Ձեր վստահելի աղբյուրը

«Ես Հատուկ քննչական ծառայության պետին չեմ վիրավորել, պարզապես իրերը կոչել եմ  իրենց անուններով»,- Բարձրագույն դատական խորհրդի նիստում ունեցած ելույթում ասաց ՀՀ վերաքննիչ քրեական դատարանի դատավոր Ալեքսանդր Ազարյանը։

Նշենք, որ ԲԴԽ-ում քննվում է դատավոր Ալեքսանդր Ազարյանի վերաբերյալ կարգապահական գործի քննությունը: Կարգապահական վարույթը հարուցվել է արդարադատության նախարար Ռուստամ Բադասյանի կողմից։ 

Դատավորը նշեց, որ իր արտահայտություններն անհարգալից չեն եղել, ինքն իր կարծիքն է հայտնել՝ հիմքեր ունենալով։  

«Ներկայացվածն ամբողջությամբ իրականությանը չի համապատասխանում»,- ասաց դատավոր Ազարյանը։

Նա նշեց, որ իր նկատմամբ կարգապահական վարույթ հարուցելու պահին նախարար Ռ. Բադասյանը ծանոթ չի եղել դատական նիստի ձայնագրությանը, վստահել է ՀՔԾ պետին, իսկ ՀՔԾ պետն էլ  իր հերթին  մարտի 5-ի դատական  նիստի ձայնագությանը ծանոթ չի եղել։

«Եթե լսել է՝ ինչու կարգապահական վարույթ հարուցելու մասին որոշման մեջ չի գրել այն, ինչ ասել եմ, այլ գրել է այն, ինչ հայտնել է  ՀԾՔ պետը, դրանից առաջ դատախազն՝ ինձ ինքնաբացարկ հայտնելու միջնորդության մեջ, որն իրականությանը չի համապատասխանում։ Սա է ամբողջ  խնդիրը»,-  ասաց Ա. Ազարյանը։

Ալեքսանդր Ազարյանի նկատմամբ կարգապահական վարույթ հարուցելու վերաբերյալ հաղորդումն արդարադատության նախարարություն է ներկայացրել ՀՔԾ՝ կոռուպցիոն, կազմակերպված և պաշտոնեական հանցագործությունների քննության վարչության պետի տեղակալ Հրաչյա Մուշեղյանը։ Նրա վարույթում քննվել է «5-րդ ալիք»-ի սեփականատեր Արմեն Թավադյանի վերաբերյալ քրեական գործը։ Միջնորրդությունը վերաբերում է ՀՔԾ պետ Սասուն Խաչատրյանին։