Ձեր վստահելի աղբյուրը

«Տեղի է ունենում սահմանադրական հեղաշրջում, սահմանադրական կարգի տապալում»,- Սահմանադրական դատարանի մոտ լրագրողների հետ զրույցում ասաց «Հայրենիք» կուսակցության խորհրդի անդամ Արա Սահակյանը՝ նշելով, որ այստեղ է իրենց բարոյական, քաղաքական աջակցությունը հայտնելու ՍԴ-ին։

Նա ասաց, որ հեղափոխությունները բերում են դժբախտություն, կործանում, հիմա համոզվում են, որ կործանման թիրախ է ընտրվել Սահմանադրական դատարանը։

«Մեր հասարակությունը պետք է անպայման միավորվի, համախմբի և միայն քաղաքացիական հասարակությունը կարող է զսպել  իշխանությանը։ Սա է ճանապարհը, մենք այս ճանապարհն ենք տեսնում։ Սահմանադրական դատարանը բոլորինս է, ուրեմն պաշտպանել Սահմանադրական դատարանը, նշանակում է պաշտպանել մեր իրավունքները»,- ասաց Ա.Սահակյանը։

Ըստ նրա, քաղհասարակության տեսակետների արտահայտման միջոցները, եղանակներն անսահման են, իրավիճակից ելնելով, կապված համավարակի հետ, զանգվածային բողոքները ժամանակավորապես կասեցված են։

«Արտակարգ դրության ռեժիմի պահպանման համար որևէ իրավական կամ կազմակերպական անհրաժեշտություն չկա, գոյություն ունեցող օրենքները թույլ են տալիս կազմակերպել ամեն ինչ, բացի քաղաքական և քաղաքացիական իրավունքների սահմանափակումից։ Ուրեն սա, մեր կարծիքով, նույնպես դիտավորություն է, որը ծիծաղելի  հետևանքներ ունի։ Շատ նման է այն արտակարգ դրությանը, որը 1988 թվականից սկսած մի քանի անգամ Սովետական կենտրոնը՝ Կրեմլը, հայտարարում էր Ղարաբաղյան  շարժման դեմ, բայց արդյունքում  Սովետական միությունը կործանվեց, ղարաբաղյան արժումը հաղթեց։

Հիմա էլ հեղափոխական նպատակահարմարությանը մենք հակադրում ենք իրավական գիտակցությունը։ Այստեղ համակրանքներով ու հակակրանքներով,  մանկության չիրականացած երազանքների առաջմղումով չի կարելի առաջնորդվել։ Դա կարելի է անել մանկական խաղերի ժամանակ։ Չի կարելի այդ խաղերը թույլ տալ պետությանը։ Պետությունը մի կողմից ուժեղ օրգանիզմ է, ուժեղ կառույց է, մյուս կողմից այն շատ փխրուն է, երբ կորցնում է քաղաքացիների վստահությունը, հայտնվում է ավազե  հիմքերի վրա։

Այդպիսի ճանապարհ է ընտրել այսօրվա արդեն միասնական, միաձույլ գործադիր և օրենսդիր իշխանությունը։ Դրա դեմ ենք պայքարում և  շարունակելու ենք պայքարել բոլոր ուժերով»,- ասաց «Հայրենիք» կուսակցության խորհրդի անդամը։

Հարցին՝ ՍԴ դատավոր Վահե Գրիգորյանն ասաց, որ ՍԴ ճգնաժամն արդեն լուծվել է,  ի՞նչ եք կարծում՝ լուծվե՞լ է, թե՞ հակառակը, Ա.Սահակյանն ասաց. «Ես այդպիսի անուն-ազգանունով Սահմանադրական դատարանի դատավոր չեմ ճանաչում։ Գիտեմ, որ կա այդպիսի անուն-ազգանունով մի  դասալիք։ Սովորական մի բանվորը, ուսուցիչը, բժիշկը մի քանի ժամ աշխատանքից բացակայելու դեպքում վաղուց հեռացվել էր։ Նա  ձրիակեր է, ուտում է ձեր փողերն աշխատավարձի տեսքով։ Նա ընդհանրապես որևէ բարոյական հեղինակություն չունի մեր հասարակության մեջ»։

Նա նշեց, որ գործադիր, օրենսդիր երկգլխանի հիդրան, որը կոչվում է  ներքին իշխանություն, ոտնահարել է Սահմանադրության պահանջը՝ կատարելով սահմանադրական փոփոխություններ ու չստանալով բարձրագույն ատյանի՝ ՍԴ-ի կարծիքը Սահմանադրության համապատասխանության վերաբերյալ։

Ա. Հակոբյանն ասաց, որ իրենք իրենց ամենօրյա աշխատանքի շնորհիվ մյուս կուսակցությունների հետ հասել են նրան, որ այս իշխանության հենարանը մնացել է փոքրամասնություն և, անշուշտ, իրավական համակագը։

Հարցին՝ նախօրեին վարչապետը հայտարարեց, որ հաջորդ խորհրդարանում լինելու են միայն այն քաղաքական ուժերը, որոնք աջակցել են..., «Հայրենիք» կուսակցության ներկայացուցիչը պատասխանեց. «Բայց հո մենք չե՞նք կարող նրա երազանքները հիմա քննարկել, նա չհայտարարեց, արտահայտեց իր երազանքը»։

Ա. Սահակյանը ասաց, որ կուսակցությունները ստեղծվում են  ժողովրդի քաղաքական կամքը ձևավորելու և արտահայտելու համար, ոչ թե ամեն գնով ինչ -որ տեղ տեղավորվելու համար։

«Ուրեմն՝ եթե ինչ-որ մարդիկ ծրագրում են, որ կարող են որոշել ներկայացուցչական մարմնի վաղվա կազմը, ապա դա իրենց խնդիրն է, լուրջ խնդիր է։ Այդպիսի փորձեր արվել են, բոլորն էլ ձախողվել են։ Ժողովուրդը կընտրի իրենց ներկայացուցիչներին ու կվստահեն այնքան ժամանակ, քանի դեռ ազնիվ են ու չեն  մոլորվել այն գառների պես, որոնք հիմա մոլորված են»,- ասաց «Հայրենիք» կուսակցության խորհրիդ անդամ Արա Սահակյանը։