Ձեր վստահելի աղբյուրը

Մաթեմատիկա սովորելը երեխաների համար այդքան էլ հեշտ չէ, և նրանց պետք է լրացուցիչ հետաքրքրություն և ժամանակակից տեխնոլոգիական լուծումներով հարուստ կրթություն: Այստեղ  մեկտեղած են հայալեզու այն հարթակները, որոնք հատկապես հեռավար կրթության օրերին կարող են օգնել սովորողներին սիրելու մաթեմատիկան և ավելի հեշտ սովորելու:

1. «Քան» ակադեմիա

«Քան» ակադեմիան շահույթ չհետապնդող կազմակերպություն է, որը ստեղծվել է 2006 թվականին: «Քան» ակադեմիան տեսանյութերի ﬕջոցով կազմակերպում է առցանց կրթություն, ուսուﬓական նյութերի և վարժությունների ﬕջոցով հնարավորություն տալիս սովորելու, պարապելու և ամրապնդելու տարբեր առարկաների գիտելիքները։

Հարթակի խաղային տարրերն էլ աջակցում են ուսուﬓական գործընթացն ավելի հետաքրքրաշարժ դարձնելուն: Հարթակից օգտվում է ավելի քան 60 մլն մարդ աշխարհի 190 երկրից։ Այն տեղայնացնում է 30-ից ավելի երկրում, այդ թվում՝ Հայաստանում. «Այբ» կրթական հիմնադրամի նախաձեռնությամբ՝ 2017 թվականից տեղայնացվում են «Քան» ակադեմիայի նյութերը։

Հայերեն արդեն հասանելի է ավելի քան 2800 հայերեն տեսանյութ YouTube-ում և 1200 հայերեն վարժություն ու հոդված:  «Քան» ակադեմիայի հայալեզու կայքում ամենամեծ տեղը զբաղեցնում են մաթեմատիկայի բազմաթիվ տեսանյութեր ու վարժություններ, որոնք համապատասխանում են մեր երկրի պետական կրթական ծրագրին:

Մաթեմատիկայի տեսանյութերը հասանելի են թե՛ «Քան» ակադեմիայի կայքում, թե՛ YouTube-ում: Սակայն կայքում գրանցվելը տալիս է որոշ առավելություններ. ուսուցիչը կարող է ստեղծել առցանց դասարաններ, ուղարկել դասը և տնային հանձնարարություններն աշակերտներին, այնուհետև հետևել բոլոր աշակերտների առաջընթացին, ստանալ հաշվետվություններ նրանց առաջադիմության վերաբերյալ: Ուսուցիչը կարող է նաև ամեն մի աշակերտի համար անհատական   հանձնարարություններ ընտրել:

Հարթակից օգտվելիս աշակերտների համար առկա են խաղային տարրեր, ինչն ավելի է ոգևորում նրանց: Աշակերտը կարող է կայքում ամեն մի դաս պարապել այնքան ժամանակ, որքան անհրաժեշտ է իրեն՝ թեման հասկանալու համար:

Կայքում չկան գովազդներ, և այն լիովին անվտանգ է բոլոր տարիքի երեխաների համար:
«Քան» ակադեմիան ամբողջովին անվճար է։ Հայալեզու կայքը հասանելի է նաև հեռախոսային հավելվածի միջոցով (Google Play, IOS):

2. Mathematics

Mathemetics-ը Կովկասում մաթեմատիկա սովորեցնող առաջին առցանց համակարգն է՝ թեստավորման հնարավորությամբ։ Նրանից օգտվողները բացառիկ հնարավորություն են ստանում զարգացնելու տրամաբանությունը, հիմնարար գիտելիքներ ստանալու մաթեմատիկայից և պատրաստ լինելու բոլոր (այդ թվում՝ նաև ընդունելության) քննություններին:

Այն նախատեսված է 4-րդից մինչև ավարտական դասարանների աշակերտների համար։ Mathematics համակարգից օգտվողը նաև կարող է իմանալ, թե որերորդ արդյունքն է ցուցաբերում համակարգում սովորող հազարավոր մասնակիցների մեջ, գրանցել իր դպրոցը և ներկայացնել այն (այդ դեպքում նրա հավաքած միավորները գումարվում են դպրոցի միավորներին):

Mathematics համակարգը ներառում է 10-ամյա արագացված ուսումնական դասընթաց, 146 տեսական նյութ, 1448 խնդիր, որոնց պայմանները դինամիկ փոփոխվում են, հուշումներ ու լուծումներ յուրաքանչյուր խնդրի համար (լուծումները հասանելի են խնդրի միայն ճիշտ լուծումից հետո), թեստավորման համակարգ, որի օգնությամբ ստուգվում է օգտագործողի ուղարկած պատասխանը, առցանց մրցույթներ անցկացնելու հնարավորություն:

Այս պահին Mathematics համակարգում գրանցված են 7086 աշակերտ և 456 դպրոց: Համակարգը կատարել է 442 799 ստուգում:

