Ձեր վստահելի աղբյուրը

«Քաղաքական երեք ուժերի՝ Գլխավոր դատախազություն ներկայացրած դիմումը, իմ դիտարկմամբ, ունի բավարար չափով հիմնավորվածություն, որպեսզի դա քննվի ու հետագայում վերածվի քրեական գործի»,-ասաց իրավունքի մագիստրոս Ռոբերտ Հայրապետյանը՝ ելույթ ունենալով Գոշավանքում «Իրավական ուղու» կազմակերպած «ՀՀ Սահմանադրություն․ կարմիր և կանաչ գծեր» խորագրով խորհրդաժողովի ժամանակ։

Նա պնդում է, որ սահմանադրության փոփոխությունների՝ ԱԺ կողմից ընդունումը սահմանդրական կարգի տապալման հատկանիշներ է պարունակում։

«Նախ մենք տեսանք, թե այն ինչ ընթացակարգով ընդունվեց, երբ առաջին ընթերցումից հետո նախագիծը ՍԴ եզրակիացության չուղարկվեց։ Ստացվում է, որ սահմանադրական նորմը, որի կատարումը օրենսդիր մարմնի պարտականությունն էր, չիրացվեց»,-ընդգծեց նա։

Հայրապետյանն ընդգծեց, որ գործող Սահմանդրությամբ առկա է խստացնող նորմի հետադարձ ուժի արգելքը, որը նախագծով ոտնահարվեց, ոտնահարվեց նաև դատավորների անփոփոխելիության սկզբունքը, սա ըստ էության, վտանգում է  սահմանադրական կարգը։

Հիշեցնենք, որ ՍԴ շուրջ տեղի ունեցող զարգացումների վերաբերյալ գլխավոր դատախազություն են դիմել ՀՅԴ, ԲՀԿ, «Հայրենիք» կուսակցությունները։