Ձեր վստահելի աղբյուրը

Երևանի ընդհանուր իրավասության դատարանի Շենգավիթի նստավայրում ՊՊԾ գնդի գրավման գործով «Սասնա ծռերի» դատավարությանը հարցաքննվող վկաներից ամբաստանյալ Աշոտ Պետրոսյանը պատմեց, որ ինքը հանդիպել է ոստիկան Գագիկ Մկրտչյանին, որն արդեն վիրավոր էր։  

«Գունդ մտնելուց 20-30 րոպե հետո եմ գնացել զինանոց։ Մենակ եմ եղել։ Ճանապարհին հանդիպել եմ Գագիկ Մկրտչյանին։ Հրապարակի եզրաքարին նստած էր, զինանոցի մուտքից ոչ հեռու։ Ես չգիտեի, որ վիրավոր է, մոտեցա իրեն, ձեռքս չիմանալով՝ դրեցի հենց այդ ուսին, ինքը շարժում արեց այդ պահին, հարցրի՝ վիրավո՞ր ես, ասաց՝ հա։ Անգամ արյուն չնկատեցի այդ պահին։ Հարցրեցի՝ ո՞նց ես զգում, ասաց՝ ոչինչ, լավ։ Ինձ հարցրեց՝ բժիշկ կանչե՞լ եք, ասացի հա, բայց ուշանում են։ Հարցրեցի՝ այլ տեղ վիրավորում ունե՞ս, ասաց չէ, մենակ թևս է։ Երբ իր նկարները դիահերձարանից բերեցին, ես սարսափեցի, հոշոտել էին այդ տղուն»,- ասաց նա։

Նրա խոսքով, իրենց տղաներն իրեն ասել են, որ իրենք Գ. Մկրտչյանին իր ոտքով ճանապարհել են, ոչ թե եկել են, բժիշկները տարել են, մի քանի օրից իմացել են, որ լավ է։

Մեղադրող դատախազ Պետրոս Պետրոսյանը նախ ասաց, որ Ա.Պետրոսյանը նկարագրի Գ.Մկրտչյանին։  Նկարագրելուց հետո դատախազը նշեց, որ  քրեական գործով ձեռք բերված տվյալների, այլ անձանց հարցաքննություններով պարզվել է, որ վկայի նշած վայրում նստած է եղել ոստիկան Տիգրան Դանիելյանը, որն ուսի շրջանում ստացել էր մարմնական վնասվածք։

«Վերջինս նույնպես իր կազմվածքով ծանրաքաշ է, դարձյալ կլորավուն արտաքին ունի, ճաղատ է, հնարավո՞ր է խառնում եք այդ անձին Գագիկ Մկրտչյանի հետ հաշվի առնելով նաև այն հանգամանքը, որ իմ ուղիղ հարցին պատասխանեցիք, որ դուք չէիք իմացել, որ նա Գագիկ Մկրտչյանն է»,- դատախազը հարցրեց վկային։ 

Ա.Պետրոսյանն ասաց. «Միգուցե չկարողանամ դիմագծերը նկարագրել, բայց որպես գեղանկարիչ իմ տեսողական հիշողությունը շատ լավ է։ Ոչ, հնարավոր չէր, որովհետև երբ Գագիկ Մկրտչյանի դիահերձարանի նկարը բերեցին ու ասացին, որ  Գագիկ Մկրտչյանն է, իմ տեսողական հիշողությամբ, ըստ նկարի, հիշել եմ այն մարդուն, որը վիրավոր այդ քարին նստած է եղել»։

Դատախազի հարցին, թե դատարանում  հայտնեցիք, որ հսկիչ անցագրային կետում տեսել եք Արմեն Բիլյանին, Էդվարդ Գրիգորյանին, հետո գնացել եք զինանոց, այնտեղ իրենց չեք տեսել, բայց տեսել եք Պավել Մանուկյանին։ 

«Այս գործով ամբաստանյալ Պավել Մանուկյանը դատարանում ցուցմունք է տվել, ասել, որ զինանոցի  շենքում և հերթապահների համար նախատեվսած սենյակում պատահաբար Գագիկ Մկրտչյանի վրա կրակոց է արձակել Էդվարդ Գրիգորյանը։ Ի՞նչ կասեք այդ կապակցութմաբ»,- հարցրեց դատախազ Պետրոսյանը։

«Դա Պավել Մանուկյանի կարծիքն է, իմը չէ, ես ասացի իմ տեսածը»,- պատասխանեց Ա.Պետրոսյանը։

Դատախազի հարցին՝ դուք նման փաստի տեղյա՞կ եք, պատասխանեց. «Ոչ»։ 

Դատախազն ասաց. «Հարցը հնչեցվում է այն պատճառաբանությամբ, որ  ուղիղ հակասում է ձեր տված ցուցմունքին»։ 

Ա. Պետրոսյանն արձագանքեց. «Շատ բաներում իմ ու Պավլիկի  մտքերը հակասում են։ Հետո ի՞նչ»։ 

Գագիկ Մկրտչյանի կինը՝ Հասմիկ Ոսկանյանը, հարցրեց՝ 100 տոկոս հիշո՞ւմ եք, որ թևին արյուն չի եղել, Ա.Պետրոսյանն ասաց. «Այո։ 

Հ. Ոսկանյանը շարունակեց. «Զարմանում եմ՝ մեկը գալիս, ասում է՝ արյունը չռում էր, մյուսն ասում է՝ արյան հետք չի եղել, մյուսն ասում է՝  վիրակապել եմ։ 30 հոգով 40 երգ են երգրում»։ 

Նշենք, որ պարեկապահակային ծառայության գնդի գրավման օրը` 2016 թ. հուլիսի 17-ին, վիրավորում ստացած ոստիկանության ավագ ենթասպա Գագիկ Մկրտչյանը մահացել էր օգոստոսի 13-ին  հիվանդանոցում:  Դատարանում ամբաստանյալ Պավլիկ Մանուկյանը մի քանի անգամ հայտարարել է, որ ոստիկանին պատահաբար կրակել է ոչ թե Արմեն Բիլյանը, այլ՝  Էդվարդ Գրիգորյանը։