Համակարգից օգտվելն անվճար է։

3. Mathuk. սովորել մաթեմատիկա հավելվածի միջոցով

Mathuk հայկական հավելվածի թիրախում 4-րդից մինչև ավարտական դասարանների աշակերտներն են, որոնք ցանկանում են խորացնել մաթեմատիկական գիտելիքները: Հավելվածն ապահովում է բազմալեզու ուսուցում՝ հայերեն, ռուսերեն, անգլերեն, իսպաներեն և ֆրանսերեն:

Հավելվածը ներառում է տեսական նյութեր, գործնական խնդիրներ, թեստավորման համակարգ:

Կարելի է օգտվել հուշումներից, ինչի պարագայում հավաքված միավորները նվազում են: Լուծումները հասանելի են դառնում միայն խնդրի ճիշտ լուծումից հետո: Հավելվածում, մասնակիցների անհատական ցուցանիշներից բացի, տրվում են նաև մասնակից երկրների վարկանիշները:

4.  ԻմԴպրոց

«ԻմԴպրոց» կրթական կայքը նախատեսված է նախադպրոցական երեխաների, դպրոցականների, ուսանողների, մանկավարժների և ծնողների համար: «ԻմԴպրոցը» հայաստանյան կայք է, որը գործում է 2015 թվականից։

Այն սերտ համագործակցում է Ռուսաստանի «ЯКласс» կայքի (www.yaklass.ru) հետ, որը ներկայումս համարվում է լավագույն կրթական հարթակը տասնյակ հազարավոր դպրոցների համար: Այն նաև լայնորեն կիրառվում է Լատվիայում, Ուկրաինայում, Բելառուսում, Ֆինլանդիայում, Գերմանիայում և Ավստրիայում:

«ԻմԴպրոցն» օգնում է ուսուցիչներին դասավանդման գործընթացում։ Այն հնարավորություն է տալիս էլեկտրոնային եղանակով հանձնարարել աշակերտներին դասարանային ու տնային աշխատանքներ և ստուգել դրանք: Աշակերտների համար այն առաջադրանքների էլեկտրոնային շտեմարան է և անսահման վարժանքների հարթակ:

Լավագույն աշակերտների, դասարանների և դպրոցների դինամիկ փոփոխվող ցանկերը հաղորդում են ուսման գործընթացին խաղային տարրեր և ստեղծում մրցակցություն՝ խթանելով և՛ մանկավարժներին, և՛ աշակերտներին:

«ԻմԴպրոց» կայքում առկա են մաթեմատիկայի բազում նյութեր՝ ըստ պետական կրթական ծրագրի։ Կայքը վճարովի է:

5. Հայկական կրթական միջավայրի պաշարների շտեմարան

«Պաշարների շտեմարանի» ստեղծման նպատակը կրթության ոլորտում տեղեկատվական և հաղորդակցական տեխնոլոգիաների (ՏՀՏ) ներդրման շարունակական զարգացման ապահովումն է, մասնավորապես՝ էլեկտրոնային բովանդակության հարստացումը և ուսումնամեթոդական պաշարների միասնական տարածքի ստեղծումը:

Դուք ևս կարող եք գրանցվել ու ընդամենը մի քանի գործողությամբ տեղադրել կայքում Ձեր սեփական նյութերը, մեկնաբանել ու գնահատել գոյություն ունեցողները: Առանց գրանցվելու կարող եք ներբեռնել, ուսումնասիրել և օգտագործել կայքում տեղադրված պաշարները:

Կայքում առկա են նաև մաթեմատիկա առարկայի նյութեր:

6. Qarakusi.am

«Քառակուսի» կայքը կարող է օգտակար լինել ինչպես աշակերտներին, այնպես էլ ուսուցիչներին՝ դասին պատրաստվելու և կամընտրական խմբակներ կազմակերպելու համար: Աշակերտները կարող են դպրոցական ծրագրի բոլոր թեմաների վերաբերյալ գտնել տարբեր բարդության խնդիրներ, որոնք լուծելով հնարավոր է քայլ առ քայլ կատարելագործել գիտելիքները: Իսկ ուսուցիչները կգտնեն հետաքրքիր նյութեր, որոնցով կարող են ավելի հետաքրքրացնել դասը և կամընտրական պարապմունքը:

Այցելուն կարող է «Թեմատիկ դասեր» բաժնում գտնել իրեն հետաքրքրող թեմաները, սովորել դրանք և լուծել համապատասխան խնդիրներն ու վարժությունները: Բոլոր վարժություններն ունեն իրենց լուծումներն ու պատասխանները: «Խնդիրների բանկ» բաժնում ավելացվում են նորանոր խնդիրներ, որոնք լուծելով կարող եք կատարելագործել ձեր գիտելիքները: Ամեն առաջադրանք ներառում է որոշակի թեմայի նվիրված վարժություններ ու խնդիրներ, որոնց շնորհիվ ավելի հեշտ է դառնում տվյալ թեմայի յուրացումը: