Ձեր վստահելի աղբյուրը

«Ակնհայտ է, որ վերաբերվում է։ Սահմանադրության փոփոխության տեքստի ցանկացած եղանակով մեկնաբանումը բերում է  միանշանակ մեկ եզրահանգման, որ տարածվում է»,- լրագրողների հետ զրույցում ասաց արդարադատության նախարար Ռուստամ Բադասյանը՝ պատասխանելով հարցին, թե Սահմանադրական դատարանի դատավոր Ալվինա Գյուլումյանի համոզմամբ,  ԱԺ  ընդունած Սահմանադրական փոփոխությունների նախագիծն իր վրա չի ազդելու, քանի որ ինքը 12 տարի անընդմեջ չի եղել ՍԴ դատավոր։

Նախարարի խոսքով, այնտեղ նշված է՝  թե անդամի, թե դատավորի  պաշտոնում ընդհանուր տևողությամբ 12 տարի պաշտոնավարած անձանց...։ Ռ. Բադասյանի խոսքով, ավելին՝ հիմնավորումներում անդրադարձ կա թե անընդհատությանը, թե մյուս հանգամանքներին։ 

Հարցին՝ ինչո՞ւ նախագծում ոչինչ ներառված չէ ՍԴ դատավոր Վահե Գրիգորյանի մասին, ով մեկ տարի չի աշխատում, արդյո՞ք չի մտահոգում ձեզ այդ հանգամանքը, Ռ. Բադասյանն ասաց. «Իսկ ի՞նչ կապ ունի մեկ տարի  աշխատել- չաշխատելը, թեկուզ ձեր որակմամբ, Սահմանադրության փոփոխությունների հետ։ Եթե որևէ մեկը որևէ տեղ պաշտոնատար անձ է ու չի աշխատում, ինձ մտահոգում է։ Պետք է մտահոգի նաև բոլոր քաղաքացիներին»։

Նրա խոսքով, իր գործառույթներից բխող որևէ քայլ չկա, եթե որևէ դատավոր, օրինակ, չի աշխատում։

«Այլ հարց է, թե  ի՞նչ նկատի ունենք աշխատել և չաշխատել ասելով», - նշեց արդարադատության նախարար Ռուստամ Բադասյանը։

Պատասխանելով հարցին՝ ասում են՝ կառավարությունը կարծես թե գիտի որ սահմանադրական  կարգի տապալում է, զերծ է մնում որևէ գործողություն անելուց՝ ամբողջ պատասխանատվությունը թողնելով ԱԺ-ի վրա, Ռ. Բադասյանն ասաց. «Ինչ վերաբերում է  որոշակի շրջանակների ճնշման խղճուկ փորձերն, ապա այդ անձանց, կարծում եմ, կատարած հանցագործությունները ժամանակ առ ժամանակ կբացահայտվեն, կքննվեն արդար դատաքննության շրջանակներում։  Որևէ սահմանադրական կարգի տապալման, հանցագործության մասին խոսք լինել չի կարող։Ես ցավում եմ, որ որևէ մեկը  ժողովրդի իշխանության  իրականացումը և այդ իրականացումը նաև Ազգային ժողովի միջոցով կարող է դիտել որպես հանցագործություն»։

Հարցին՝ քանի որ ՍԴ նախագահ Հրայր Թովմասյանը նշում է, որ առոչինչ են այդ իրավական ակտերը, չի պատրաստվում դրանց ենթարկվել, շարունակում է աշխատանքի գնալ, ի՞նչ միջոցներ են ձեռնարկվելու, արդյո՞ք  հարկադրանքի միջոցներ կկիրառվեն, նախարարը պատասխանեց. «Չեմ կարծում, որ որևէ հարկադրանքի կարիքը կա, Սահմանադրության փոփոխություններ են,  ուժի մեջ կմտնեն  վաղվանից, ցանկացած անձ պարտավոր է դրան ենթարկվել։ Չկա չենթարկվելու ձև»։

Պատասխանելով հարցին՝  ձեզ համար ժողովրդավրության  ոգուն համահո՞ւնչ է, երբ ՍԴ-ում բարձր պաշտոն զբաղեցնող երեք անձիք քաղաքական մեծամանության որոշմամբ փաստացի մեկ օրում զրկվում են աշխատանքից, ՍԴ նախագահը նույնպես զրկվում է իր պաշտոնից,  Ռ.Բադասյանն ասաց. «Հարցին հարցով կպատասխանեմ. մեր հասարակությունում որևէ  մեկի համար նորմա՞լ է, որ ունենք ՍԴ, որի մոդելն այն է, որ  դատավորները 12 տարի են պաշտոնավարում, ՍԴ ներսում  իրավիճակ ունենք, որ 7 դատավորներ պաշտոնավարում են  ցմահ, իսկ նոր նշանակված երկու դատավորները  և  ապագայում նշանակվող դատավորները 12 տարի։ Կարևոր է  արձանագրել, որ չի կարող դատական մի մարմնում լինեն երկու տարբեր կարգավիճակներ ունեցող անձիք, այդ թվում պաշտոնավարման ժամկետի մասով։ Ամբողջ փոփոխությունների իմաստը այդ մոդելի կյանքի կոչում էր»։