Ձեր վստահելի աղբյուրը

Թեև  ՀՀ վարչապետ Նիկոլ Փաշինյանը կեսգիշերին հայտարարեց, որ ՍԴ երեք դատավորի, այդ թվում Ալվինա Գյուլումյանն արդեն ՍԴ անդամ կամ դատավոր չեն, սակայն տիկին Գյուլումյանն այսօր եկավ աշխատանքի, լրագրողներին ասաց, որ շարունակելու է իր գործունեությունը։

Ա.Գյուլումյանի խոսքով, հարցը կարգավորվում է  որոշակիորեն սահմանված կարգով, որևէ մեկը դեռ չի արձանագրել, որ իր լիազորությունները դադարեցված են։

«Սահմանադրական  նորմն ընդունվել է, բայց գոյություն ունի Սահմանադրական դատարանի մասին օրենք, որով կարգավորվում է  Սահմանադրական դատարանի գործունեությունն։ Այս պարագայում օրենքի ուժով դեռ շարունակում ենք աշխատել։ Դատարանում երբ որևէ մեկի լիազորությունները դադարել են, դատարանն արձանագրային  որոշում է  ընդունել, որով հաստատվել է  տվյալ անձի  լիազորությունների դադարման փաստը։ Առայժմ այդպիս փաստաթուղթ չկա։ Իսկ հայտարարությունները ոչ իմ, ոչ ձեր աշխատանքից ազատվելու հիմք չեն։

Կոնկրետ իմ, նաև  մյուսների պարագայում պետք է լինի նաև ինչ-որ իրավական հիմք, որը կասի, որ այո, սա  վերաբերվում է տիկին Գյուլումյանին։ Հայտարարությունները իրավական հիմք չեն»,- ասաց Սահմանադրական դատարանի դատավորը։ 

Հարցին՝ ՍԴ դատավոր Վահե Գրիգորյանը ձեզ արդեն անվանում է նախկին գործընկեր, նա պատասխանեց. «Դա էլ Վահե Գրիգորյանի կարծիքն է, ես ինչ ասեմ։ Ով ինչպես ուզի, կասի»։

Ա.Գյուլումյանն ասաց, որ իրենց իրավունքների պաշտպանության համար, իհարկե, քայլեր պետք է լինեն. «Այդ քայլերը պետք է լինեն դատական կարգով։ Եթե գտնում եք, որ ներպետական դատարաններ չկան այդ հարցով, կդիմենք Եվրոպական դատարան»։

Հարցին՝  Ձեր այն դիտարկմանը, որ դուք 12 տարի և ավելի պաշտոնավարել ենք ընդմիջմամբ, արդարադատության նախարար Ռուստամ Բադասյանն ասել է, որ օրենքում հստակ կարգավորվում է, տարածվում է  Ձեզ վրա, Ա.Գյուլումյանն ասաց. «Օրենքում բերված այն եզրույթը՝ ընդհանուր տևողություն, վերաբերում է  սահմանադրական փոփոխություններից առաջ և հետո, բայց ոչ երբեք մեկ ժամկետ առաջ, որը եղել է շուրջ 17 տարի առաջ։ Հիմա թող գնան, կենսագրությունս պեղեն, կարող է դպրոցում էլ եմ եղել ՍԴ անդամ, դա գումարեն ու ասեն մի բան էլ ավելի է»։

Նա նաև հարցադրում արեց. «Եթե իմ նախկին պաշտոնավարումը պետք է հաշվարկեին, կներեք՝ ինչո՞ւ էի երկրորդ անգամ երդվում։ Պաշտոնը ստանձնում ես երդումով։ Ես երդվել և ստանձնել եմ 2014 թվականի հոկտեմբերի 23-ին»։

Պատասխանելով հարցին, թե Ձեր անելիքները ո՞րն է, կառավարությունը պնդում է, որ Ձեր լիազորությունների դադարեցումն  այսօրվանից ուժի մեջ է, Ա.Գյուլումյանն ասաց. «Մենք պատկան մարմիններից ակնկալում ենք համապատասխան ձևակերպված փաստաթուղթ, որը կվերաբերվի մեզանից յուրաքանչյուրին։ Ինչ վերաբերում է  աշխատանքի գալ-գնալուն, դատարան է, կոլեգիալ մարմին է համարվում, բնականաբար, եթե կգտնեն, որ ես այստեղ պետք է չլինեմ, դատարանն էլ ինձ թույլ չի տա մասնակցել նիստերին,  ես չեմ պատրաստվում ուժով դա անել, ուղղակի կպայքարեմ իմ իրավունքների համար»։ 

Նա ասաց, որ հնարավոր է այսօր էլ լինի ակտը, որն անհատապես կասի՝ Ա. Գյուլումյանի պաշտոնավարումը դադարեցված է, այդ դեպքում կբողոքարկի այդ ակտը, բնականաբար, կամայական չի շարունակի աշխատել։

«Ուզում եմ լինի համապատասխան ակտ, համապատասխան որոշում, որովհետև որևէ հայտարարություն, ինչ մակարդակով էլ դա արվի, որևէ իրավական ուժ չունի»,- ընդգծեց ՍԴ դատավոր Ալվինա Գյուլումյանը։