Ձեր վստահելի աղբյուրը

Երևանի Ֆիրդուսի կամ 33-րդ թաղամասի իրավական գործընթացի վերաբերյալ ուսումնասիրություններ են կատարվել, որոնց հիման վրա «Թրանսփարենսի ինթերնեշնլ հակակոռուպցիոն կենտրոնը» նախորդ շաբաթ հանցագործության վերաբերյալ հաղորդում է ներկայացրել իրավապահ մարմիններին։ Ասուլիսում այս մասին հայտարարեց այդ կենտրոնի ներկայացուցիչ Հայկ Մարտիրոսյանը։

Նա հույս ունի, որ պատշաճ իրավական ընթացակարգով տեղի կունենա հաղորդման հիման վրա նյութերի նախապատրաստումը։ 

«33-րդ թաղամասի հետ կապված իրավական գործընթացը սկսվել է 2006-2007 թվականին, 2008 թվականին, երբ կառավարության որոշումներով հանրային գերակա շահ է հռչակվել, սակայն ծրագիրը չի իրականացվել, ծրագիրը ձախողվել է։ Այս ընթացքում քաղաքացիների բազմաթիվ դժգոհություններ են հնչել, որ իրացման  ծրագրում իրենց սեփականության իրավունքը խախտվել է։

Այս ամենից հետո 2018 թվականի մարտին դարձյալ տարածքը հռչկավում է  գերակա հանրային շահ, ձեռք բերող ճանաչվում է մի ընկերություն, որի հիմնադիրը նույն էդուարդ Մելիքյանն է, նախկին արդեն չիրականացված ծրագրերով ներգրաված կազմակերպությունների հիմնադիրը։ Կառավարությունը հրաժարվում է  հրապարակել այսօրվա դրությամբ այն ֆինանսական երաշխքիները,  որոնք տվել են կազմակերպությունները  որպես ծրագրի իրակացման երաշխիք։ Այս գործընաթներից ելնելով՝ «Թրանսփարենսի ինթերնեշնլ հակակոռուպցիոն կենտրոնը» հաղորդում է ներկայացրել հանցագործության մասին պաշտոնատար անձանց կողմից համապատասխան գործարքների իրականացման մեխանիզմներում չարաշահումներ թույլ տալու վերաբերյալ։

Մասնավորապես քաղաքաշինության պետական կոմիտեն, որը պետք է իրականացներ մրցույթեր քաղաքաշինական լավագույն լուծումներով  տարածքի կառուցապատում իրականցնելու համար, որևէ քայլ չի ձեռնարկել այս տեսանկյունից, կառավարությունը որևէ ձևով չի արձագանքել համապատասխան կազմակերպության պաշտոնական անփութությանը։ Այս գործընթացներից ելնելով՝ այսօր պետք է կառավարությունն ամեն ջանք գործադրեր որպեսզի այդ գործընթացները լիներ թափանցիկ, դրանում ներառված չլինեին  նախկինում  կոռուպցիոն գործարքներում ընդգրկված կազմակերպություններ, այնինչ տեսնում ենք հակառակ գործընթացը»,- մանրամասնեց Հ. Մարտիրոսյանը։

Իրավապաշտպան Նինա Կարապետյանցն ասաց, որ մեծ սպասումներ չունի իրավապահ մարմիններից։ Նրա խոսքով, իրեն վրդովվեցրել է իշխանությունների վերաբերմունքը, մասնավորապես այն արձագանքները, որ՝  «ուր է այնտեղ մշակութային արժեք, այնտեղ սարայներ են»։

«Այդ արտահայտությունը ես լսել եմ դեռևս Հյուսիսային պողոտայից սկսած։ Ինչի՞ հետ  են համեմատում ու ասում, որ, օրինակ, Երևանի 100 տարվա պատմություն ունեցող շինությունները դրանք սարայրներեն։ Եթե համեմատում են նորադուրսպրծուկ օլիգարծների տների հետ, այո, սրանք սարայներ են, որովհետև այս տները չունեն ոսկեզօծ զուգարաններ, դռների ոսկեզօծ բռնակներ»,- նշեց իրավապաշտպանը։

«Ֆիրդուս» հիշողության գրքի համահեղինակ, գլխավոր խմբագիր, Ֆիրդուս թաղամասի պաշտպանության նախաձեռնող խմբի անդամ Տիգրան Ամիրյանն ասաց, որ երկար տարիներ հետազոտել է այս թաղամասը, աշխատել բնակիչների, տարբեր մասնագետների հետ՝ հասկանալու այս թաղամասի ինքությունը, պատմությունը։ Նրա խոսքով, այստեղ կան ոչ միայն ինքնաշեն, այլ ճարտարապետների կողմից նախագծված շինություններ,  կա կոնստրուկտիվիզմի շենք, որը երբեք չի ունեցել ոչ մի խնամք։

«Մարդու իրավունքների հետազոտության» կենտրոնի գործադիր տնօրեն  Անահիտ Սիմոնյանն ասաց, որ իրենք խոսում են ոչ թե մեկ թաղամասի մասին, այլ խոսում են քաղաքականության, պետության մոտեցման մասին։

«Եթե պետությունը և պետական ատյաններն իրենց որոշումները կայացնելիս պետք է առաջնորդվեն  կառուցապատողի շահերի պաշտպանությամբ, այն էլ այնպիսի կառուցապատողի, որի հետ  մի շարք խնդիրներ կան՝ կոռուպցիոն ռիսկերի մի շարք կասկածներ, գործընթացների անօրինակություն, սա չի կարող հանդիսանալ Հայաստանի կառավարության կողմից առաջադրվող քաղաքականության գիծ»,- նշեց նա։

Ա. Սիմոնյանի խոսքով, պետությունը պետք է ունենա քաղաքաշինական այնպիսի քաղաքականություն, որը բխում է  բավարար բնակարանային պայմանների ապահովման իրավունքից, բավարար սոցիալական  պայմանների և սոցիալական պաշտպանության իրավունքից, մշակութային իրավունքների պաշտպանությունից։ Նա ընդգծեց, որ քաղաքաշինությունը բիզնես չէ, պետական քաղաքականության շատ կարևոր ոլորտ է, առնչվում է  մարդու մի շարք իրավունքների հետ։

Ա. Սիմոնյանն ասաց, որ նամակ են ուղղել պատգամավորներին, ԱԺ հանձնաժողովներին, քանի որ ԱԺ յուրաքանչյուր հանձնաժողով այստեղ անելիք ունի։ 

«Կառավարությանը կոչ եմ անում այս գործընթացի իրավունքահենքությունը և մարդակենտրոնությունը վերականգնել, որովհետև այսպես չի կարող շարունակվել։ Սա շատ տխուր նախադեպ է հեղափոխությունից հետո», -նշեց նա։

Արվեստագետ, թաղամասի բնակիչ Արա Շահումյանն ասաց, որ բոլորն են մասնակցել թավշյա գործողություններին, հույս են ունեցել, որ պետք է կառուցեն իրավական երկիր։ 

«Պետությունը 200 միլիոնի համար, առավել ևս թավշյա հեղափոխությունից հետո այսքան մարդկանց անհանգստացնի ու նորից այդ անարդարության ալիքը պահի այս բարձունքի վրա, աբսուրդ է»,- նշեց նա։