Ձեր վստահելի աղբյուրը

Այսօր Ապրիլյան պատերազմի մասնակից Ավետիս Զարգարյանի ծննդյան օրն է։ Նա վիրավորում էր ստացել 2016 թ. ապրիլի 4-ին Թալիշի  մարտական գործողությունների ժամանակ, գնդակը մտել է նրա ծնոտը, թիկունքով ներքև իջել և վնասել մի քանի ողը, ողնուղեղը: Բժիշկները թեև հույս չունեին, որ Ավետիսը  կապրի, բայց ամեն ինչ անում էին նրան փրկելու համար:  Ավելի քան մեկ ամիս միացված էր արհեստական շնչառության ապարատին, այդ ընթացքում Ավետիսին երկու անգամ վիրահատել են, հեռացրել են ողնաշարի գնդակը, վերականգնել բեկորից վնասված ձեռքի ոսկորը:

Մի քանի ամիս մնացել է Զինվորական հոսպիտալում, իսկ 2017 թվականի հունվարի 26-ին տեղափոխվել է Մոսկվա, որտեղ երեք ամիս վերականգնողական բուժում է ստացել, այնուհետև  վերադարձել է Հայաստան և բուժումը շարունակել «Հերացի» թիվ 1 հիվանդանոցային համալիրում:

«Ուրիշ ձև չի կարող լինել, պետք է քայլեմ»,- վստահ էր Ավետիսը։ 

«Հերացի թիվ 1 համալսարանական հիվանդանոցի մամուլի խոսնակ Շուշան Դանիելյանից Panorama.am-ը տեղեկացավ, որ Ավետիսի բուժման մեջ ակնհայտ դրական դինամիկա կա, բուժումը շարունակվում է,  երկարատև բուժում է անհրաժեշտ։ Նա արդեն սայլակից ինքնուրույն վեր է կենում, մեկ-երկու քայլ է անում։

«Վիրավորվել եմ ապրիլի 4-ի առավոտյան: Վեց հոգով՝ վաշտի հրամանատար Արգիշտի Գաբոյանի ուղեկցությամբ գնացել ենք զոհված զինծառայող Գևորգ Վարդանյանի և դասակի հրամանատար Հրաչ Գալստյանի դիերը դուրս բերելու: Հրամանատարը հարցրեց, թե ով է ուզում իր հետ գնալ, ես ասացի, որ ուզում եմ ու գնացինք: Հենց այդ մարտի ժամանակ էլ վիրավորվել եմ, իսկ Գաբոյանը՝ զոհվել: Իմ վիրավորվելուց հետո ընկերս՝ Լիպարիտ Աբրահամյանը գնում է օգնություն բերում, և իր շնորհիվ հիմա ես ողջ եմ: Օգնությունը ժամանակին գալիս է և ինձ կարողանում են դուրս բերել: Դրանից հետո աչքերս բացել եմ հոսպիտալում ապրիլի 5-ին»,- Panorama.am-ի հետ զրույցում պատմել էր Ավետիսը:

Լուսանկարն արված է 2016 թ. հուլիսին

Լուսանկարն արված է 2017 թ. մայիսին