Ձեր վստահելի աղբյուրը

ԱԺ «Իմ քայլը» խմբակցության մի քանի պատգամավորների նախաձեռնությամբ խորհրդարանն արտահերթ նիստ է գումարել։ 

Նիստի մեկնարկին իմքայլական պատգամավոր Սիսակ Գաբրիելյանը տեղեկացրեց, որ օրակարգում 14 հարց է, թեև նախնական տարբերակում 15 նախագիծ էր ներառված.

«Մեկ նախագիծը, որ վերաբերում է ԱԺ «Կանոնակարգ» օրենքում փոփոխություններ կատարելուն, նախաձեռնողների խնդրանքով դուրս է եկել օրակարգից։ Ունենք նախագծեր, որոնք առաջին ընթերցումից հետո երկրորդ ընթերցմամբ պետք է քննարկենք 24-ժամյա ռեժիմով»։

ԱԺ «Լուսավոր Հայաստան» խմբակցության պատգամավոր Գևորգ Գորգիսյանը նշեց, որ հասկանալի չէ՝ ինչու են հարցերը հրատապ քննարկվում. «Գիտենք, որ ձեր ֆրակցիայի մի մասը կորոնավիրուսով վարակված է, մյուս մասը՝ կոնտակտավոր է, և ոնց տեսնում ենք 14 օր չի մեկուսացել, հիմա բոլորով հավաքվել ենք այստեղ՝ քննարկելու նախագծեր, որոնք այդքան էլ հրատապ չեն։ Ինչո՞վ է պայմանավորված այս արտահերթը։ Կարող էինք այս ծրագրերը սեպտեմբերին քննարկել՝ համոզված լինելով, որ այլևս չունենք վարակակիր, կամ նրանք մեկուսացել են ու չեն վարակի մյուսներին»։

Պատասխանելով հարցին՝ Ս. Գաբրիելյանն ասաց, որ կան նախագծեր, որոնք հրատապ ընդունման կարիք ունեն։

«ԱԺ-ն դեռ արձակուրդում չէ, և չեմ տեսնում խնդիր պատգամավորներին լրացուցիչ ևս մեկ օր նիստերի դահլիճ հրավիրելու։ Իսկ եթե դուք տեղեկություն ունեք, որ որևէ մեկն այստեղ նստած է, բայց պարետի որոշմամբ պետք է ինքնամեկուսացված լիներ, կխնդրեմ բարձրաձայնեք»,- նշեց Սիսակ Գաբրիելյանը։

Գևորգ Գորգիսյանն էլ հակադարձեց՝ կան պատգամավորներ, որոնց վարակված լինելու մասին հայտարարվել էր, բայց 14 օրը չի անցել ու այստեղ են։ Բացի այդ, կոնտակտավորները պետք է 14 օր ինքնամեկուսանային. «Կարծում եմ՝ ձեր ողջ խմբակցությունը պետք է ինքնամեկուսանար, բայց չի արել։ Կամ ասում եք՝ հրատապ հարցեր կան, եկեք միայն դրանք քննարկենք»։

Սիսակ Գաբրիելյանն էլ արձագանքեց՝  ԱԺ «Լուսավոր Հայաստան» խմբակցությունն էլ ունի ներկայացրած օրենքի նախագիծ, որը պետք է այսօր քննարկվի.

«Եթե կարծում եք՝ հրատապ չէ, հանեիք այդ հարցը օրակարգից։ Ասեիք ձեր խմբակցության պատգամավորին, որ հրատապ չէ այդ հարցը»։

ԱԺ նախագահ Արարատ Միրզոյանն էլ, միջամտելով իր խոսքով շատ հետաքրքիր երկխոսությանը, նշեց, որ այն պատգամավորները, որոնք ցուցում ունեին մեկուսանալու կամ ինքնամեկուսանալու, մեկուսացել կամ ինքնամեկուսացել են։