Ձեր վստահելի աղբյուրը

Շաբաթ և կիրակի օրերին մենք ունեցել ենք  1000  նոր դեպք: Այս մասին պարետատան նիստից հետո տեղի ունեցած ճեպազրույցի ընթացքում ասաց ՀՀ առողջապահության նախարար Արսեն Թորոսյանը:

«Կատարված թեստերի մոտ 30 տոկոսն արձանագրվում են որպես նոր դեպք: Լավ է այն իմաստով,որ աճ չկա, սակայն վատ է այն իմաստով, որ այդ թվերը մնում են բացարձակ առումով մեծ»,-ասաց Թորոսյանը:

Նախարարը խոսելով հիվանդանոցներով մահճակալային ֆոնդի բարեավման աշխատանքներից, տեղեկացրեց հետևյալը. «Երեկվա դրությամբ մահճակալային ծավալված ընդհանուր ֆոնդը հասել է 2600 մահճակալի,որից 2300 սովորական մահճակալներն են: Դրանց մեծ մասը հագեցած   թթվածնային կենտրոնական մատակարարումով են և մոտ 300-ը վերակենդանացման մահճակալներն են: Հագեցվածությունը կրկին մնում է բարձր, հատկապես բարձր է մնում վերակենդանացման բաժանմունքի զբաղվածությունը»:

Ինչ վերաբերում է համաճարակի դինամիկային, ապա Թորոսյանը հայտնեց. «Ծայրահեղ ծանր  և ծանր  վիճակում գտնվում է 650  հոգի ,որոնցից 47-ը  թոքերի արհեստական շնչառության սարքերի տակ են: Բարվոք է իրավիճակը տանը սպասող քաղաքացիների մասով: Այսինքն ՝ ժամը 15.00-ի դրությամբ չունենք տանը հոսպիտալացմանը սպասող քաղաքացի»:

Բոլոր դեպքերում դիմակների կրումը արդյունք տվել է, նախարարը կարծում է, որ եթե համատարած դիմակներ չկրեին, ապա պատկերն այլ կլիներ: 

«Նույնիսկ այս ծանր, բայց հարաբերականորեն կայուն վիճակը  կրկին   հակահամաճարակային միջոցառումների շնորհիվ է:  Նման համաճարակները սովորաբար տարածվում են պայթունաձև , մենք նման իրավիճակ չունենք: Դիմակների պատշաճ կրումը էֆեկտիվ է, քանի որ հակառակ դեպքում մենք կունենայինք ոչ թե 500-700 դեպք օրական, այլ շատ ավելի շատ»,- ասաց Թորոսյանը: