Ձեր վստահելի աղբյուրը

ԱԺ նախկին պատգամավոր, «Եվրոպական ինտեգրացիա» ՀԿ նախագահ Նաիրա Կարապետյանը համեմատել է Հայաստանի ու Ադրբեջանի ԱԳ նախարարների՝  ԵԱՀԿ Մինսկի խմբի համանախագահների հետ տեսակոնֆերանսների վերաբերյալ հաղորդագրություններն ու վտանգավոր նորամուծություններ և տողատակեր գտել։

Դրանց մասին նա բարձրաձայնել է ֆեյսբուքյան իր էջում.

«ԱԳՆ-ի հերթականը...

Սա Հայաստանի և Ադրբեջանի ԱԳՆ հաղորդագրություններն են։ Փորձեմ նշել հիմնական երկու վտանգավոր տողատակերը։

.Մեր ԱԳՆ գրում է, որ տեսակապով «ՀՀ ԱԳ նախարարը և ԵԱՀԿ Մինսկի խմբի համանախագահները քննարկեցին Լեռնային Ղարաբաղի հիմնահարցի խաղաղ կարգավորման գործընթացի միջավայրին առնչվող հարցերի շրջանակը»։

Միջավայրը... Ի՞նչ միջավայր, հարգելի «թափանցիկ բանակցողներ»։ Բոլոր հարցերը լուծվել են, մնացե՞լ է միջավայրին առնչվող հարցերի շրջանակը։ Ձեր յուրաքանչյուր բառակապակցություն մարդկային կյանքերի և պետական սահմանների կշիռ ունի, իսկ ցանկացած «նորամուծություն» հակամարտության բառապաշարում, ինչպես փորձն է ցույց տալիս, հանգեցնում է փակուղային էլ ավելի խորացման։

.Ադրբեջանն իր հերթին շրջանառության մեջ է դնում մեկ այլ բառակապակցություն՝ «Հայաստանա-Ադրբեջանական Լեռնային Ղարաբաղի կոնֆլիկտ»։ Վստահ եմ, որ հասկանում եք, որ դա ամբողջապես զրկում է Արցախի Հանրապետությունը որևէ սուբյեկտայնությունից, իսկ կոնֆլիկտն էլ դարձնում տարածքային վեճ։

Հակամարտության այսպիսի ներկայացումը տարիներ շարունակ եղել է Ադրբեջանի երազանքը, բայց մշտապես կասեցվել է՝ փաստարկված, որ սա ժողովրդի ինքնորոշման խնդիր է, և ոչ տարածքի շուրջ վեճ։ Բայց անգամ Ադրբեջանի համար Armenia-Azerbaijan Nagorno-Karabakh conflict արտահայտությունը սանձարձակ նորամուծություն է։

..Հարգելի «թափանցիկներ», դուք ունեք միայն մեկ ճանապարհ՝ ազնիվ լինել սեփական ժողովրդի հետ, բանակցել միմիայն ազգային և պետական շահերի պահպանման շրջանակում, իսկ դրա անհնարինության դեպքում՝ հեռանալ հանուն Հայանստանի Հանրապետության։

Ի դեպ, Ալիևի լեզուն երկարել է, որովհետև դուք եք թույլ տվել և շարունակում եք թույլ տալ։ Մնացածը՝ անիմաստ լիրիկա է»։