Ձեր վստահելի աղբյուրը

«ՎԵՏՕ» հասարակական-քաղաքական շարժման ղեկավար Նարեկ Մալյանի համար անհասկանալի է, թե ինչու այսօր երկրորդ անգամ իրեն բերման ենթարկեցին։

«Ոստիկաններն ինձ կանգնացրեցին, ասացին, որ քշեմ, գնամ Երևան։ Ասացին, որ օրինական պահանջ են ներկայացնում, որպեսզի ես գնամ, ասացի՝ գնում եմ։ Ու իրենք էլ չհասկացան, խճճվեցին այդ պատմության մեջ, որոշեցին նորից բերման ենթարկել, սակայն բերման ենթարկելու հիմք չկար, խնդիր էր դրված մեր երթը կասեցնել դեպի Ազգային ժողով, որտեղ այդ ժամանակ քննարկվում էր ապօրինի արտակարգ դրության երկարացման հարցը», - ոստիկանության Մասիսի բաժանմունքից դուրս գալուց հետո լրագրողներին ասաց Ն.Մալյանը։

Նրա խոսքով,  իշխանությունը բացարձակ հանրային աջակցություն չունի. «Նրանք այնքան են վախեցած, նույնիսկ մեկ մարդուց են վախենում, ով իր մեքենայով մենակ գալիս է Երևան, քանի որ նրա շուրջ արդեն Երևանում շատ արագ կարող է համախմբվել հանրության գիտակից հատվածը։ Ըստ էության, այդ մեկ մարդն այնքան մեծ վտանգ է ներկայացնում իրենից, որ  ոստիկանական զորքերի կուտակումներ է տեղի ունենում։ Իշխանությունը սարսափած է։ 85 տոկոս հանրային աջակցություն, հազարավոր լայքերը կեղծ ֆեյքերով, որ դնում են իրենց գրառումների տակ, սուտ են»։

«Հայաստանում իշխանությունը բռնազավթված է օտարերկյա գործակալական ցանցի կողմից, որը չունի հանրային աջակցություն, օրակարգ է բերում հակահայկական, հակապետական օրենքներ, որոշումներ ու օգտվելով արտակարգ դրությունից, որ չկա հանրային դիմադրություն, լուռումունջ, ստրուկի նման մեր իշխանությունը դակում է  օտարերկրյա   գործակալական ցանցի բոլոր քմահաճույքներն ու օրակարգը»,- ասաց Ն.Մալյանը։

Ըստ նրա, Նիկոլ Փաշինյանի իրական հենարանը ոստիկանության զորքերն են, հանրության շրջանում չունի հենարան, աջակից։ Մալյանի խոսքով, բերման ենթարկվեցին նաև «Ադեկվադ» միաբանության անդամները, քանի իշխանությունները վախենում էին, որ նրանք կարող են միանալ իրեն ու միասին ավտոերթ իրականացնել։ 

«Նիկոլ Փաշինյանն անընդհատ անհարմար դրության մեջ է դնում իրավապահ համակարգին, ստիպում է խախտել օրենքը հանուն իր աթոռի, վայելքների, շքեղ կյանքի, մեքենաների շարասյունի»,- ասաց նա։ 

Նարեկ Մալյանն ասաց, որ ինքը շարունակելու է հայտնել իր կարծիքը, տեսակետները, չի վախենում տարօրինակ բերման ենթարկելուց, կլինեն էլի ակցիաներ։ 

Հիշեցնենք՝ «ՎԵՏՕ» հասարակական-քաղաքական շարժման ղեկավար Նարեկ Մալյանը հայտնել էր, որ  այսօր ժամը 11:00-ին սկսելու է Խոր Վիրապ-Երևան ավտոերթ՝ կեղծ արտակարգ դրության դեմ, «որի ժամանակ արգելվում է միայն հանրահավաքները և թուլացնելով հանրային դիմադրությունը՝ ոչ իրավաչափ օրենքներ, պղծություններ տարածող կոնվենցիաներ են ընդունվում և վավերացվում»։
Սակայն ավտոերթի մեկնարկից առաջ Մալյանը և մյուս մասնակիցները բերման են ենթարկվել։ Ոստիկանության Արտաշատի բաժնից դուրս գալով՝ Մալյանը հայտնել էր, որ ավտոերթով գնում են դեպի Ազգային ժողով, որտեղ այդ ժամանակ քննարկվում էր արտակարգ դրության երկարաձգման հարցը։ Արարատ-Երևան ավտոճանապարհին ոստիկանությունը կրկին բերման  էր ենթարկել Մալյանին և ավտոերթի մյուս մասնակիցներին։