտաքին և ներքին շոկերին դիմակայելու ամար:

«Ազգային ժողովը հավանություն է տվել, որ մենք պետք է ունենանք բյուջեի դեֆիցիտի ավելի բարձր սցենար,  քան պլանավորված է՝ ՀՆԱ-ի 2.3 փոխարեն ունենալու ենք 5 տոկոս դեֆիցիտ»,- հայտնեց Հայրապետյանը և հավելեց, որ եթե պետությունը պլանավորել էր 7.1 տրիլիոնի ՀՆԱ, ապա համաճարակային զարգացումների ներքո և բյուջեի հիմքում դրված սցենարի պայմաններում կապահովվի 6.5 տրիլիոն դրամի ՀՆԱ-ի ցուցանիշ:

Նկատելով, որ  կառավարությունը մի կողմից ունի հարկային եկամուտների նվազում, մյուս կողմից համավարակին հակազդելու համար միջոցներ է ներդրել՝ ֆինանսների փոխնախարարը շեշտեց, որ այդ ամենը բերել է 250-260 մլդ դրամի բյուջետային միջոցների կարիքի: Այն փակելու համար կառավարությունը ակնկալում է 50 մլրդ դրամի ներքին միջոցներ և Արժույթի միջազգային հիմնադրամից տրամադրվող 315 մլն դոլարը, որը մոտ 160 մլրդ դրամ է կազմում: Ֆինանսների նախարարի տեղակալ Արմեն Հայրապետյանը հայտնեց, որ այդ միջոցների ներգրավումից հետո էլ կմնա որոշակի ճեղք, որը դեռ որոշված չէ թե որտեղից պետք է փակվի:

Հանձնաժողովը քվեարկությամբ հաստատեց նամակ- համաձայնագիրը: