Ձեր վստահելի աղբյուրը

«Իհարկե։ Ոչ միայն այս որոշումը, բազմաթիվ այլ դատական, ցանկացած դատավորի այլ  որոշումներ»,- լրագրողների հետ զրույցում ասաց ՀՀ վերաքննիչ քրեական դատարանի դատավոր Մխիթար Պապոյանը՝ պատասխանելով հարցին, թե արդյո՞ք ԲԴԽ այս որոշումն իր համար ապացույց էր, որ դատական համակարգն իշխանության ազդեցության տակ չէ, անկախ է ամեն դեպքում։

Նշենք, որ խոսքը Բարձրագույն դատական խորհուրդի այսօրվա որոշման մասին է, ըստ որի, ԲԴխ-ն մերժեց Վերաքննիչ քրեական դատարանի դատավոր Ալեքսանդր Ազարյանին կարգապահական պատասխանատվության ենթարկելու մասին արդարադատության նախարար Ռուստամ Բադասյանի միջնորդությունը։

Դիտարկմանը, թե իրավաբանական համայնքը տևական ժամանակ սոցցանցերում ֆլեշմոբ էր իրականացնում՝ ի աջակցություն դատավոր Ազարյանի, արդյոք այդ համայնքի ազդեցությունն ունեցե՞լ է ԲԴԽ որոշման համար, Պապոյանն ասաց. «Ես չեմ կարծում, որ այդ որոշումը դրա արդյունքն էր»։

Հարցին՝ արդյոք ԲԴԽ-ն ապահովո՞ւմ է դատավորների անկաշկանդ, անաչառ լինելը, դատավորն ասաց. «Որոշ դեպքերում համակարծիք եմ այն կարծիքին, որ անում է ամեն ինչ, ինչ իրենից կախված է, որոշ դեպքերում էլ միգուցե թերացել է»։