Ձեր վստահելի աղբյուրը

Երևանի ընդհանուր իրավասության դատարանի Շենգավիթի նստավայրում շարունակվում է ՊՊԾ գնդի գրավման գործով «Սասնա ծռերի» դատավարությունը։  Այսօր հարցաքննվեց այս գործից անջատված մասով ամբաստանյալ Գառնիկ Հովակիմյանը, որը դատարան էր հրավիրվել պաշտպանական կողմի միջնորդությամբ։

Նա նշեց, որ 10 օրից ավելի է եղել գնդում, սակայն մանրամասնություններ չի հիշում։ Գ.Հովակիմյանը հարցերին հիմնականում պատասխանում էր, որ չի հիշում։

Նախագահող դատավոր Մեսրոպ Մակյանը, դիմելով փաստաբան Տիգրան Եգորյանին, ասաց, որ անհրաժեշտ էր նախքան վկային դատարան կանչելը փաստաբանական հարցում իրականացնել, պարզելու` արդյոք նոր ասելիք ունի նա, թե՝ չունի։

Տ. Եգորյանն արձագանքեց, որ կատարել է ու ասելու բան ունի վկան։ Դատավորի հարցին, թե այդ դեպքում ինչո՞ւ չի ասում, պաշտպանը պատասխանեց, որ երևի չի հիշում։

Ամբաստանյալներից Արմեն Բիլյանը հարց ուղղեց, թե «արդյո՞ք ես ոստիկան Գագիկ Մկրտչյանի վիրավորման հետ կապ ունեմ», Գ. Հովակիմյանն ասաց. «Սաղս էլ գիտենք, որ կապ չունի»։

Մեղադրող դատախազ Պետրոս Պետրոսյանի հարցերին՝ գնդի տարածք մուտք գործելուց առաջ անձանցից  ո՞ւմ եք ճանաչել, Արմեն Բիլյանին ճանաչե՞լ եք, մինչև գունդի վրա հարձակվելն այդ մասին իմացե՞լ եք, նա հրաժարվեց պատասխանել։

Դատախազի հարցին՝ «այստեղ հարց հնչեց, թե արդյոք Արմեն Բիլյանին զենքով տեսել եք, թե ոչ, պատասխանեցիք՝ ոչ, այսինքն խոսքը 15 օրերի՞ն է վերաբերում, թե՞ կոնկրետ ինչ-որ իրավիճակին», Գ.Հովակիմյանն ասաց. «Ես չեմ կարող ասել, թե ինչ օրերին է, էն գիտեմ, որ իմ  ախպերն արդար է,  իմ ախպերը տենց բան չի արել, դա այդպես է։ Ձեր հարցերին էլ հրաժարվում եմ պատասխանել։  Նույն հարցերն են։ Պռոստը ձգձգում եք, չգիտեմ ինչ եք անում»։

Դատախազն ասաց. «Հնչեցված հարցերի մեծ մասին ամբաստանյալը պատասխանում է, թե չի հիշում, սակայն այն հարցերում, որոնցում հնչում է Արմեն Բիլյան անունը, պատասխանում է՝ ոչ։ Ինչպե՞ս է ստացվում, որ գործի վերաբերյալ հետաքրքրող հարցերը՝ գունդ մտնելու, որոշակի գործողություններ իրականացնելու, ականատես լինելու հանգամանքներին պատասխանում եք չեմ հիշում, երբ կոնկրետ հարցը վերաբերվում է Արմեն Բիլյանին, ասում եք, ոչ»։  

Փաստաբան Տիգրան Եգորյանն առարկեց ՝ ասելով, որ մարդը չի կարող պատասխանել այն հարցին, թե իր գլխում ինչ է տեղի ունենում, որի արդյունքում մի բան հիշում է, մի բան ոչ։

Այնուհետև դատավոր Մեսրոպ Մակյանն այսօր սանկցիա կիրառեց ամբաստանյալ Արմեն Բիլյանի նկատմամբ՝  նրան հինգ ժամով հեռացնելով դատարանի դահլիճից դատավարության մասնակցի նկատմամբ անհագալից վերաբերմունք դրսևորելու համար։

Ամբաստանյալը և փաստաբանն ուզում էին հասկանալ, թե ինչ է արել, դատավորն ասաց, որ ինքը լսել է, թե ինչ է ասել և չի ուզում կրկնել։

«Դատարանը պարտավոր չէ ձեր վարքագիծը տասնյակ նիստեր «յոլա» տանել»,- ասաց դատավոր Մակյանը։

Բիլյանի պաշտպանի միջնորդությունը՝ թույլ տալ նրան վերադառնալ դատարան, դատարանը բավարարվեց։

Նշենք, որ պարեկապահակային ծառայության գնդի գրավման օրը` 2016 թ. հուլիսի 17-ին, վիրավորում ստացած ոստիկանության ավագ ենթասպա Գագիկ Մկրտչյանը մահացել էր օգոստոսի 13-ին  հիվանդանոցում:  Դատարանում ամբաստանյալ Պավլիկ Մանուկյանը մի քանի անգամ հայտարարել է, որ ոստիկանին պատահաբար կրակել է ոչ թե Արմեն Բիլյանը, այլ՝  Էդվարդ Գրիգորյանը։