Ձեր վստահելի աղբյուրը

«Սահմանադրական դատարանի արդեն նախկին անդամներն իրավունք չունեն մուտք գործելու Սահմանադրական դատարանի վարչական շենք»,- նշված է ՀՀ ոստիկանության պարզաբանման մեջ՝ կապված այն հանգամանքի հետ, որ Սահմանադրական դատարանի դատավոր Հրանտ Նազարյանն այսօր ցանկացել է մտնել Սահմանադրական դատարանի շենք, սակայն նրա մուտքը խոչընդոտել են ոստիկանության բարձրաստիճան սպաներ։ 

«22.06.2020 թվականին ՀՀ Ազգային Ժողովի կողմից ընդունված և 26.06 2020 թվականին ուժի մեջ մտած ՀՀ Սահմանադրության 213-րդ հոդվածում կատարված փոփոխությունների հիման վրա՝ մինչև Սահմանադրության 7-րդ գլխի ուժի մեջ մտնելը նշանակված և Սահմանադրական դատարանի անդամի կամ դատավորի պաշտոնում ընդհանուր տևողությամբ ոչ պակաս, քան 12 տարի պաշտոնավարած Սահմանադրական դատարանի անդամի (դատավորի) լիազորությունների ժամկետը համարվում է ավարտված, և պաշտոնավարումը դադարում է:

Սահմանադրական նորմերի անմիջական գործողության տրամաբանությունից ելնելով` արձանագրում ենք, որ եթե լրացել է Սահմանադրական դատարանի անդամի կամ դատավորի` այդ պաշտոնում պաշտոնավարման ընդհանուր տևողությամբ ոչ պակաս, քան 12 տարին, ապա Սահմանադրական դատարանի անդամի (դատավորի) լիազորությունները համարվում են դադարած:

Նորմի համակարգային վերլուծությունը թույլ է տալիս արձանագրելու, որ սահմանադրական դատարանի արդեն նախկին անդամներն իրավունք չունեն մուտք գործելու Սահմանադրական դատարանի վարչական շենք:  Սահմանադրական դատարանի շենքում անցագրային ռեժիմի հետ կապված հարցերը կարգավորված են սահմանադրական դատարանի աշխատակարգի 3-րդ հավելվածով»,- նշված է ոստիկանության պարզաբանման մեջ։

Հիշեցնենք, որ կատարված Սահմանադրական փոփոխություններով իշխանությունների մեկնաբանմամբ Հրայր Թովմասյանն այլևս ՍԴ նախագահ չէ, իսկ Ֆելիքս Թոխյանի, Հրանտ Նազարյանի և Ալվինա Գյուլումյանի որպես ՍԴ դատավորներ լիազորությունները դադարեցվում են։