Ձեր վստահելի աղբյուրը

Երևանի ընդհանուր իրավասության դատարանը՝ դատավոր Կարեն Ֆարխոյանի նախագահությամբ, բավարարել է «ԲՀԿ»-ական նախկին պատգամավոր Աբրահամ Մանուկյանի նկատմամբ կալանավորումը որպես խափանման միջոց ընտրելու մասին ԱԱԾ քննիչի միջնորդությունը։ Այս մասին «Փաստինֆո»-ին տեղեկացրել են դատարանից։

Աղբյուրը հիշեցնում է, որ ԱԱԾ-ում քննվող քրեական գործի շրջանակներում նախկին պատգամավորի ձերբակալության մասին հայտնի դարձավ հունիսի 17-ին, ապա նա ազատ արձակվեց, քանի որ դատարանը ոչ իրավաչափ է համարել նրա ձերբակալությունը։ Ազատ արձակվելուց հետո Մանուկյանին մեղադրանք է առաջադրվել ՀՀ քրեական օրենսգրքի 38-154.2-րդ հոդվածի 2-րդ մասի հատկանիշներով՝ ընտրակաշառք տալուն օժանդակելու համար և վարույթն իրականացնող մարմինը նրան կալանավորելու միջնորդություն ներկայացրեց դատարան։

Աբրահամ Մանուկյանը եղել է ԱԺ երկու գումարումների պատգամավոր 2003-2007թթ եղել է ՀՀԿ խմբակցության պատգամավոր, իսկ 2012-ին՝ «Բարգավաճ Հայաստան» կուսակցության։

Հիշեցնենք, որ «Բարգավաճ Հայաստան» կուսակցության ղեկավար Գագիկ Ծառուկյանին անձեռնմխելիությունից զրկելու և նրան ազատությունից զրկելու թույլտվություն ստանալու վերաբերյալ միջնորդությունը ներկայացնելու ընթացքում , մասնավորապես՝ 2017թ խորհրդարանական ընտրությունների ժամանակ «Բարգավաճ Հայաստան» կուսակցության կողմից ընտրողներին ընտրակաշառք տալու վերաբերյալ քրեական գործի մասին փաստական տվյալներ ներկայացնելիս նշել էր նաև Աբրահամ Մանուկյանի անունը։

Ըստ գլխավոր դատախազի ներկայացրած միջնորդագրի՝ Գագիկ Ծառուկյանի հետ պայմանավորվածության համաձայն՝ անհրաժեշտ ծախսերն ապահովելու համար դիմել են Սեդրակ Առուստամյանին և Աբրահամ Մանուկյանին։

Հիշեցնենք, որ ԲՀԿ-ականները մեղադրանքները չեն ընդունում՝ տեղի ունեցածը որակելով որպես քաղաքական հետապնդում։

Ավելի ուշ գլխավոր դատախազի խորհրդական Գոռ Աբրահամյանը ֆեյսբուքյան գրառմամբ հայտնեց.

«Երևան քաղաքի ընդհանուր իրավասության դատարանը բավարարել է ՀՀ Ազգային ժողովի 2017թ. ապրիլի 2-ի ընտրություններին մասնակցած «Ծառուկյան» կուսակցությունների դաշինքի և դրա կողմից առաջադրված թեկնածուի օգտին քվեարկելու համար ընտրողներին կաշառք տալը կազմակերպելու դեպքի առթիվ քննվող քրեական գործով որպես մեղադրյալ ներգրավված Ազգային ժողովի ԲՀԿ-ական նախկին պատգամավոր Աբրահամ Մանուկյանի նկատմամբ կալանքը որպես խափանման միջոց ընտրելու միջնորդությունը։

Այսինքն դատարանը ՀԻՄՆԱՎՈՐ Է ՀԱՄԱՐԵԼ ինչպես իրեն մեղսագրված հանցավոր արարքներին Ա․ Մանուկյանի հնարավոր առնչությունը, այնպես էլ կալանավորման հիմքերը։

Հիշեցնեմ կրկին, որ Ա․ Մանուկյանին մեղադրանք է առաջադրվել ՀՀ քրեական օրենսգրքի 38-154.2 հոդվածի 2-րդ մասով՝ ՀՀ Ազգային ժողովի 2017թ. ապրիլի 2-ի ընտրություններին մասնակցած «Ծառուկյան» կուսակցությունների դաշինքի և դրա կողմից առաջադրված թեկնածուի օգտին քվեարկելու համար ընտրողներին կաշառք տալը կազմակերպելուն Գ․ Ծառուկյանին և այլոց հանցակցելու համար»։