Կառավարությունն առաջարկում է գույքահարկի շեմը բարձրացնել
«Գույքային հարկերի վերանայման անհրաժեշտություն է առաջացել»,- խորհրդարանում ասաց ֆինանսների նախարարի տեղակալ Արման Պողոսյանը՝ ներկայացնելով «ՀՀ հարկային օրենսգրքում» փոփոխություններ և լրացումներ կատարելու մասին օրենքի նախագիծն առաջին ընթերցմամբ ընդունելու մասին հարցը։
Նրա խոսքով, տեսանելի հարստությունը կամ ունեցվածքը պետք է համարժեք հարկվեն, և առհասարակ, գույքային միավորներն իրենց շուկայական արժեքին մոտարկված արժեքի հիման վրա պետք է հարկվեն։
«Այս նախագիծը կյանքի կոչելուն խանգարում է այն, որ գույքային հարկերի հարկման բազան, որը կադաստրային արժեքով է կազմված, էականորեն շեղված է այդ գույքերի շուկայական արժեքներից։ Ընդ որում, սա ճշմարիտ է և՛ հողի պարագայում, և՛ բոլոր տեսակի շենք-շինությունների պարագայում։ Հարկային օրենսգրքով ամրագրված է, որ 2021 թվականից գույքային միավորների կադաստրային արժեքների հաշվարկման մեթոդաբանությունը կվերանայվի և կմոտարկվի շուկայական արժեքներին, և այդ պահից կվերանայվի նաև հարկման բազան։ Այդ օրենքն ընդունվել է 2019-ի նոյեմբերին, և ուժի մեջ է մտնելու 2021 թվականի հունվարի 1-ից»,- տեղեկացրեց նա։
Արման Պողոսյանի խոսքով, ստեղծված իրավիճակը հանգեցրել է նրան, որ գործնականում ՀՀ-ում գույքային հարկերի ներուժը, որպես այդպիսին, գրեթե չի օգտագործվում։
«Բավական է թերևս նշել այն, որ մեզանում անշարժ գույքի միավորներից հավաքագրվող գույքային հարկերի կշիռը ՀՆԱ ներքին կառուցվածքում կազմում է ընդամենը 0.2%, այն պարագայում, երբ միևնույն տնտեսական միության մեջ գտնվող երկրոների ցուցանիշը բազմապատիկ անգամներով բարձր է։ Օրինակ, Վրաստանում այն կազմում է 1.1%, ՌԴ-ում՝ 1.2%»,- նշեց նա։
Ըստ ֆինանսների փոխնախարարի, անշարժ գույքի միավորն ավելի տեսանելի և շոշափելի հարկման օբյեկտ է, իսկ նրա բազան ավելի չափելի է, և այս պարագայում հարկումից խուսափելու հնարավորությունը էականորեն սահմանափակվում է, եթե ոչ՝ բացառվում։
«Նախագծով առաջարկում ենք միավորել հողի և դրա բարելավումների (շենք-շինություն) հարկման բազան։ Հիմա հողի համար առանձին բազա և առանձին դրույքաչափեր են սահմանված, իսկ բարելավումների համար՝ այլ։ Արդյունքում՝ այս երկու թվերը գումարվում են՝ որպես միասնական հարկ։ Մյուս փոփոխությունը վերաբերում է սանդղակավորման վերանայմանը։ Փոփոխություններից հատկանշական է այն, որ առաջարկվում է վերացնել չհարկվող շեմը, և համակարգի ներդրումնը սահուն ներդնելու համար առաջարկվում է չորս տարի հատկացնել անցմանը, որպեսզի հարկային շեմքը կտրուկ չբարձրանա»,- նշեց նա։
ԱԺ «Իմ քայլը» խմբակցության պատգամավոր Վարազդատ Կարապետյանը նշեց, որ հարստությունից ստացված եկամուտները պետք է ավելի շատ հարկվեն, քան աշխատանքից ստացվող եկամուտները։
«Հնարավո՞ր է, որ մենք տարբերակված մոտեցում ունենանք 100 միլիոնից ավելի գույքի հարկման համար»,-հարցրեց պատգամավորը։
Պատասխանելով պատգամավորի հարցին՝ ֆինանսների փոխնախարարն ասաց՝ ներկայացված նախագծի սկզբունքը եղել է այն, որ պետք է ձեռնպահ մնալ դրույքաչափերի բարձրացումից. «Մենք կա՛մ պահպանել ենք դրույքաչափերը, կա՛մ՝ նվազեցրել։ Մեր առաջարկն այդպիսին է՝ հաշվի առնելով այն, որ ունենք ընդունված օրենք, որը վերանայում է հարկման բազաները, և դրանք մոտարկվելու են գույքի շուկայական արժեքին։ Այսինքն՝ խնդիր չկա լրացուցիչ հարկային դրույքաչափի ներդրման»,- եզրափակեց խոսքը նա։
Հարակից հրապարակումներ`
Լրահոս
Տեսանյութեր
Իմ կարծիքով, շատ տգեղ բան եք անում. Եղոյանը՝ Լուսինե Հակոբյանին
