Ձեր վստահելի աղբյուրը

«Ոմանք մտածում են, որ հետապնդում է իրականացվել, իմ անձնական կարծիքով՝ ոչ»,- ԲԴԽ որոշման հրապարակումից հետո լրագրողներին ասաց Վերաքննիչ քրեական դատարանի դատավոր Ալեքսանդր Ազարյանը՝ պատասխանելով հարցին՝  կարո՞ղ եք այս որոշումից հետո ասել, որ ձեր նկատամաբ որևէ հետապնդում չի իրականացվել։

Նա վստահեցրեց, որ շարունակելու է աշխատել նույն ձևով, ինչպես աշխատել է միշտ։

Հարցին՝ այս որոշումից հետո  դատավորներն ավելի անկաշկանդ կլինե՞ն, նա  պատասխանեց. «Չեմ կարող ասել, անկաշկանդը միշտ էլ անկաշկանդ է, կաշկանդվածը, բնականաբար,...»։

Ա. Ազարյանն որևէ գնահատական չտվեց ԲԴԽ որոշմանը, քանի որ դեռ չի ծանոթացել, միայն եզրափակիչ մասն է ունկենդրել. «Կներեք, ես Հատուկ քննչական ծառայության պետ չեմ, որ առանց որոշմանը  ծանոթ լինելու  որևէ գնահատական տամ»։

Նրա կարծիքով, ԲԴԽ-ն կաշկանդված չէ իշխանության ներկայացուցիչների  կողմից արտահայտված տրամադրություններով։

Ա.Ազարյանն ասաց, որ Սասուն Խաչատրյանի՝ ՀՔԾ պետ նշանակվելուց հետո, որևէ հանդիպում չի ունեցել նրա հետ, իսկ դրանից առաջ էլ երևի պատահական են հանդիպել։  ՀՔԾ պետի հետ հեռախոսազրույց ևս չի ունեցել։

Հիշեցնենք, որ Բարձրագույն դատական խորհուրդը մերժեց դատավոր Ալեքսանդր Ազարյանին կարգապահական պատասխանատվության ենթարկելու մասին արդարադատության նախարար Ռուստամ Բադասյանի միջնորդությունը։