Ձեր վստահելի աղբյուրը

Միջազգային կրոնական ազատությունների հարցերով ԱՄՆ դեսպան Սեմ Բրաունբեքը պահանջել է, որ Թուրքիայի իշխանությունները Սուրբ Սոֆիայի տաճարը թողնեն ներկայիս կարգավիճակում: Այս մասին գրում է «Ինտերֆաքս»-ը:

«Սուրբ Սոֆիայի տաճարը հոգևոր և մշակութային մեծ նշանակություն ունի աշխարհի տարբեր հավատքների միլիարդավոր հավատացյալների համար: Մենք կոչ ենք անում Թուրքիայի կառավարությանը պահպանել այն որպես ՅՈՒՆԵՍԿՕ-ի համաշխարհային ժառանգության տարածք և բոլորի համար ապահովել նրա մատչելիությունը ներկայիս կարգավիճակում՝ որպես թանգարան» - գրել է Բրաունբեքը:

Սուրբ Սոֆիայի ապագայի շուրջ քննարկումները վերսկսվել են մայիսի 29-ից հետո, երբ Կոստանդնուպոլսի անկման տարելիցին այնտեղ ընթերցվեց Ղուրանը: Մեկ շաբաթ անց Թուրքիայի նախագահ Ռեջեփ Թայիփ Էրդողանը հանձնարարել է ուսումնասիրել Սուրբ Սոֆիայի տաճարը մզկիթի վերածելու հնարավորությունը:

Ավելի ուշ արդարադատության նախարար Աբդուլհամիդ Գյուլը տաճարը մզկիթի վերածելու կողմ է արտահատվել, դրա օգտին խոսել էր նաև արտգործնախարար Մևլութ Չավուշօղլուն:

Իր հերթին, Հայ առաքելական եկեղեցու Կոստանդնուպոլսի թեմի պատրիարք, Սահակ Մաշալյանը առաջարկել է, որ Սուրբ Սոֆիայի տաճարն աղոթատեղի դառնա ինչպես քրիստոնյաների, այնպես էլ մահմեդականների համար:

Տաճարի ապագայի հարցը հուլիսի սկզբին քննարկվելու է երկրի Պետական խորհրդում:

Սուրբ Սոֆիայի տաճարը թանգարանի կարգավիճակ է ստացել 1934 թ.՝ Թուրքիայի առաջին նախագահ Մուստաֆա Քեմալ Աթաթուրքի որոշմամբ: 1985 թվականից տաճարն ընդգրկված է ՅՈՒՆԵՍԿՕ-ի Համաշխարհային ժառանգության ցանկում: