Ձեր վստահելի աղբյուրը

«Շուրջ երկու տարի է Հայաստանի սահմանադրությունը, որի  երաշխավորն, ըստ էության, Սահմանադրական դատարանի դատավորներն են, բռնության են ենթարկվում»,- ՍԴ-ի դիմաց լրագրողների հետ զրույցում ասաց իրավաբան Ռոբերտ Հայրապետյանը։

Ըստ նրա, ոչ միայն Սահմանադրությունը, նաև օրենքները, իրավական պետությունն ամեն օր, պարբերաբար ենթարկվում են այն տիպի անարգանքի, այն տեսակի այլասերման, որ բավականաչափ դժվար կլինի հետագայում դրա վերականգնումը կամ հետ բերումը։ Իրավաբանի խոսքով, ՍԴ շուրջ իրավիճակը դեռ սկսվել է «օրինական կաշառք» անվանումը ստացած վաղ կենսաթոշակային օրենքից, որի արդյունքում փորձ էր արվում ՍԴ դատավորին համոզել հեռանալ։

«Ի պատիվ Սահմանադրական դատարանի դատավորների, այդ օրինագիծն այդպես էլ մնաց թղթի վրա։ Իշխանությունը, ըստ էության, հասկացավ, որ այևս անիմաստ  է մոտավոր օրենքի շրջանակերում փորձել գործել ու գործողությունները սկսեցին ծավելել արդեն անարխիստական տարբերակով։ Սահմանադրական փոփոխություններ անվանումը ստացած նախագիծն ամբողջությամբ  վկայում է դրա մասին, որ  մեր երկրում գոյություն չունի պետական ինստիտուտ՝ սկսած Հայաստանի  նախագահի ինստիտուտից, գոյություն չունի Սահմանադրություն, Սահմանադրության առաջին հոդվածի իրավական և ժողովրդավարական պետության բոլոր նորմերն ամբողջությամբ հավասարեցված են հողին»,- ասաց Ռ.Հայրապետյանը։

Նա նշեց, որ իրենք պարբերաբար քննարկում են՝ «այո, 88 հոգանոց աղջիկների ու տղաների խմբակը կենթարկվի պատասխանատվության, որովհետև  յուրացրել են իշխանություն, տապալել սահմանադրական կարգը»,  բայց արդյունքում ունենում ենք անվերադարձնելի ու անվերականգնելի  երևույթ՝ բռնաբարված Սահմանադրություն և բռնաբարված պետություն։ Իրավաբանի համոզմամբ, ՍԴ նոր դատավորները լինելու են ոչ լեգիտիմ, նշանակվելու են անօրինական ճանապարհով, որովհետև այն հիմքով, որով ՍԴ գործող անդամները պետք է հեռացվեն, ապօրինի են և հակասահմանադրական։

Ըստ նրա, ԱԺ-ի կողմից ընդունված նախագծից հետո հիմնական զարգացումները, որոնք պետք է տեղի ունենային, տեղի չունեցան ընդդիմադիր քաղաքական ուժերից մեկի մեկ պատգամավորի ստորագրություն դնելու ժլատության հիմքով և ՀՀ նախագահի  պաշտոնը ծանրաբեռնած անձի ծառայամտության, քաղաքական ենթարկվողականության արդյունքում։  Նա նշեց, որ նախագահը ոչ միայն անգործություն ցուցաբերեց, նաև նրա  թողտվությամբ, ըստ էության, ԱԺ-ն տիրացավ Հանրապետության նախագահի լիազորություններին։

«Այդ անգործությունը, ձեռնպահ լինելը Հանրապետության նախագահին չի ազատելու պատասխանատվությունից, որովհետև անգործությունը նույնպես համարվում է հանցագործություն։ Որևէ մեկը նման անարգանքի, Սահմանադրությունը նման կերպ այլասերելու, պետական ինստիտուտները նման կերպ ստորացնելու համար անմասն չի մնալու  պատասխանատվության կրումից  օրենքի ողջ խստությամբ»,- ասաց Ռ.Հայրապետյանը

Հարցին՝ ԱԺ պատգամավորների 1/5 մասով տարակարծություններ կան, ԲՀԿ-ն 26 պատգամավորի ստորագրությամբ է դիմում ներկայացրել ՍԴ, արդյո՞ք այն կընդունվի վարույթ, իրավաբանը պատասխանեց. «Ստացվում է 26,4, կլորանում է դեպի 27, թե դեպի 26,  մաթեմատիկական խնդիր է,  բայց  մի կողմ դնելով նախագծի հակասահմանադրականությանը, դրանով առնվանզ 4 անձի իրավունք է խախտվում ու փորձելով զուգորդել միջազգային պրակտիկայի հետ, կարծում եմ, ի նպաստ անձի, քաղաքացու  իրավունքի  նորմի մեկնաբանման արդյունքում 26,4 պետք է կլորանա հենց 26»։