Վերահսկողություն կիրականացվի սահմանվածից ավելի ծանրաբեռնված բեռնատարների նկատմամբ
«Լուծարված հինգ տեսչական մարմինների փոխարեն մեկ տեսչական մարմին է գործելու»,- ԱԺ արտահերթ նիստում ասաց ՀՀ վարչապետի աշխատակազմի տեսչական մարմինների աշխատանքների համակարգման գրասենյակի ղեկավար Արթուր Ասոյանը՝ ներկայացնելով «Ավտոմոբիլային ճանապարհների մասին» և կից ներկայացված օրենքներում փոփոխություններ և լրացումներ կատարելու մասին օրենքների նախագծերի փաթեթը երկորդ ընթերցմամբ և ամբողջությամբ ընդունելու մասին հարցը։
Նրա խոսքով, քաղաքաշինության ոլորտում այսուհետ սուբյեկտի փոխարեն ստուգվելու են քաղաքաշինական օբյեկտները։
«Առանձին կարգավորում է նախատեսվում սուբվենցիոն ծրագրերի նկատմամբ իրականացվող վերահսկողության համար, այսուհետ առանց պլանային ստուգումների, ստուգումներ են իրականացվելու սուբվենցիոն ծրագրերի նկատմամբ։ Եվս մեկ կարևոր փոփոխություն. տեսչական մարմնին իրավասություն է տրվում վերահսկողություն իրականացնել սահմանված չափաքանակից ավելի ծանրաբեռնված բեռնատարների նկատմամբ»,- նշեց նա։
Արթուր Ասոյանը տեղեկացրեց, որ խմբակցությունները նախագծի հետ կապված առաջարկություններ չեն ներկայացրել։
Օրենքի նախագծի հարակից զեկուցող Գևորգ Պապոյանը հավելեց, որ բերրի հողերի օգտագործման հարցը նույնպես ներկայացված օրենքի նախագծով կարգավորվում է։
«Բացի այդ, օրինակ՝ դեպքեր են լինում, երբ վերանորոգվում են ճանապարհները, բայց մի քանի տարի անց դրանք վնասվում են, քանի որ այդ ճանապարհներով գերծանրաբեռնված մեքենաներ են անցնում։ Հիմա, նոր կարգավորմամբ՝ այդ մեքենաները պետք է կշռվեն, և դրանից հետո շարունակեն ճանապարհը»,- ներկայացրեց իմքայլական պատգամավորը։
Նա նշեց նաև, որ տնտեսական հարցերի մշտական հանձնաժողովի նիստում նախագիծը միաձայն հավանության է արժանացել։
ԱԺ «Լուսավոր Հայաստան» խմբակցության պատգամավոր Արկադի Խաչատրյանն էլ ասաց, որ փաթեթի մեջ ներառված է ևս մեկ նախագիծ՝ «Ստուգումների մասին» օրենքում փոփոխությունները, որոնցով նոր մոտեցումներ են մտցվում սուբվենցիոն ծրագրերի նկատմամբ ստուգումներ անցկացնելու վերաբերյալ։
«Դա նշանակում է, որ ստուգումները պետք է անցկացվեն ցանկացած անհրաժեշտ պահի։ Եվ այո, պետությունը պետք է վերահսկողություն իրականացնի սուբվենցիոն ծրագրերի կատարողականության նկատմամբ։ Բայց այդ ստուգումները պետք է այնպես արվեն, որ չապամոտիվացնեն տնտեսվարողներին՝ մասնակցելու սուբվենցիոն ծրագրերի տենդերներին»,- շեշտեց պատգամավորը։
Հարակից հրապարակումներ`
Լրահոս
Տեսանյութեր
Քաղաքապետարանը գործնականում թալանում է երևանցիներին. Չախոյան
