Ձեր վստահելի աղբյուրը

Բարձրագույն դատական խորհուրդն ավարտեց ՀՀ վերաքննիչ քրեական դատարանի դատավոր Ալեքսանդր Ազարյանի վերաբերյալ կարգապահական գործի քննությունը։ Խորհրդի որոշումը կհրապարակվի հուլիսի 9-ին ժամը 14։10-ին։

ԲԴԽ նիստի ընթացքում Ալեքսանդր Ազարյանի պաշտպան Տիգրան Աթանեսյանը հանդես եկավ միջնորդությամբ՝  որպես վկա հրավիրել ու հարցաքննել Հատուկ քննչական ծառայության պետ Սասուն Խաչատրյանին։ Խորհուրդը մերժեց միջնորդությունը։

Հիշեցնենք՝ կարգապահական վարույթը հարուցվել է արդարադատության նախարար Ռուստամ Բադասյանի կողմից: Դատավոր Ալեքսանդր Ազարյանի նկատմամբ կարգապահական վարույթ հարուցելու վերաբերյալ հաղորդումն արդարադատության նախարարություն է ներկայացրել ՀՔԾ՝ կոռուպցիոն, կազմակերպված և պաշտոնեական հանցագործությունների քննության վարչության պետի տեղակալ Հրաչյա Մուշեղյանը։ Նրա վարույթում քննվել է «5-րդ ալիք»-ի սեփականատեր Արմեն Թավադյանի վերաբերյալ քրեական գործը։ Միջնորրդությունը վերաբերում է ՀՔԾ պետ Սասուն Խաչատրյանին։

Արդեն եզրափակիչ խոսքում արդարադատության նախարար Ռուստամ Բադասյանն հայտարարեց, որ իրենց ներկայացրած միջնորդություն բացառապես իրավական հիմք ունի, որևէ այլ դրդապատճառ չունի, ամբողջությամբ ենթակա է բավարարման։

Ա. Ազարյանի պաշտպան Տիգրան Աթանեսյանն ասաց, որ  շարունակում են մնալ նույն կարծիքին՝ որևէ կարգապահական խախտում չկա։

«Խոսքը գնում է դատավորին ճնշելու մասին, ցավոք սրտի, դա արվում է Բարձրագույն դատական խորհրդի միջոցով։ Հուսով եմ՝ խորհուրդը կդիմակայի այս փորձությանը», - ասաց Տ. Աթանեսյանը։