Ձեր վստահելի աղբյուրը

«Տխուր տպավորություն ունեմ, քանի որ պետության մեջ տեղի է ունենում սողացող հեղաշրջում»,- ՍԴ շենքի դիմաց լրագրողների հետ զրույցում ասաց ԱԺ նախկին պատգամավոր, քաղաքական վերլուծությունների «Ակունք» կենտրոնի տնօրեն Ռուբեն Հակոբյանը։

Նրա խոսքով, ՍԴ-ն այն մարմինն էր, որ իսկապես կարողացավ կանգնել և պայքարել իշխող ուժի, մասնավորապես՝ մեկ հոգու դեմ։ Ըստ Ռ. Հակոբյանի, այսօր իշխող ուժը հակաօրինական ձևով, ցինիկորեն հարձակվել է ՍԴ-ի վրա։

«Ես մտածում էի, որ այսօր այս փողոցները պետք է փակվեին, քանի որ իրենք օգտագործում են կորոնավիրուսը և հակաօրինական օրենքներ են ընդունում, Սահմանադրությունն են ցեխի մեջ գցում, բայց հասարակությանը պարտադրում են, որ ենթարկվի արտակարգ դրության կանոններին՝ առանց արտակարգ քայլեր անելու ժողովրդին համաճարակից հետ պահելու համար։ Այո, եթե անհրաժեշտ է, պետք է գրավել հենց ռադիոտունը, ի վերջո, այնպիսի իրավիճակ է ստեղծվել, որ օրենքի սահմաններում իշխանությունը փոխել հնարավոր չէ, քանի որ Նիկոլ Փաշինյանը բացարձակ հակաօրինականության դաշտում է գործում։ Եվ ինչպես ինքն իրականացրեց պետական հեղաշրջում՝ գրավելով պետական օբյեկտները, այնպես էլ  հիմա պետք է պետական պահպանության օբյեկտները գրավել և իրեն վռնդել այս իշխանությունից»,- նշեց նա։

Ռ. Հակոբյանի խոսքով, իշխանություններն այսօր պետությունը տանում են դեպի կործանում, և ժամանակն է, որ ընդդիմությունը ադեկվատ քայլեր անի։ Նրա կարծիքով, «նվնվոցները», թե իշխանությունները հակաօրինական քայլեր են ձեռնարկում, քիչ են, քանի որ Փաշինյանը թքած ունի օրենքների վրա, և ասում է՝ իմ ընտանեկան կապալն այսպես է ապրում։

«Նա ասում է՝ իմ ընտանեկան կապալը գտնում է, որ պետք է  ծխախոտի, ադամանդի, զենքի մաքսանենգությամբ զբաղվի։ Եվ ինքը կարողացել է այսօր այնպիսի իրավիճակ ստեղծել, որ հասարակությունը համակերպվի հակաօրինական դաշտում ապրելուն։ Պետք է համարժեք քայլերի գնալ, և առաջիկայում գրավել պետական պահպանության օբյեկտները։ Կարծում եմ՝ կգտնվեն մարդիկ, որ դա կանեն։ Փաշինյանը կարողացավ բռնապետի կերպար ստեղծել, նա հոգեկան հիվանդ է։ Ինքը մինչև հիմա որևէ մեկին դատի չի տվել այս ձևակերպման համար, քանի որ եթե միջազգային հանձնաժողով հրավիրվի, կպարզվի՝ իսկապես այս մարդը հոգեկան խնդիրներ ունի, ես խոսել եմ մասնագետների հետ։ Նա վտանգ է պետության համար։ Նա պետությունը համարում է իր համքարությունը»,- նշեց նա։

Ռուբեն Հակոբյանի կարծիքով, ժողովուրդն այնքան վախեցած չի եղել, որքան այսօր։

Դիտարկմանը, որ վարչապետ Փաշինյանը անընդհատ հայտարարում է, որ երկրում սիրո մթնոլորտ է, ժողովրդավարական համակարգ է հաստատված, Ռ. Հակոբյանը արձագանքեց՝ գողը միշտ գոռում է՝ բռնե՛ք գողին։

«Ինքը գողացել է ժողովրդի ազատությունը, նրա իրավունքը։ Ինքը գողացել է Սահմանադրությունը, որպեսզի կարողանա անել այն, ինչ այսօր անում է։ Պատահական չէ, որ ինքը միշտ նախահարձակ է լինում։ Երեկ ԱԺ-ում ինքն այնպիսի ելույթ ունեցավ, ինչպիսին ունեցել էր այն տրանսգենդերը։ Ուղղակի տրանսգենդերի ձայն ավելի ճվճվան էր։ Ես ամաչեցի, նման ելույթ չէի լսել, մատ է թափ տալիս, ասում, թե ով է գալու իշխանության։ Տո՛, դու ո՞վ ես, իրեն հարգող տղամարդն այդպես ղժղժան, փողոցի անբարոյական կնոջ պես չի պահի իրեն։ Այն բառամթերքը, որ ինքը օգտագործում է, այս պատասխանը պիտի ստանա»,- նշեց նա։

Անդրադառնալով սահմանադրական փոփոխությունների օրենքին, Ռ. Հակոբյանը նշեց, որ իր համար ցավալի է տեսնել՝ ինչպես է կեսգիշերին երկրի նախագահը ենթարկվել Նիկոլ Փաշինյանի սադրանքին և ստորագրել հակասահմանադրական օրենքը.

«Եվ այդ ԱԺ-ն և Կառավարությունը մատաղացու են, կա մեկ հոգի, որը ֆաշիստական շեշտադրումներ ունի։ Այդ 89 հոգուց մեկն անգամ չասաց՝ եղբայր, հակաօրինական քայլ ենք անում»։