Ձեր վստահելի աղբյուրը

Սուրբ Աթոռում ՀՀ արտակարգ և լիազոր նախկին դեսպան Միքայել Մինասյանը մի հարցում համաձայն է վարչապետ Նիկոլ Փաշինյանի՝ իրականացված հեղափոխությունը չունի հեղինակ։

«Նիկոլ Փաշինյանն առաջին օրվանից մինչև հիմա գոռում է, ժողովուրդ ջան, ինչպես որ եղել եմ անտեր, հիմա էլ եմ անտեր։ Այս հեղափոխություն կոչվածն ինձ հետ միասին արել է հայ ժողովուրդը։ Իրականում սա այն քիչ բաներից մեկն է, որի շուրջ լիովին համաձայն եմ Նիկոլ Փաշինյանի հետ, այս պրոցեսը, որ իրենք կոչում են հեղափոխություն, չունի հեղինակ, որովհետև հեղինակները բոլորս ենք և, ամենակարևորը բոլորս զոհ ենք այն տեխնոլոգիաներից, որոնք կիրառվել են Հայաստանում»,- «Ստի վերջը» տեսաշարի 11-րդ և վերջին տեսանյութում հայտարարեց Մ. Մինասյանը։

Նրա խոսքով, 2018-ի տեղի ունեցածի համար բոորը փնտրում են մեղավորներ։

«2018 թվականի ապրիլ-մայիս ամիսների իրադարձությունների համար բոլորս անխտիր պատասխանատու ենք, կրում ենք ուղղակի և անուղղակի պատասխանատվություն, բոլոր այն մարդիկ, որոնք տարածում էին բամբասանքներ, այն մարդիկ, որ ենթարկվում էին Ռոստովից կամ Լոս Անջելեսից արվող գրառումների ազդեցությանը, մեղավոր էր առաջին նախագահը, երկրորդ նախագահը, երրորդ նախագահը, մենք, ժուռնալիստները։ Չկա այս պատմության մեջ ոչ մեղավոր։ Բայց ամենակարևոր մեղավորը տեխնոլոգիաներն էին»,- ասաց նա։

Նա որպես օրինակ ներկայացրեց «հերոս» տեխնոլոգիան՝ հիշելով Արտուշ պապիին։ Մինասյանը նկատեց, որ մեկ ամիս անց բոլորը մոռացան Արտուշ պապիին։

«Մեկ ամիս անց էդ նույն մարդիկ սկսեցին թաղել Արտուշ պապիին։ Այդ ընթացքում ստվերվեց Հայոց Ցեղասպանության ամբողջ քաղաքական միջոցառումները։ Իսկ գիտեք՝ ինչո՞ւ, որովհետև տեխնոլոգիաները շատ լավ ուսումնասիրել են հայկական ֆեյսբուք տիրույթը, և շատ լավ գիտեն մեր բոլորի թուլությունները, գիտեն ինչ մեսիջներ տան, որ բոլորս ընկնենք թակարդը»,- նշեց նա։

Մինասյանը ևս մի քանի օրինակ բերեց՝ հիշեցնելով հեղափոխության օրերին Լեյլա տատիկին, Աշոտի տատիկին, Ռոբերտ Աբաջյանի «կեղծ» պապիկին, նկատեց, մինչ օրս Փաշինյանը ներողություն չի խնդրել հերոսի ընտանիքից միջադեպի համար։

«Այս ողջ ընթացքում մենք եղել ենք տեխնոլոգինաների զոհը»,- ընդգծեց նա։

Միքայել Մինասյանը եթերում պատրաստեց քաղաքական բորշչ՝ եռացող կաթսայում իրար խառնելով հիմնադրամներին, նախկիներին, բիզնեսի ներկայացուցիչներին, գործակալներին, արևմուտքին, ժողովրդին, ԼԳԲՏ համայնքին, հերոսին խորհրդանշող առարկաններ ու մթերքներ։

«Հնարավո՞ր է սրանից կշտանալ, պատասխանն է ոչ։ Ի՞նչ կարելի է սրանից անել, միայն թունավորվել»,- ասաց նա՝ ավելացնելով, որ հայկական հեղափոխությունից բոլորը դժգոհ են, բացի Փաշինյանից։

Նրա խոսքով, բորշչի բոլոր մասնակիցներն ունեն իրենց շահերը, միակ զոհը հայ ժողովուրդն է։

«Հեղափոխության խոհանոցից գալիս է գարշահոտ, հեղափոխության բորշչից գալիս է գարշահոտ, և այդ ճաշը թունավոր է, որը կանգնել է ժողովրդի կոկորդին՝ թունավորելով ժողովրդի մարմինը և տանելով բառիս բուն իմաստով գերեզման։ Այս հեղափոխությունը զրկում է մեզ մեր ապագայից։ Մենք պետք է հասկանանք, բոլորս միասին պետք է դուրս շպրտենք այս ճաշը մեր խոհանոցից, մեր օջախներից՝ հետ տալով մեզ ամենակարևոր մեր իրավունքները՝ խոսքի ազատությունը, կարծիք ունենալու մեր ազատությունը, մեր ապագան։ Ես ուզում եմ ձեզ ասել, որ խոհանոցային մեր հանդիպումը վերջինն է։ Մենք անշուշտ կշարունակենք այս հանդիպումները, բայց արդեն ոչ խոհանոցից»,- նշեց նա՝ ավելացնելով, որ որոշ ժամանակ դադար է վերցնելու՝ ժամանակ տալու մարսելու և մտածելու։

Միքայել Մինասյանն ասաց՝ հանդիպումներն իրենց նպատակին հասել են, ապամիֆականացվել է Նիկոլ Փաշինյանը։

«Մենք հասկացանք, որ նա սովորական դասական շանտաժիստ է, ժուլիկ, պարզ թալանչի, և ուղղակի խելագար, որը ուղղակի քանդում է, ստում է ու մանիպուլացնում է։ Ես ուզում եմ ձեզ ասել, որ հեղափոխական այս խոհանոցը իրապես շատ կեղտոտ է, այսօրվա մեր իրականության մեջ կան բազմաթիվ օտար երկրների գործակալներ, այսօրվա վերնախավում կան մեր նախկին ԱԱԾ-ի գործակալներ, որոնց մասին տեղյակ է Նիկոլ Փաշինյանը»,- նշեց նա։

Մանրամասները՝ տեսանյութում։