Ձեր վստահելի աղբյուրը

«Խայտառակություն է։ Արտակարգ դրության պայմաններում գույքահարկի բարձրացման օրինագիծ քննարկելը չգիտեմ՝ ում մտքով կարող է անցնել, որ տնտեսական թիմի և որ տրամաբանության մեջ կարող է տեղավորվել»,- խորհրդարանում ասաց ԱԺ «Լուսավոր Հայաստան» խմբակցության պատգամավոր Մանե Թանդիլյանը՝ անդրադառնալով «ՀՀ հարկային օրենսգրքում փոփոխություններ և լրացումներ» կատարելու մասին օրենքի նախագծին։

Նրա խոսքով, արտահերթ նիստով նման հարց քննարկելը ևս անհասկանալի է, դա նշանակում է, որ հարց տալու հնարավորություն չի տրվում, քննարկման և ասելիքն արտահայտելու ժամանակ չկա։

«Սա անթույլատրելի է, և իհարկե, կառավարության դանդաղկոտության արդյունք է։ Մինչև հունիսի 30 հասցրիք նախագիծը, այն էլ վատթարացնող դրույթ բերեցիք։ Օրենքի նախագիծն այնքան չաշխատված է, որ այս գույքահարկի հիմնական շահառուի՝ Երևանի համայնքապետարանի կարծիքը չկա։ Իսկ ինչո՞ւ է դա կարևոր, քանի որ Երևանի քաղաքպետարանը 65% կատարողական ունի՝ քաղաքացիների հարկերը հավաքելու արդյունքում։ Սկի հավաքած գումարը չեն կարողանում ծախսել։ Կարո՞ղ է նախագիծը քննարկման առարկա դարձնեիք ամենախոշոր շահառուի հետ։ Ձեզ հետաքրքիր չի ոչ ոքի կարծիքը»,- նշեց Մ. Թանդիլյանը։

Պատգամավորը տեղեկացրեց, որ ըստ նախագծի, գույքահարկը բարձրանում է 3-4 անգամ, քանի որ մոտարկվում է շուկայական արժեքին, և աներկբա է՝ չկա որևէ գույքային միավոր, որի բացարձակ արժեքով գույքահարկը չի ավելանում։

«Մոտավորապես 580 հազար նոր գույքային միավոր դառնում է հարկատու։ Ասում եք՝ տեսանելի գույքն ենք հարկում, այդ 3 միլիոնանոց գո՞ւյքն է տեսանելի հարստություն։ Որտե՞ղ է տրամաբանությունը, եթե որևէ սոցիալական բաղադրիչ հաշվի չեք առել։ Իսպառ վերացրել եք սոցիալական բաղադրիչը։ Ասում եք՝ պրոգրեսային եկամտային հարկ էին վճարում, հիմա դա մի քիչ նվազել է։ Վստա՞հ եք, որ այդ  580 հազար դեպքերում էլ բոլորը եկամտահարկ վճարող էին։ Այո, 200 միլիոնից ավելի արժեք ունեցող գույքը պետք է հարկվի, բայց դրա փոխարեն էլ պիտի սահմանվի չհարկվող շեմ։ Եվ հաստատ Ձեր եկամուտները դրանից չեն պակասի։ Իսկ միջին խավի համար էլ պետք է հարկման տոկոսը առնվազն երկու անգամ նվազեցեք, որպեսզի դա իրենց վրա ազդեցություն չունենա»,- շեշտեց  Մանե Թանդիլյան։

Նա համոզմունք հայտնեց՝ խորհրդարանը չպետք  թույլ տա, որ խոցելի խավերը հարկման դաշտ մտնեն։

«Առանց սոցիալական կոմպոնենտների ամբողջությամբ հարկում կիրառելն անընդունելի է»,- եզրափակեց խոսքը պատգամավորը։

Արձագանքելով  Մ. Թանդիլյանին՝ ՀՀ ֆինանսների նախարարի տեղակալ Արման Պողոսյանը նշեց՝ ի՞նչ գիտեք՝  համայնքապետարանի կարծիքը ունենք թե չունենք։

«Ի գիտություն ասեմ, որ ունենք։ Դուք խայտառակություն եք որակում նախագիծը և նշում եք, որ կառավարությունը դանդաղկոտ է, երբ դեռ 20 օր առաջ ենք նախագիծն ուղարկել խորհրդարան։  Բացի այդ, 509 հազար գույքային միավորի համար 2021 թվականին հարկային բեռ է նվազում։ Հիմա դուք նորմա՞լ եք համարում, որ Կապանում 132 քմ բնակարանի համար հարկ չի վճարվում, իսկ Գավառում օրինակ, վճարվում է  440 դրամ, Հերացի փողոցի վրա էլ 9000 դրամ։ Ու սա այն դեպքում, երբ 20 տարվա վաղեմության ռուսական արտադրության ավտոմեքենայի հարկը 3 անգամ ավելի բարձր է»,- եզրափակեց խոսքը ֆինանսների փոխնախարարը։