Ձեր վստահելի աղբյուրը

Չորեքշաբթի օրը Չինաստանի իշխանություններն ամերիկյան չորս լրատվամիջոցներին հրահանգել են յոթ օրվա ընթացքում ներկայացնել Չինաստանում իրենց ֆինանսական գործարքների և աշխատակիցների վերաբերյալ տվյալներ: «Ինտերֆաքս»-ը տեղեկացնում է, որ նման տեղեկատվություն են հայտնել արևմտյան լրատվամիջոցները:

Մասնավորապես, «Associated Press»-ը և «United Press International»- ը, CBS հեռուստաալիքը և NPR ռադիոընկերությունը պարտավոր են հաշվետվություն ներկայացնել Չինաստանում իրենց ունեցած անշարժ գույքի վերաբերյալ:

Արտաքին գործերի նախարարության խոսնակ Չժաո Լիցզյանը բացատրել է, որ Պեկինի պահանջները ԱՄՆ-ում չինական մեդիակազմակերպությունների նկատմամբ չհիմնավորված ճնշումների համարժեք պատասխանն է:

Հունիսի 22-ին ԱՄՆ իշխանությունները չինական չորս լրատվամիջոցները ճանաչեցին որպես «արտասահմանյան առաքելություններ»: Պետդեպարտամենտի հայտարարության մեջ ասվում էր, որ այդ կարգավիճակը տրվել էր Չինաստանի Կենտրոնական հեռուստատեսությանը, «Ժենմին ժիբաո» և «The Global Times» թերթերին և «China News Service» տեղեկատվական պորտալին:

Այս տարվա փետրվարին ԱՄՆ-ը Չինաստանի «Սինհուա» լրատվական գործակալությունը, Չինաստանի միջազգային ռադիոին, Չինաստանի գլոբալ հեռուստատեսային ցանցին, «China Daily Distribution Corporation»- ին և «Hai Tian Development USA»-ին հայտարարեց որպես «արտասահմանյան առաքելություններ»: Միևնույն ժամանակ, ԱՄՆ վարչակազմը պահանջեց նվազեցնել Միացյալ Նահանգներում այդ ԶԼՄ-ներում աշխատող չինացիների քանակը:

Դրան ի պատասխան՝ Պեկինը Չինաստանում «Նյու Յորք Թայմզ», «Ուոլ Սթրիթ Ջորնալ» և «Վաշինգտոն փոստ» թերթերում աշխատող ամերիկացի մի քանի քաղաքացիների արտաքսեց: